មន្ត្រី៖ សូចនាករ និងស្ថិតិទេសចរណ៍ មានសារៈ​សំខាន់ សម្រាប់ផែនការសកម្មភាព

លោក កាទើ មហាំម៉ាត់ណោសស្រ៊ី រដ្ឋលេខាធិការ ក្រសួងទេសចរណ៍ មានប្រសាសន៍នៅថ្ងៃទី ១៤ ខែសីហា ឆ្នាំ ២០២៥ថា សូចនាករទេសចរណ៍ និងស្ថិតិទេសចរណ៍ផ្លូវការ មានសារៈ​សំខាន់ ដែលមិនត្រឹមតែបម្រើឱ្យការប្រើប្រាស់ក្នុងវិស័យទេសចរតែមួយប៉ុណ្ណោះទេ តែត្រូវបានវិស័យផ្សេងៗ ជាច្រើនទៀតក៏យកមកប្រើប្រាស់ ជាសូចនាករវាស់វែងមួយដ៏សំខាន់ ក្នុងការធ្វើសេចក្ដីសម្រេចការគ្រប់គ្រង ការសិក្សាទីផ្សារ ការវិភាគសេដ្ឋកិច្ច ការដាក់ចេញ ឬកែសម្រួលនូវគោលនយោបាយ យុទ្ធសាស្ត្រ និងផែនការសកម្មភាពនានា។

លោក កាទើ មហាំម៉ាត់ណោសស្រ៊ី បញ្ជាក់ថា វិស័យទេសចរណ៍ បានរីកលូតលាស់ ដោយ​ទេស​ចរណ៍អន្តរជាតិមកទស្សនាកម្ពុជា បានកើនឡើងពីប្រមាណ ២៩ ម៉ឺននាក់ ក្នុងឆ្នាំ ១៩៩៨ ឡើងដល់ជាង ៦,៦ លាននាក់ នៅឆ្នាំ ២០១៩ និង ២០២៤។

កម្ពុជាទទួលបានភ្ញៀវទេសចរអន្តរជាតិ ៦,៧ លាននាក់ និងទេសចរជាតិប្រមាណ ២២,៥២ លាននាក់ នៅឆ្នាំ ២០២៤ ក្នុងនោះចំណូលពីទេសចរអន្តរជាតិ ៣ ៦៣៧ លានដុល្លារ កើន​ឡើង ១៨%។ វិស័យទេសចរណ៍បានរួមចំណែក ផលិតផលក្នុងស្រុក ៩,៤%។

គិតត្រឹមឆមាសទី១ ឆ្នាំ ២០២៥​ កម្ពុជាទទួលបានទេសចរអន្តរជាតិប្រមាណ ៣ លាន ៣៦ ម៉ឺននាក់ កើនឡើង ៦% ធៀបនឹងរយ់ពេលដូចគ្នានៅឆ្នាំ ២០២៤៕