ផ្ទុះរឿងអាស្រូវ ឈិនឡុង ជាមួយកូនស្រី

ថ្មីៗនេះបណ្ដាញសង្គមចិន កំពុងផ្ទុះការចាប់អារម្មណ៍លើរឿងអាស្រូវរបស់តារាក្បាច់គុន ឈិនឡុង (Jackie Chan) ដែលពាក្យចចាមអារ៉ាមនិយាយថា លោកបានទុកកូនស្រីចោលដោយមិនទទួលខុសត្រូវ ​ជាពិសេសបណ្ដោយឱ្យនាងដើរត្រាច់ចរ គ្មានសូម្បីកន្លែងស្នាក់នៅ។

លោក​ Jackie Chan ដែលទស្សនិកជនខ្មែរនិយមហៅថា ឈិនឡុង គឺជាតារាក្បាច់គុនដ៏ល្បីបំផុតនៅលើកញ្ចក់ទូរទស្សន៍ចិន និងអាស៊ី ហើយលោកក៏ធ្លាប់មានវត្តមាននៅក្នុងខ្សែភាពយន្តហូលីវូដផងដែរ។ កន្លងមក ជីវិតឯកជនរបស់តារាសម្ដែងរូបនេះ ហាក់ទទួលបានការស្ងើចសរសើរជាច្រើន ជាពិសេសការមើលថែកូនប្រុសជាទីស្រឡាញ់។ ប៉ុន្តែថ្មីៗនេះ បែរជាមានផ្ទុះពាក្យចចាមអារ៉ាមថា តារាវ័យ ៦៨ឆ្នាំរូបនេះ បានទុកកូនស្រីចោល ដោយមិនទទួលស្គាល់នាង និងទុកឱ្យនាងគ្មានកន្លែងរស់នៅទៀតផង។

ថ្វីត្បិតតែជាតារាសម្តែងរូបនេះ ជោគជ័យខ្លាំងក្នុងវិស័យភាពយន្តក៏ដោយ ប៉ុន្តែជីវិតឯកជន ពេលនេះហាក់មានបញ្ហាចម្រូងចម្រាសចាក់ស្រេះយ៉ាងខ្លាំង។ បើតាមប្រភពព័ត៌មាន ឈិនឡុង មានកូន ២នាក់ ប្រុសច្បងម្នាក់ និងកូនស្រីម្នាក់។ ​ប៉ុន្តែតាមការអះអាងពីកូនស្រីពៅនាង Etta Ng Chok Lam ថា ​ឪពុកខ្លួនមិនធ្លាប់ខ្វល់ពីសុខទុក្ខរបស់នាងឡើយ ហើយនាងក៏មិនដែលទទួលបានភាពកក់ក្ដៅពីឪពុករូបនេះដែរ។

Etta Ng Chok Lam បន្តថា ឪពុករបស់នាងចែកទ្រព្យសម្បត្តិឱ្យតែបងប្រុសនាងប៉ុណ្ណោះ ​ឯនាងវិញ ​មិនទទួលបានអ្វីទាំងអស់។ នាង​ថែមទាំង​អះអាង​ទៀតថា ឈិនឡុង ជាអ្នកផ្ដល់កំណើតឱ្យនាងពិតមែន ប៉ុន្តែ​លោក​គ្មាន​ចំណែក​អ្វី ​ក្នុង​ការ​ធំ​ធាត់​របស់​នាង​ឡើយ។

កូនស្រីវ័យ ​២២ឆ្នាំរូបនេះ សារភាព​ថា ​ខ្លួន​ធ្លាប់ចាកចេញពីផ្ទះ ​គ្មាន​កន្លែង​រស់នៅ ធ្លាប់ស្នាក់​នៅ​ក្រោម​ស្ពាន​ ហើយជាច្រើនដង Etta Ng Chok Lam បានរើសសំរាមដើម្បីចិញ្ចឹមជីវិតទៀតផង។

ទោះយ៉ាងណា នេះត្រឹមជាការអះអាងតែម្ខាងប៉ុណ្ណោះ ខណៈពេលនេះខាងលោក ឈិនឡុង មិនទាន់មានប្រតិកម្មតបអ្វីនៅឡើយទេ៕

ប្រែសម្រួល៖ សន្យា

ចុចអាន៖ “Kung Fu Hustle” វគ្គ២ ត្រៀមបង្ហាញវត្តមានឆាប់ៗ ក្រោយវគ្គ១ បញ្ចាំងចប់ជិត ២០ឆ្នាំ

ចុចអាន៖ ​តួសម្ដែងជើងចាស់ ​៥រូប មិនទាន់មានអ្នកបំបាក់បាន ថែមទាំងជាម្ចាស់ទ្រព្យសម្បត្តិច្រើនជាងគេ ក្នុងវិស័យសិល្បៈ