អ្នកគាំទ្រប្រតិកម្ម ក្រោយឃើញតម្លៃសំបុត្រប្រគំតន្ត្រី BLACKPINK លើក ២ នៅប្រទេសថៃ

ក្រុមចម្រៀង BLACKPINK កំពុងរៀបចំការប្រគំតន្ត្រីជាលើកទីពីរនៅប្រទេសថៃ ក៏ប៉ុន្តែអ្នកគាំទ្រមិនពេញចិត្តនឹងដំណឹងនេះទេ បន្ទាប់ពីឃើញតម្លៃសំបុត្រចូលរួមការប្រគំតន្ត្រីនេះមានតម្លៃកើន​ឡើងខ្លាំងលើសកាលលើកទីមួយទៅទៀត។

ថ្មីៗនេះ YG Entertainment បានប្រកាសថា BLACKPINK នឹងត្រលប់មកប្រគំតន្ត្រីនៅទីក្រុងបាងកក ប្រទេស ថៃ សម្រាប់ការប្រគំតន្ត្រីដ៏ធំសម្រាប់ដំណើរទេសចរណ៍ពិភពលោក ‘BORN PINK’ របស់ពួកគេ។ តម្លៃសំបុត្រ VIP សម្រាប់ការប្រគំតន្ត្រីថ្មីគឺមានតម្លៃប្រហែល ៤៥០ ដុល្លារ ខណៈដែលសំបុត្រសម្រាប់ថោកបំផុតមានតម្លៃ ៨០ ដុល្លារ ។ នេះជាការកើនឡើងយ៉ាងខ្លាំងពី តម្លៃសំបុត្រក្នុង ការប្រគំតន្ត្រីនៅខែមករារបស់ពួកគេដែលមានតម្លៃពី ៥៧ ដុល្លារ ដល់ ២៧៦ ដុល្លារ ។

ជាងនេះទៅទៀត បើទោះបីជាតម្លៃខ្ពស់ក៏ដោយ ក៏មិនមានអត្ថប្រយោជន៍អ្វីបន្ថែមទេបើធៀបនឹងការប្រគំតន្ត្រីនៅទីក្រុងបាងកកកាលពីមុនរបស់ BLACKPINK លើកលែងតែកន្លែងអង្គុយជំនួសការឈរ។ ទន្ទឹមនឹងនេះ ម្ចាស់សំបុត្រ VIP ប្រគំតន្ត្រី BLACKPINK ផ្សេងទៀតនៅអឺរ៉ុបអាចជួបនិងឃើញ BLACKPINK ដោយផ្ទាល់បន្ទាប់ពីបញ្ចប់ការប្រគុំតន្ត្រី ។

លើសពីនេះទៅទៀត កន្លែងសម្រាប់ការប្រគំតន្ត្រីរបស់ BLACKPINK លើកទីពីរនៅក្នុងប្រទេសថៃ ​​​​គឺនៅពហុកីឡដ្ឋានជាតិ Rajamangala ដែលស្ថិតនៅខាងក្រៅកណ្តាលទីក្រុង និងអាចសមត្ថភាពផ្ទុកមនុស្សបានដល់ទៅចំនួន ៥១ ពាន់នាក់ឯណោះ ៕

ប្រែសម្រួល៖នាងតូច

ចុចអាន៖តារា K-pop ៧ រូប ធ្លាប់រងការគំរាមសម្លាប់ពីជនអនាមិក