​រដ្ឋមន្ត្រីកសិកម្ម ​រំលេច​អំពីឱកាសវិនិយោគ​លើការកែច្នៃកសិផល​ ក្នុងជំនួបជាមួយថ្នាក់ដឹកនាំម៉ាឡេស៊ី

លោក ឌិត ទីណា រដ្ឋមន្រ្តី​ក្រសួងកសិកម្ម រុក្ខា​ប្រមាញ់ និង​នេសាទ ​បាន​រំលេច​អំ​ពី​ឱកាស​វិនិយោគ​លើ​វិស័យ​កែច្នៃ វេច​ខ្ចប់ និង​នាំចេញ​កសិផល​របស់​កម្ពុជា ដែល​ផ្ដល់​ផល​ចំណេញ​ និង​ផលប្រ​យោជន៍​ទៅវិញ​ទៅមក​សម្រាប់​ប្រជា​ជន​នៃ​ភាគី​ទាំងពីរ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក ឌិត ទីណា​​ បាន​លើក​ឡើង​ ក្នុង​ជំនួប​ពិភាក្សា​ការងារ​លើ​វិស័យ​កសិកម្ម​ជាមួយលោក​ Datuk Dr. Abdul Rahman Junaidi ​អនុរដ្ឋមន្រ្តី​ក្នុងខុទ្ទកាល័យ​នាយករដ្ឋមន្ត្រីនៃរដ្ឋសារ៉ាវ៉ាក់​ ប្រទេស​ម៉ាឡេស៊ី នៅព្រឹកថ្ងៃទី ​០៦ ខែតុលា ឆ្នាំ ២០២៥​។

​លោករដ្ឋមន្ត្រី ឌិត ទីណា បានស្វាគមន៍ចំពោះចំណាប់អារម្មណ៍របស់រដ្ឋសារ៉ាវ៉ាក់​ក្នុងការពង្រឹងកិច្ច​សហ​ប្រតិបត្តិ​ការ​ក្នុងវិស័យកសិកម្មកម្ពុជា ជាពិសេសការដោះដូរបច្ចេកទេសដាំដុះ​និងលទ្ធភាព​បើក​ទីផ្សារនាំចូលស្រូវអង្ករ ផលិតផលសាច់ និងកសិផលមានសក្ដានុពលដទៃទៀតពីកម្ពុជា ដើម្បី​ធានាសន្តិសុខស្បៀងរដ្ឋសារ៉ាវ៉ាក់។

​កម្ពុជា-ម៉ាឡេស៊ី បន្តពង្រឹងកិច្ចសហប្រតិបតិ្តការលើវិស័យកសិកម្ម ធានានូវសន្តិសុខស្បៀង ជំរុញទំហំកសិ-ពាណិជ្ជកម្ម ជាពិសេសលើស្រូវអង្ករ និងភាពជាដៃគូដ៏រឹង​មាំយូរអង្វែងក្នុង​ការតភ្ជាប់ខ្សែច្រវាក់តម្លៃ និងផលិតកម្ម ហើយកម្ពុជាត្រៀមខ្លួនរួចជាស្រេចក្នុងការផ្គត់ផ្គង់​កសិផលដល់រដ្ឋសារ៉ាវ៉ាក់ នៃប្រទេសម៉ាឡេស៊ី និងគាំទ្រវិនិយោគិនម៉ាឡេស៊ី​ក្នុងវិស័យ​កសិកម្មកម្ពុជាផងដែរ៕