តារាសម្ដែងហុងកុង Kenneth Ma និងមិត្តស្រី ភ្ជាប់ពាក្យហើយ ក្រោយទាក់ទងគ្នាជិត ៣ឆ្នាំ

អ្នកគាំទ្រវិស័យភាពយន្តហុងកុង នាំគ្នាអបអរសាទរដល់តារាសម្តែង Kenneth Ma និងមិត្តស្រី Roxanne Tong យ៉ាងគគ្រឹកគគ្រេង ដែលប្រកាសភ្ជាប់ពាក្យជាផ្លូវការ កាលពីម្សិលមិញនេះ បន្ទាប់ពីពួកគេទាក់ទងគ្នាជិត ៣ឆ្នាំ។

នៅថ្ងៃដំបូងនៃឆ្នាំថ្មី​ ឆ្នាំ២០២៣ តារាស្រីវ័យ ៣៥ឆ្នាំ Roxanne Tong បានចែករំលែករូបថតប្រដាប់ប្រដាក្មេងលេងជាសត្វ Unicorn មួយគូ ដែលមានពាក់ចិញ្ចៀននៅលើស្នែងរបស់វា។ ភ្ជាប់ជាមួយរូបថត តារាស្រីរូបនេះសរសេរខេបសិនតែបីម៉ាត់ប៉ុណ្ណោះដែលនាងបានដាក់ hashtag ថា #1plus1 (មួយបូកមួយ) #forever (ជារៀងរហូត) និង #engaged (ភា្ជប់ពាក្យ)។ ក្រោយរូបថតបានផ្សព្វផ្សាយ អ្នកគាំទ្រតារាទាំងពីរដួង នាំគ្នាអបអរសាទរ និងជូនពរពួកគេយ៉ាងព្រោងព្រាត។

គួរបញ្ជាក់ថា Kenneth Ma និង Roxanne Tong បានទាក់ទងគ្នាតាំងពីឆ្នាំ ២០១៩ មកម្ល៉េះ ប៉ុន្តែគូស្នេហ៍តារាមួយគូនេះ ទើបប្រកាសពីចំណងស្នេហាពួកគេនៅក្នុងខែមិថុនា ឆ្នាំ២០២០។ ដោយឡែកចំពោះអាពាហ៍ពិពាហ៍ពួកគេ នឹងធ្វើឡើងនៅពេលណា នៅមិនទាន់មានការបញ្ជាក់ពីកូនកំលោះ-ក្រមុំ នៅឡើយ៕

ប្រែសម្រួល៖ សន្យា

ចុចអាន៖ បរាជ័យជីវិតគូ ៣ដង ពេលនេះ Kim Kardashian ប្រកាសចង់រៀបការម្ដងទៀត