បន្ទាប់ពីមានបទឈប់បាញ់គ្នា រវាងអ៊ីស្រាអែល និងពួកសកម្មប្រយុទ្ធប៉ាឡេស្ទីន ក្នុងនោះក៏នៅមានការព្រួយបារម្ភកាន់តែខ្លាំងឡើងថា ជំងឺកូវីដ ១៩ នឹងរីករាលដាលពេញតំបន់ហ្គាហ្សា ។ ហេតុផលមួយ ក្នុងចំណោមហេតុផលទាំងនោះ ដែលបានលើកឡើង គឺយុទ្ធនាការចាក់វ៉ាក់សាំង មានភាពយឺតយ៉ាវ ក៏ដូចជាការប្រមូលផ្ដុំគ្នា ដើម្បីអបអរបទឈប់បាញ់គ្នាជាដើម ។

គ្លីនិកមួយនៅភាគខាងជើងតំបន់ហ្គាហ្សា គឺជាមជ្ឈមណ្ឌលចាក់វ៉ាក់សាំងតែមួយគត់ សម្រាប់តំបន់នេះ ។ ប៉ុន្តែគ្លីនិកនេះបានផ្អាកប្រតិបត្តិការ បន្ទាប់ពីការវាយប្រហារតាមអាកាសរបស់អ៊ីស្រាអែល ។ យ៉ាងហោចណាស់វ៉ាក់សាំងចំនួន ៤០០ ដូស ត្រូវបានគេបំផ្លាញចោល ក្នុងការវាយប្រហារនោះ ។

ការវាយប្រហារតាមអាកាស បានបំផ្លាញប្រព័ន្ធថែទាំវេជ្ជសាស្រ្ត របស់តំបន់ហ្គាហ្សាពីអន់ទៅអាក្រក់ ។ អាជ្ញាធរសុខាភិបាល នៅតំបន់ហ្គាហ្សានិយាយថា គ្រូពេទ្យ ២ នាក់ត្រូវបានសម្លាប់ ខណៈស្ថាប័នវេជ្ជសាស្រ្តធំៗរបស់តំបន់ហ្គាហ្សា បានផ្អាកសេវាកម្មទាំងអស់ នៅពេលអគារក្បែរនោះត្រូវបានទម្លាប់គ្រាប់បែកបំផ្ទុះ ។

មន្ត្រីអាជ្ញាធរសុខាភិបាល លោក Medhat Abbas និយាយថា “ការខូចខាតស្ថាប័នវេជ្ជសាស្ត្រ កំពុងរារាំងកិច្ចប្រឹងប្រែង ដើម្បីការពារការរីករាលដាលនៃជំងឺកូវីដ ១៩” ។ លោកបានបន្ថែមថា “ស្ថាប័នវេជ្ជសាស្ត្រ ២ ផ្សេងទៀតត្រូវបានបំផ្លាញទាំងស្រុង” ។

ស្របពេលជាមួយគ្នានេះ ជនស៊ីវិលជាច្រើនបានបាត់បង់ផ្ទះសម្បែង ក្នុងអំឡុងពេលនៃការប្រយុទ្ធគ្នារយៈពេល ១១ ថ្ងៃ ហើយឥឡូវនេះក៏មានការព្រួយបារម្ភផងដែរថា ជំងឺកូវីដ ១៩ នេះអាចឆ្លងរាលដាល នៅក្នុងជម្រកសម្រាប់ប្រជាជន ដែលផ្លាស់ទីលំនៅ ។

ក្នុងពេលតែមួយនោះ មានជនភៀសខ្លួនដល់ទៅ ៧ ម៉ឺននាក់ កំពុងជ្រកកោននៅតាមសាលាសាលារៀន ដែលគ្រប់គ្រងដោយអង្គការសហប្រជាជាតិ ។ ចំណែកមនុស្សចំនួន ៥០ នាក់ត្រូវបានគេរាយការណ៍ថា កំពុងរស់នៅក្នុងថ្នាក់រៀននីមួយៗ ដោយមិនមានម៉ាសគ្រប់គ្រាន់ សម្រាប់មនុស្សគ្រប់គ្នាឡើយ ។

បន្ថែមពីនេះ ទីភ្នាក់ងារផ្តល់ជំនួយសង្គ្រោះ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន កំពុងធ្វើការដើម្បីការពារជនភៀសខ្លួនពីជំងឺកូវីដ ១៩ ផងដែរ ជាពិសេសកុមារ ដែលរងគ្រោះខ្លាំងដោយជម្លោះនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មិនខ្វល់រឿង បទឈប់បាញ់ ចូលជាធរមាន កងកម្លាំងអ៊ីស្រាអែល និង ប៉ាឡេស្ទីន បន្តប៉ះទង្គិចគ្នាជាថ្មី

ចុចអាន ៖ សម្ដែងការគាំទ្រដល់ បទឈប់បាញ់ គ្នានៅតំបន់ហ្គាហ្សា តែ ប្រធានាធិបតីអាមេរិក ចុះហត្ថលេខាលក់អាវុធទៅឲ្យ អ៊ីស្រាអែល