តារាអន្តរជាតិ ៦ ដួង ចែករំលែកបទពិសោធន៍ជំងឺថប់បារម្ភ

ខណៈជំងឺរាតត្បាតកូវីដ-១៩ ចាប់ផ្ដើមវាយលុក ជំងឺបាក់ទឹកចិត្តនិងជំងឺថប់បារម្ភក៏បានរីករាលដាលដល់ទៅ ២៥ ភាគរយនៃទូទាំងពិភពលោកផងដែរ ។ ទោះតារាអន្តរជាតិល្បីប៉ុនណានៅតែមិនអាចគេចផុតពីជំងឺផ្លូវចិត្តទាំងនេះឡើយ ដូច្នេះខាងក្រោមគឺជាការចែករំលែកបទពិសោធន៍របស់ពួកគេ៖

១. Taylor Swift

តារាចម្រៀងលំដាប់ពិភពលោក Taylor Swift ដែលមានទ្រព្យសម្បត្តិ ៥៧០ លានដុល្លារ បាននិយាយពីបទពិសោធន៍ជំងឺថប់បារម្ភថា “ជួនកាលអាចមានអារម្មណ៍ដឹង ។ បើអ្នកបណ្ដោយឲ្យជំងឺថប់បារម្ភយកឈ្នះលើអ្នក ប្រៀបដូចជាគ្រប់គ្នាកំពុងរង់ចាំអ្នកបរាជ័យនោះ អ្នកនឹងចប់ជាមិនខាន” ។

២. Adele

តារាចម្រៀងអង់គ្លេសវ័យ ៣៥ ឆ្នាំរូបនេះ បានចែករំលែកថា “ខ្ញុំខ្លាចទស្សនិកជន ។ នៅកម្មវិធីមួយក្នុងទីក្រុង Amsterdam ប្រទេសហូឡង់ ខ្ញុំភ័យខ្លាំងណាស់ ទើបខ្ញុំរត់គេចតាមទ្វាអគ្គិភ័យ” ។

៣. Jennifer Lawrence

តារាសម្ដែងអាមេរិក ល្បីក្នុងរឿង “The Hunger Games” និយាយថា “ពេលខ្ញុំចូលរៀនដំបូង គ្រប់យ៉ាងគឺងងឹត ខ្ញុំមិនដឹងវាជាអ្វីទេ ជាជំងឺថប់បារម្ភម្យ៉ាង” ។

៤. Demi Lovato

តារាចម្រៀងអាមេរិក ដែលមានទ្រព្យសម្បត្តិសរុប ៤០ លានដុល្លារ Demi Lovato បានឲ្យដឹងថា “បើខ្ញុំជាប់នៅក្នុងកន្លែងមានមនុស្សច្រើន ខ្ញុំនឹងចាប់ផ្ដើមគិតថា ព្រះអើយ! ខ្ញុំស្លាប់ឥលូវហើយ ។ ប្រាកដជាមានបញ្ហា ហើយនឹងមានមនុស្សមកចាក់សម្លាប់ខ្ញុំ” ។

៥. Dakota Johnson

តួឯកស្រីក្នុងរឿង Fifty Shades បញ្ចេញអារម្មណ៍ពិតថា ពេលខ្លះនាងភ័យពេកដល់ថ្នាក់មិនដឹងខ្លួនកំពុងគិតអ្វី ឬធ្វើអ្វីឡើយ ។

៦. Emma Stone

តួឯកស្រីក្នុងរឿង ​The Amazing Spider-Man ២០១២ អ្នកស្រី Emma Stone ទម្លាយថា “លើកដំបូងដែលខ្ញុំមានអារម្មណ៍ភ័យស្លន់ស្លោ ពេលនោះខ្ញុំកំពុងអង្គុយលេងនៅផ្ទះមិត្តភ័ក្ដិរបស់ខ្ញុំ ខ្ញុំស្មានថាផ្ទះកំពុងឆេះ ទើបទូរស័ព្ទរកម៉ាក់ដើម្បីនាំទៅផ្ទះវិញ ។ បញ្ហានេះនៅតែបន្តអស់រយៈពេល ៣ ឆ្នាំឯណោះ ។

សម្រាប់ជំងឺថប់បារម្ភ ជាជំងឺផ្លូវចិត្តដែលគ្មានវិធីព្យាបាលនោះទេ ប៉ុន្តែអ្នកអាចរៀនគ្រប់គ្រងវាបាន ដោយធ្វើតាមការណែនាំរបស់គ្រូពេទ្យចិត្តសាស្ត្ររបស់អ្នកឲ្យបានត្រឹមត្រូវ ៕

ប្រែសម្រួល៖ វារី

ចុចអាន៖ មកដឹងពីជំងឺប្រចាំកាយរបស់តារាអន្តរជាតិ ១០ នាក់