ជីវិតកម្សាន្ដ

តារាសម្ដែង មុំ សុទ្ធារ៉ា ទម្លាយថា មានអ្នកគំរាមចង់ជួលមនុស្សវាយខ្លួន

បានផុស

៣ years មុន

នៅ

ថ្ងៃសៅរ៍ ៨ មេសា ២០២៣

ដោយ

តារាសម្ដែងប្រុសរូបសង្ហាលោក មុំ សុទ្ធារ៉ា បានប្រកាសយ៉ាងភ្ញាក់ផ្អើលថា មានអ្នកគំរាមប្រើលុយចង់ជួលមនុស្សឲ្យវាយលោក ខណៈអ្នកគាំទ្រសម្ដែងការព្រួយបារម្ភ និងចេញមកសួរនាំជុំវិញបញ្ហានេះគ្រប់គ្នា ប៉ុន្តែសាមីខ្លួន មិនបញ្ជាក់ថា បណ្ដាលមកពីបញ្ហាអ្វីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើចាប់អារម្មណ៍មុនការបង្ហោះសារដែលថាមានអ្នកគំរាមចង់ជួលគេវាយលោកប្រមាណ ៣ ថ្ងៃ គេឃើញតារាប្រុសលោក មុំ សុទ្ធារ៉ា បង្ហាញការមិនសប្បាយចិត្ត ឬអាក់អន់ចិត្តជាមួយអ្នកដឹកនាំម្នាក់ ជុំវិញការរើសអើងខ្លួន តែលោកមិនបានប្រាប់អត្តសញ្ញាណថាជានរណាម្នាក់ទេ។ លោកគ្រាន់តែបញ្ចេញអារម្មណ៍នៅលើបណ្ដាញសង្គមថា ខ្ញុំអាក្រក់ ឬល្អ ស្ថិតនៅលើមាត់បងទេ ខ្ញុំត្រឹមតែជាតារាសម្តែងម្នាក់ មិនមានអ្វីអស្ចារ្យទេ តែដោយសារខ្ញុំស្រឡាញ់សិល្បៈ បងជាអ្នកដឹកនាំម្នាក់ បើប្អូនខុសអី គួរហៅប្អូនសួរ បងនិយាយឲ្យចំមុខ។

លោកបន្តថា ពេលប្អូនឃើញបងជម្រាបសួរបងរហូត ពេលខ្លះបងមិនដែលមើលមុខប្អូនផង បងធ្វើដូចមិនស្គាល់ហ្មង បងនិយាយប្អូននៅក្រោយខ្នងម៉េចខ្លះក៏ប្អូនមិនគិត ព្រោះថាជាការងារបងហើយ ហើយប្អូនក៏មិនហ៊ាននិយាយជាមួយបង ខ្លាចលើកដៃទៅខុសបងអត់មើលមុខទៀត តើប្អូនចាំតែខុសមែនទេ តើប្អូនជាមនុស្សភ្លេចកំណើតមែនទេ ប្អូនគោរពបងណាស់ តែសុំទោសផងដែលប្អូនមិនចេះសម្តែងដូចបង ការគោរពដឹងគុណរបស់ខ្ញុំគឺចេញពីខាងក្នុងពិតៗ មិនមែនត្រឹមសម្បកក្រៅ បងជារៀមច្បងគួរតែផ្តល់អនុសាសន៍ល្អដល់ប្អូនៗ មិនមែនចាំតែមើលបំណាំទេ។

លោក មុំ សុទ្ធារ៉ា បាននិយាយទៀតថា ប្អូនជម្រាបសួរបង បងធ្វើមិនឃើញ ក៏ប្អូនខុស ខំនិយាយលេងជាមួយបង បងសឹងតែមិនចង់និយាយជាមួយ ក៏ប្អូនខុស តើឲ្យប្អូនតម្រូវចិត្តបងយ៉ាងម៉េចទៀតទៅ? ជឿខ្ញុំទៅបង អ្វីក៏ដោយមិនអាចកើតឡើងតែម្ខាងបានទេ បើគេផ្តល់តម្លៃឲ្យយើង យើងប្រាកដជាផ្តល់តម្លៃឲ្យគេវិញជាមិនខាន។

បន្ទាប់ពីការបង្ហោះសារដូចការរៀបរាប់ខាងលើនេះរំលងបានប៉ុន្មានថ្ងៃ ស្រាប់តែតារាប្រុសរូបនេះបានទម្លាយថា មានគេគំរាមលោក។ ខ្លឹមសារនោះត្រូវបានលោក មុំ សុទ្ធារ៉ា បញ្ជាក់ថា “បងអាងមានលុយហេ៎ សម័យនេះគេឈប់ជួលគេឲ្យវាយហើយ បើបងខ្លាំងបងចេញមកបង កោតបងយកពាក្យចឹងមកគំរាមកើត”។ ជុំវិញរឿងរ៉ាវខាងលើនេះ នៅព្រឹកថ្ងៃទី ០៨ ខែមេសា ឆ្នាំ ២០២៣ នេះមិនទាន់អាចសូមការបកស្រាយបន្ថែមពីតារាសម្ដែង មុំ សុទ្ធារ៉ា បាននៅឡើយទេ៕

អត្ថបទ ៖ ចាន់រ៉ា