សិង្ហបុរី ដាក់ឱ្យប្រើប្រាស់ប្រព័ន្ធធ្វើតេស្តតាមផ្លូវដង្ហើម អាចរកឃើញកូវីដ-១៩ត្រឹមតែមួយនាទី

ការធ្វើតេស្តដង្ហើមដែលអាចរកឃើញវីរុសកូវីដ-១៩ក្នុងរយៈពេលតែមួយនាទីបានទទួលការអនុញ្ញាតឱ្យប្រើជាបណ្តោះអាសន្នពីអាជ្ញាធរវិទ្យាសាស្ត្រសុខាភិបាលសិង្ហបុរី (HSA)។

យោងតាមការដកស្រង់សម្ដីរបស់អ្នកវិទ្យាសាស្ត្រមកពី Breathonix ដែលជាក្រុមហ៊ុនផ្ដាច់ចេញពីសាកលវិទ្យាល័យជាតិសិង្ហបុរី (NUS) បានឱ្យដឹងថា ប្រព័ន្ធសាកល្បងដង្ហើមឈ្មោះ Brefence Go COVID-19 គឺជាប្រព័ន្ធវិភាគដង្ហើមដំបូងដែលទទួលបានការអនុញ្ញាតបណ្តោះអាសន្ននៅប្រទេសសិង្ហបុរី។

ប្រព័ន្ធនេះបានឆ្លងកាត់ការសាកល្បងគ្លីនិកនាអំឡុងខែមិថុនា ឆ្នាំ ២០២០ ដល់ខែមេសា ឆ្នាំ ២០២១។  ក្នុងនោះទីតាំងសាកល្បងប្រព័ន្ធមានចំនួន ៣ រួមមាន មជ្ឈមណ្ឌលជំងឺឆ្លងជាតិសិង្ហបុរី អាកាសយានដ្ឋាន Changi នៅសាំងហ្កាពួរ រួមនឹងអាជ្ញាធរសុខាភិបាលឌូបៃ (សាកលវិទ្យាល័យវេជ្ជសាស្ត្រនិងវិទ្យាសាស្ត្រសុខាភិបាល Mohammed Bin Rashid) ប្រទេសអារ៉ាប់រួម។

បច្ចុប្បន្នក្រុមហ៊ុន Breathonix កំពុងធ្វើការជាមួយក្រសួងសុខាភិបាលសិង្ហបុរី (MOH) ដើម្បីសាកល្បងការដាក់ពង្រាយប្រព័ន្ធ Brefence Go COVID-19 នៅចំណុចត្រួតពិនិត្យមួយចំនួនដែលអ្នកធ្វើដំណើរចូលមកនឹងត្រូវធ្វើតេស្តរកកូវីដ-១៩ដោយប្រើប្រព័ន្ធតេស្តដង្ហើម បូកជាមួយនឹងឧបករណ៍តេស្តរហ័ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Jia Zhunan នាយកប្រតិបត្តិក្រុមហ៊ុន Breathonix បានពន្យល់ថា “ តេស្តដង្ហើមរបស់យើងមិនមានការឆ្លងរាលដាលទេ។ អ្នកប្រើប្រាស់គ្រាន់តែដកដង្ហើមចេញចូលតាមមាត់ជាធម្មតាតាមការកំណតរបស់ឧបករណ៍ប៉ុណ្ណោះ ”។ ប្រព័ន្ធនេះនឹងដំណើរការដោយរកមើលសមាសធាតុសរីរាង្គបង្ករោគដែលមាននៅក្នុងដង្ហើមរបស់មនុស្ស ហើយវាក៏មិនបង្កផលរំខានអ្វីទេ។

ក្រុមហ៊ុន Breathonix បញ្ជាក់បន្ថែមថា ប្រព័ន្ធ Brefence Go COVID-19  កំពុងពិភាក្សាជាមួយអង្គការក្នុងស្រុកនិងក្រៅស្រុកជាច្រើនដើម្បីប្រើប្រាស់៕

ប្រែសម្រួល៖ សន្យា

ប្រភព៖ THE EDGE SINGAPORE

ចុចអាន៖ ការសិក្សា៖ សត្វឆ្កែហិតក្លិន មានសមត្ថភាពសឹង១០០ភាគរយ រកឃើញវីរុសកូវីដ-១៩

ចុចអាន៖ ប្រយ័ត្ន​ខ្លួន​បន្ថែម! គ្រូពេទ្យ​ជំនាញ​ព្រមាន​ថា ទោះ​អ្នក​ជា​សះស្បើយ​ពី​កូវីដ តែ​បើ​មាន​ជំងឺ​រ៉ាំរ៉ៃ​ប្រចាំ​កាយ ងាយ​នឹង​ឆ្លង​ម្ដង​ទៀត ហើយ​អាច​ធ្ងន់ធ្ងរ​ជាង​មុន​