ការនាំចេញបន្លៃផ្លែឈើវៀតណាមទៅអាមេរិក កើនឡើងខ្លាំងឆ្នាំនេះ

ការនាំចេញបន្លែ និងផ្លែឈើវៀតណាមទៅកាន់សហរដ្ឋអាមេរិក បាន​កើនដល់ ៣១៦ លាន​ដុល្លារ ក្នុងរយៈពេល ៨ ខែដើមឆ្នាំ ដោយ​កើនឡើងប្រមាណ ៦៧ ភាគរយ ធៀប​នឹ​ងរយៈពេលដូចគ្នា​កាលពីឆ្នាំមុន​។ នេះបើតាមការចុះផ្សាយរបស់កាសែត VnExpress។ ​

សមាគមផ្លែឈើ និងបន្លែវៀតណាម បាន​ឱ្យដឹងថា ចេក ​ត្របែក ​ស្រកានាគ ដូង និងផលិតផលដែលផលិត​ចេញពីផ្លែឈើប្រភេទទាំងនេះ ​មានការពេញនិយមខ្លាំង​ក្នុង​ចំណោមអ្នកប្រើប្រាស់អាមេរិក។ ​ការនាំចេញទៅកាន់ទីផ្សារមួយចំនួនដូចជា​ជប៉ុន និងតៃវ៉ាន់ ក៏មានការកើនឡើង​គួរកត់សម្គាល់ផងដែរ។

យ៉ាងណាមិញ ​ប្រទេស​ទិញធំៗជាប្រពៃណីដូចជាចិន និងថៃ បានកាត់បន្ថយការនាំចូល​បន្លែផ្លែឈើ​ចន្លោះពី ១៥-៤០ ភាគរយ ដែល​បណ្ដាលឱ្យ​ការនាំចេញសរុបរបស់វៀតណាមលើទំនិញប្រភេទនេះ ធ្លាក់ចុះ ២ ភាគរយ មកត្រឹម ៤,៦ ប៊ីលានដុល្លារ។ ​

ទោះយ៉ាងណាក៏ដោយ​ អគ្គលេខាធិការសមាគមផ្លែឈើ និងបន្លែវៀតណាម លោក Dang Phuc Nguyen បាន​ថ្លែងថា ការនាំចេញបានស្ទុះងើបឡើងវិញពីការធ្លាក់ចុះយ៉ាងខ្លាំង​នៅដើមឆ្នាំនេះ ដោយតួលេខរយៈពេល​ ៨ ខែ កើនឡើងជិតឆ្នាំមុន ដោយ​ទុរេននៅតែបន្តរួមចំណែកធំក្នុងការនាំចេញបន្លែផ្លែឈើ។ ​

អ្នកជំនាញបានព្យាករ​ថា ការនាំចេញផ្លែឈើ និងបន្លែនៅឆ្នាំនេះ នឹងលើសពីកំណត់ត្រាឆ្នាំ ២០២៤​ ចំនួន ៧ ​ប៊ីលានដុល្លារ ប្រសិនបើការនាំចេញទុរេន​បន្តប្រសើរឡើង ខណៈកាលពីដើមឆ្នាំ ការទុរេនធ្លាក់ចុះគំហុកដោយសារតែការរឹតបណ្ដឹងការត្រួតពិនិត្យការនាំចូល​របស់ចិន៕