រ៉ាប៊ី អះអាងថា ប្រាប់មូលហេតុដែលយកយុវជនបាយ​ឆាថត MV

ដើម្បីជាការស្រាយមន្ទិលជាថ្មីម្តងទៀតតារាចម្រៀងកញ្ញា រ៉ាប៊ី បានចេញមកបញ្ជាក់មូលហេតុជុំវិញការរិះគន់ដែលថាខ្លួនយកយុវជនគ្រវីសសក់ទៅថត MV ជារឿងបំពុលសង្គម។

ដូចទស្សនិកជនអ្នកតាមដានវិស័យសិល្ប:បានដឹងរួចមកហើយថា កាលពីថ្មីៗកន្លងទៅនេះ បានផ្ទុះការវែកញែក និង រិះគន់ម្តងរួចមកហើយជុំវិញយុវជន​​រហស្ស​​ននាម “បុរស​បាយ​ឆា” ដែលបាន​ចូលសម្តែង​នៅ​ក្នុង​បទ​ថ្មី​របស់​តារាស្រី រ៉ាប៊ី មាន​ចំណងជើង​ថា “ពូកែក្រលាស់”។ បន្ទាប់ពីការវែកនិងរិះគន់ភ្លាមៗនោះ តារាចម្រៀងម្ចាស់បទខាងលើអ្នកនាង រ៉ាប៊ី បានចេញមុខការពារយុវជនបាយឆា និងស្នើសុំចិត្តមហាជនឱ្យប្រៀបធៀប ឬរិះគន់បន្តទៀត។

កន្លងទៅ រ៉ាប៊ី ហាក់បង្ហាញអារម្មណ៍ហួសចិត្តចំពោះពាក្យសម្តីរិះគន់ទាំងនោះ ទើបធ្វើឱ្យលើកឡើងថា ប្អូនគ្រាន់បើជាងបង បងច្រៀងយូរហើយអត់ល្បី។ ដោយឡែកថ្មីៗនេះ រ៉ាប៊ី បានចេញបញ្ជាក់ជាថ្មីថា មូលហេតុដែលយកយុវជនបាយ​ឆាថត MV ជាការផ្តល់ឱកាសដែលអ្នកដទៃមិនឱ្យតម្លៃ។

តារាចម្រៀងកញ្ញា រ៉ាប៊ី បានឱ្យដឹងថា “ប្អូនជាមនុស្សល្អគ្មានចិត្តច្រណែនអ្នកដទៃតាំងពីដើមមក រ៉ាប៊ី គឺតែងតែផ្ដល់ឱកាសអ្នកដែលអ្នកដទៃមិនឱ្យតម្លៃជានិច្ចដូចជាជ្រូកព្រៃជាដើមឥឡូវពួកគាត់មានអនាគតអស់ហើយអត់អានាគតតែអ្នកដៀមដាមគេទេតារា Ex pir ed”។

គួរកត់សម្គាល់ថាថ្មីៗនេះមានការចែករំលែកនូវវីដេអូបង្ហាញសកម្មភាពរបស់យុវជន​មួយរូបដែល​មានមុខ​របរ​ឆា​បាយ​លក់​តាម​ផ្លូវហើយ​ទុក​សក់​វែង និង​តែងតែ​ក្រលាស់​សក់​របស់​ខ្លួន​ នៅ​ពេលកំពុង​ឆា​បាយ​ដោយទទួល​ការ​ចាប់អារម្មណ៍​ពី​មហាជន ជា​ពិសេសបណ្តា​អ្នកលេង​បណ្តាញ​សង្គមតែម្តង។ សកម្មភាព​របស់​យុវជន​រូប​នេះ ក៏​ត្រូវ​បាន​គេ​យក​ទៅ​ត្រាប់​តាម​បែប​លេងសើច (Troll) និង​បាន​បង្ហោះ​ពេញ​បណ្តាញ​សង្គមធ្វើ​ឱ្យ​មានការ​ទាក់ទាញ​ពី​អ្នក​ទស្សនា៕ ដោយ : ចាន់រ៉ា