គ្រូពេទ្យចុះមកដឹកយាយនិងចៅទៅព្យាបាលជំងឺ បន្ទាប់ពីមាន​អា​ការឡើងកម្ដៅធ្ងន់ធ្ងរ

ប្រជាពលរដ្ឋរស់នៅក្រុមទី៤ ភូមិដំណាក់ធំ១ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ មានក្តីរន្ធត់បន្ទាប់ពីឃើញក្រុមគ្រូពេទ្យមកដឹកយាយនឹងចៅយកទៅព្យាបាលជំងឺកូវីដ១៩ដោយអាការធ្ងន់ធ្ងរពេក។

លោក សេង វ៉ាន់ថា ចៅរងទី១ សង្កាត់ស្ទឹងមានជ័យទី២​ បានឲ្យដឹងថាកាល​ពីវេលាម៉ោង១៨និង១០នាទីព្រលប់ថ្ងៃទី​៣០​ខែឧសភានេះ ក្រុមគ្រូពេទ្យនៃមន្ទីរសុខាភិបាលរាជធានីភ្នំពេញ បានមកដឹកយាយនិងចៅប្រុសយកទៅព្យាបាលជំងឺកូវីដ​១៩​ដោយសារតែលោកយាយមានអាការក្តៅខ្លាំងហើយថែមទាំងចុកចាប់សាច់ដុំ។ដោយឡែកចៅប្រុសមានអាការៈ​រាគ​ក្អួតខ្លាំង។

លោកចៅរងបន្តថាលោកយាយដែលមានជំងឺឈ្មោះ មាស សុផារី អាយុ៦២ឆ្នាំ រស់​នៅបន្ទប់ជួល​លេខ៨ ក្រុម៤ ភូមិដំណាក់ធំ១ សង្កាត់ស្ទឹងមានជ័យទី២ ខណ្ឌមានជ័យ ដោយឡែកចៅប្រុសអាយុ៣ឆ្នាំ ឈ្មោះបញ្ញា រស់នៅជាមួយលោកយាយ ខណៈសមាជិក​៣នាក់ក្នុងគ្រួសារនេះត្រូវ​បានយកទៅ​ព្យា​បាល​កាលពីថ្ងៃទី២៧ខែឧសភាកន្លងទៅ។

លោកសេង វ៉ាន់ថា បានបញ្ជាក់ថា មកដល់ថ្ងៃនេះនៅក្នុងមូលដ្ឋានសង្កាត់ស្ទឹង​មានជ័យទី២នៅបន្ត​មានអ្នកឆ្លងជំងឺកូវីដ​១៩ជាបន្តបន្ទាប់បើទោះជាប្រែក្លាយពីតំបន់មកជាតប់លឿងក៏ដោយ។ដូច្នេះ​សំណូមពររបស់អាជ្ញាធរគឺសុំឲ្យបងប្អូនប្រជាពលរដ្ឋទាំងអស់ត្រូវគោរពនិងអនុវត្តន៍ឲ្យបាននូវ៣កុំ៣ការពារ កុំធ្វែសប្រហែសឲ្យសោះ៕ អត្ថបទ៖ នរា