ស៊ឹម ស្រីនិច ច្រានចោលក្រោយមានការចុះផ្សាយរឿងមានស្វាមី

បន្ទាប់ពីចូលប្រឡូកក្នុងអាជីពសម្តែងមានរយ:ពេលយូរឆ្នាំមកនោះ តារាសម្តែងកញ្ញា ស៊ឹម ស្រីនិច កាលពីអំឡុងឆ្នាំ២០២១បានប្រកាសផ្អាកពីសិល្ប:អស់មួយសន្ទុះធំ។ ប៉ុន្តែអ្វីដែលគេចាប់អារម្មណ៍ស្រាប់ថ្មីៗនេះ ស៊ឹម ស្រីនិច បានប្រកាសថា នាងខកខានថតអស់ចំនួន១៥រឿងរាប់ចាប់តាំងដេីមឆ្នាំមកដល់ខែកក្កដានេះ។

ស្របពេលការប្រកាសនៃការខកខានថតសម្តែងរឿងនេះដែរក៏មានការចាប់អារម្មណ៍ពីសំណាក់អ្នកគាំទ្រ និងបណ្តាញផ្សព្វផ្សាយមួយចំនួនបានធ្វើការចុះផ្សាយពីតារាសម្តែង ស៊ឹម ស្រីនិច ដោយភ្ជាប់រឿងរ៉ាវថា ស្រីនិច មានស្វាមីរួចហើយទើបធ្វើឲ្យនាងដកឃ្លាពីអាជីពសិល្ប:ទៅសម្ងំសាងសុភមង្គលគ្រួសារយ៉ាងត្រជាក់ល្ហឹម។

ដោយសារតែមានការចុះផ្សព្វផ្សាយអំពីរឿងរ៉ាវដែលនិយាយថា នាងមានស្វាមីនេះហើយទើបធ្វើឲ្យស្រីស្អាត ស៊ឹម ស្រនិច កើតទុកមិនសប្បាយចិត្តចេញមុខប្រតិកម្មច្រានចោលដំណឹងនេះភ្លាមៗ ដើម្បីបញ្ជៀសការយល់ច្រឡំរបស់អ្នកគាំទ្រ។ តារាស្រី ស៊ឹម ស្រីនិច បានចេញការបដិសេធកាលពីយប់ថ្ងៃទី១៤ ខែកក្កដា ឆ្នាំ២០២៣ថា នាងមិនទាន់មានស្វាមីទេ ហើយក៏មិនលាក់បាំងដែរបើសិនជាមានមែន។

កញ្ញា ស្រីនិច បានបញ្ជាក់ថា “ខ្ញុំគ្មានស្វាមីទេហើយក៏មិនលាក់បាំងបងប្អូនដែរពេលណាខ្ញុំមានគូជីវិត ខ្ញុំនឹងបញ្ជាក់កុំឲ្យមានឈ្មោះជាមេម៉ាយដោយសារតែព័ត៌មាននេះហើយដែលធ្វើឲ្យខ្ញុំក្លាចរអាចុះរហូតទាល់តែខ្ញុំឈប់ពីសិល្ប:មានទាំងល្អមានទាំងអាក្រក់”។ យ៉ាងណាមិញក្រោយការបង្ហោះសារនេះមិនបានប៉ុន្មានផងស្រាប់តែកញ្ញា ស៊ឹម ស្រីនិច បានលុបការផុសនេះចេញពីគណនីហ្វេសប៊ុករបស់ខ្លួនវិញ។

ជុំវិញរឿងរ៉ាវដែលគេសង្ស័យថាមានប្តីនេះដែរ តារាសម្តែងសាច់ខ្ចី ស៊ឹម ស្រីនិច កន្លងមកធ្លាប់បានប្រាប់កម្ពុជាថ្មីដោយបដិសេធថា នាងមិនមានអ្វីពាក់ព័ន្ធជាមួយបុគ្គលណាទេ។ ចំណែករឿងដែលគេចោទប្រកាន់នោះគ្រាន់តែការយល់ច្រឡំមួយដែលប្រឌិតឡើងហួសហេតុដើម្បីជាការជាន់ពន្លិច និងបង្ខួចកិត្តិយសប៉ុណ្ណោះ៕

អត្ថបទ៖ ចាន់រ៉ា