Jennie សមាជិក BLACKPINK រងរបួសពេលកំពុងថតរឿង

ប្រភពពីគេហទំព័រ Koreaboo បានឱ្យដឹងនៅថ្ងៃនេះថា តារាចម្រៀង Jennie សមាជិកក្រុម BLACKPINK បានទទួលរងរបួស អំឡុងពេលថតខ្សែភាពយន្តហូលីវូដឱ្យទូរទស្សន៍ HBO។​

កាលពីពេលកន្លងទៅ តារា​ចម្រៀង Jennie ត្រូវ​បានសារព័ត៌មាននានាផ្សព្វផ្សាយ​ថា ​នាងនឹងចូលរួម​សម្តែង​ខ្សែភាពយន្តហូលីវូដរឿង “The Idol” របស់​ទូរទស្សន៍ HBO ដែលភាពយន្តភាគនេះត្រូវបានដឹកនាំដោយកំពូលតារាចម្រៀងជនជាតិកាណាដា The Weeknd។

យ៉ាង​ណា​មិញ ថ្មីៗ​នេះ​អ្នក​គាំទ្រ​បាន​សម្ដែង​ការ​ព្រួយ​បារម្ភជាខ្លាំង ​បន្ទាប់​ពី Chelsea Fuji ដែលជា​អ្នក​រាំម្នាក់ និងជាមិត្ត​រួម​ក្រុមក្នុងភាពយន្ត បាន​ទម្លាយ​ថា Jennie បានរងរបួស​ពេលកំពុង​ថតរឿង។

ដើមឡើយ Chelsea បានសរសេរបង្ហោះនៅលើគណនី Instagram ជាភាសាជប៉ុន ថា Jennie សមាជិកក្រុម BLACKPINK មានភាពរវល់ខ្លាំងជាមួយនឹងកាលវិភាគថតរឿង ហើយពេល​កំពុង​ថត នាង​សម្គាល់​ឃើញ Jennie ​ខំ​ប្រឹង​ធ្វើ​ការខ្លាំងណាស់ ​ទោះ​បី​ជាតារាស្រីរូបនេះ​មាន​របួស​ក៏​ដោយ។ ទោះយ៉ាងណា Chelsea មិនបានបញ្ជាក់ទេថា Jennie រងរបួសអ្វី ហើយធ្ងន់ឬស្រាលប៉ុនណាឡើយ។

ដោយឡែកអ្នក​គាំទ្រ​របស់ Jennie ក្រោយដឹងរឿងនេះ ពួកគេនាំគ្នាសរសើរនូវភាពអត់ធ្មត់របស់នាង និងបានជូនពរនាងឱ្យឆាប់ជាសះស្បើយផងដែរ៕

ប្រែសម្រួល៖ សន្យា

ចុចអាន៖ ឌីជេ Soda ត្រូវគេគប់មួយកែវស្រា ពេលចេញពីក្លិបធ្វើការ

ចុចអាន៖ តារាកូរ៉េ ៥រូប អ្នកគាំទ្រដាក់រហ័ស្សនាមប្លែកៗ គួរឱ្យចាប់អារម្មណ៍ណាស់