លោក វណ្ណដា ត្រូវ​បាន​គេ​ចាត់ទុកថា​ជា​តារា​ចម្រៀង​រ៉េប​វ័យក្មេង​ដែល​បច្ចុប្បន្ន​កំពុង​សាង​កេរ្តិ៍ឈ្មោះ​ល្បីល្បាញ​ខ្លាំង​ទាំង​ទីផ្សារ​ក្នុង និង​ក្រៅ​ស្រុក។

វណ្ណដា ក៏​ជា​តារា​ចម្រៀង​ខ្មែរ​មួយ​រូប​បាន​ធ្វើ​ឲ្យ​ប្រទេស​ជិតខាង​ជាច្រើន​ស្គាល់​ពី​តម្លៃ​សិល្បៈ​នៅ​កម្ពុជា ព្រោះ​លោក​តែង​នាំ​យក​វប្បធម៌​អរិយធម៌​ខ្មែរ ទៅ​បង្ហាញ​លើ​ឆាក​អន្តរជាតិ​ឲ្យ​ពិភពលោក​បាន​ដឹង និង​ទទួល​ស្គាល់។

យ៉ាងណាមិញ ខណៈ​ទីផ្សារ​សិល្បៈ​កំពុង​ទទួល​បាន​ការ​គាំទ្រ​ច្រើន​ពី​មហាជន និង​មិត្តៗ​យុវវ័យ​នេះ​ដែរ តារា​ចម្រៀង​រ៉េប លោក វណ្ណដា ក៏​ស្រាប់​តែ​មាន​ដំណឹង​ដ៏​ភ្ញាក់ផ្អើល និង​រំភើប​មួយទៀត បន្ទាប់ពី​មាន​ការ​ទម្លាយ​នូវ​ផ្ទាំង​រូបភាព និង​រៀបរាប់​ឈ្មោះ​តារា​ចម្រៀង​ជាច្រើន​កំពុង​ត្រៀម​បង្ហាញខ្លួន​ក្នុង​ការ​ប្រគំ​តន្ត្រី​ខ្នាត​យក្ស​មួយ​នៅ​ថៃ ដោយ​ក្នុង​នោះ​ក៏​មាន​ដាក់​បញ្ចូល​ឈ្មោះ​តារា​ខ្មែរ​លោក វណ្ណដា ផង​ដែរ។

បើ​តាម​ការ​បង្ហោះ​នៅ​លើ​ផេក​ឈ្មោះ Univers Pageant បាន​បញ្ជាក់​ថា សម្រាប់​តារា​រ៉េប Vann Da (វណ្ណដា​) នឹង​ក្លាយ​ជា​តារា​ចម្រៀង​ខ្មែរ​ដំបូង​គេ​ដែល​បាន​ចូលរួម​ច្រៀង​នៅ​ក្នុង​ឆាក​ប្រគំ​តន្ត្រី​ដ៏​ធំ​មួយ​លើ​លោក​មាន​ឈ្មោះ​ថា Rolling Loud Thailand ប្រជុំ​ដោយ​តារា​រ៉េប​ល្បីៗ​មកពី​ប្រទេស​នាៗ​ជុំវិញ​ពិភពលោក​នៅ​ខែ​មេសា​ខាងមុខនេះ។

ក្នុង​នោះ​មាន​ការ​ចូលរួម​ដោយ​តារា​បរទេស​ល្បីៗ​ដូចជា​, Cardi B , Jessi , Chris Brown , J P ark ជាដើម។ ចំពោះ​កម្មវិធី​ខាងលើ ត្រៀម​ប្រព្រឹត្ត​ធ្វើឡើង​នៅ​ថ្ងៃ​ទី ១៣-១៥ ខែ​មេសា ឆ្នាំ ២០២៣ នា​ទឹកដី​ប្រទេស​ថៃ។

ដំណឹង​នេះ​ដែរ បាន​ធ្វើ​ឲ្យ​អ្នកគាំទ្រ​លោក​ជាច្រើន​សម្ដែង​ការ​ចូលរួម​អបអរ​គ្រប់គ្នា ខណៈ​បច្ចុប្បន្ន លោក វណ្ណដា គឺជា​តារា​ចម្រៀង​រ៉េប​ដែល​មិន​ត្រឹមតែ​សាង​កេរ្តិ៍ឈ្មោះ​ល្បីល្បាញ​ខ្លាំង​នៅ​ក្នុង​ប្រទេស​កម្ពុជា​ប៉ុណ្ណោះ​ទេ លោក​ក៏​ក្ដាប់​បាន​ឱកាស​ច្រើន​ក្នុង​ការ​ចេញ​ទៅ​ច្រៀង​នៅ​ក្រៅ​ប្រទេស​ទៀត។ ទាំង​នេះ​បាន​ស​បញ្ជាក់​ឲ្យ​ឃើញ​ថា វណ្ណដា កំពុង​មាន​ឥទ្ធិពល​លេចធ្លោ​លើ​វិស័យ​ចម្រៀង​បច្ចុប្បន្ន៕

អត្ថបទ ៖ ចាន់រ៉ា