អែន ឌី ៖ សិល្បៈខ្ញុំស្រលាញ់ចេញពីបេះដូង ហើយក៏ធ្វើឲ្យខ្ញុំស្រក់ទឹកភ្នែកតូចចិត្ត អន់ចិត្ត និងឈឺចាប់បំផុត

លោក អែន ឌី ជាតារាសម្តែង និងចម្រៀងរូបសង្ហាដែលកន្លងមកអ្នកណាៗក៏បានដឹងថា លោកជាតារាប្រុសខ្មែរមួយ​ដួង​មានសំណាងបំផុតដែលបានថតកៀកកើយជាមួយតារាស្រីសាច់ខ្ចីច្រើនដួង ទាំងរូបភាពសិចស៊ី និងការសម្តែងជាដើម។

បើតាមការសង្កេតរហូតមកដល់ពេលបច្ចុប្បន្ន ទាំងការគាំទ្រ និងប្រជាប្រិយភាពរបស់លោក អែន ឌី នៅតែរក្សាបានការគាំទ្រលើទីផ្សាសិល្ប:របស់ខ្មែរមិនថមថយឡើយ ថ្វីត្បិតលោកមានវ័យច្រើនបន្តិចមែន។ ប៉ុន្តែក្នុងអ្វីដែលគេចាប់អារម្មណ៍លោក អែន ឌី កាលពីថ្មីៗកន្លងទៅ ស្រាប់ចេញមុខត្អូញត្អែរថាអាជីពសិល្បៈ គឺជាការងារដែលលោកស្រលាញ់ចេញពី​បេះដូង ហើយក៏ជាការងារដែលធ្វើឲ្យលោកស្រក់ទឹកភ្នែក តូចចិត្ត អន់ចិត្តនិងឈឺចាប់បំផុត។

លោក អែន ឌី ថ្លែងអារម្មណ៍ពិតដូច្នេះថា ការងារសិល្បៈដែលខ្ញុំស្រលាញ់ចេញពីបេះដូង ហើយជាការងារដែលខ្ញុំខំប្រឹងតស៊ូខ្លាំងណាស់ទើបមានថ្ងៃនេះ ហើយក៏ជាការងារដែលធ្វើឲ្យខ្ញុំស្រក់ទឹកភ្នែក តូចចិត្ត អន់ចិត្ត និងឈឺចាប់បំផុតដែរ ទម្រាំមានថ្ងៃនេះដូចគ្នា ទោះខ្ញុំមិនល្បីដល់កំពូលដូចគេ ប៉ុណ្ណឹងខ្ញុំសប្បាយចិត្តព្រោះសមត្តិភាពខ្ញុំមានកម្រិតត្រឹមប៉ុណ្ណឹង ។

តារាប្រុសលោក អែន ឌី បាននិយាយទៀតថា អរគុណណាស់ដល់ទឹកចិត្តពុកម៉ែ ពូមីង បងប្អូន និងមិត្តទាំងអស់គ្នាដែលគាំទ្រខ្ញុំទើបមានថ្ងៃនេះ។ (អរគុណដល់អ្នកដែលស្អប់ខ្ញុំទាំងអស់ផង ខ្ញុំមិនដឹងថា​ ត្រូវធ្វើយ៉ាងណាឲ្យអ្នកស្រលាញ់ទាំងអស់នោះទេ ព្រោះខ្ញុំត្រឹមអ្នកសិល្បៈធម្មតាប៉ុណ្ណោះ មានតែសូមទោស ព្រោះមិនអាចតម្រូវចិត្តអ្នកបានគ្រប់គ្នា)

ទោះបីមានការលើកឡើងបែបនេះពីសំណាក់លោក អែន ឌី តែអ្នកគាំទ្រយល់ឃើញថា តារាប្រុសរូបនេះ គឺស្ថិតក្នុងបេះ​ដូងទស្សនិកជនដដែល៕

អត្ថបទ ៖ ចាន់រ៉ា