មិនទាន់បង្ហាញមុខ តែឥទ្ធិពលរបស់ V ធ្វើឱ្យទស្សនាវដ្ដី ELLE លក់ដាច់លំដាប់ទីមួយ

មិនទាន់បង្ហាញមុខ ឬបញ្ចេញរូបថតជាផ្លូវការនោះទេ ប៉ុន្តែតារាចម្រៀង V សមាជិកក្រុម BTS បានបង្កើតឥទ្ធិពលខ្លាំងក្លាពាសពេញប្រទេសដែលអាចធ្វើឱ្យអ្នកគាំទ្រកុម្មង់ទិញទស្សនាវដ្ដី ELLE Korea ទុកមុនរាប់ម៉ឺនច្បាប់ រហូតនាំឱ្យទស្សនាវដ្ដីនេះលក់ដាច់បំផុតឈរលំដាប់ទីមួយ នៅកូរ៉េខាងត្បូង។

កាលពីថ្ងៃទី១១ ខែមីនា ឆ្នាំ២០២៣ កន្លងទៅថ្មីៗនេះ ទស្សនាវដ្ដី ELLE Korea បានធ្វើការបង្ហោះ Twitter មួយដែលបញ្ជាក់ថា V អាចជាម៉ូដែលសម្រាប់គ្របទស្សនាវដ្ដីរបស់ខ្លួននៅក្នុងខែមេសាខាងមុខ។ នៅលើ Twitter ទស្សនាវដ្ដី ELLE Korea ត្រឹមតែសរសេរស្លាកថា “V is coming” ពុំមានរូបភាពអ្វីទាំងអស់ ហើយបានទម្លាក់តំណភ្ជាប់បញ្ជាទិញជាមុន។ ថ្វីត្បិតគ្មានរូបថតរបស់ V ប៉ុន្តែភ្លាមៗអ្នកគាំទ្របានសម្រុកគ្នាកុម្មង់ជាច្រើនម៉ឺនច្បាប់ ក្នុងរយៈពេលប៉ុន្មានម៉ោង រហូតបង្កើតបានជាប្រវត្តិសាស្ត្រ ក្លាយជាទស្សនាវដ្ដីមានអ្នកកុម្មង់ទុកមុនច្រើនបំផុតមិនធ្លាប់មាននៅកូរ៉េ។

មិនត្រឹមតែនៅកូរ៉េខាងត្បូងនោះទេ ឥទ្ធិពលរបស់ V កំពុងសាយភាយតាមបណ្ដាប្រទេសនានា ដែលអាចនាំឱ្យទស្សនាវដ្ដី ELLE លក់ដាច់បំផុតឈរលំដាប់ទី២ នៅលើពិភពលោកផងដែរ។ ជាមួយគ្នា​ទស្សនាវដ្ដីបានសរសេរ “#Celineboy” ដែលនាំឱ្យមានការរំពឹងទុកថា V នឹងក្លាយជាទូតសុឆន្ទៈតំណាងម៉ាកប្រណីត CELINE ៕

ប្រែសម្រួល៖ សន្យា

ចុចអាន៖ Song Hye Kyo និង Song Joong Ki ម្នាក់ណារកចំណូលច្រើនជាងគេ ក្នុងភាពយន្តកំពុងល្បី?

ចុចអាន៖ តម្លៃសំបុត្រទស្សនាការប្រគំតន្ត្រី Blackpink នៅតៃវ៉ាន់ឡើងខ្ពស់កប់ពពក