ជីវិតកម្សាន្ដ

ក្រោយ នាយតាក់ស៊ី ប្រតិកម្ម ភាគីផលិតកម្ម«ភី» ចេញបកស្រាយសុំទោស

បានផុស

៣ years មុន

នៅ

ថ្ងៃអង្គារ ២៥ កក្កដា ២០២៣

ដោយ

តារាកំប្លែង នាយតាក់ស៊ី ថ្មីៗនេះ បានបញ្ចេញប្រតិកម្មសម្ដែងការហួសចិត្ត និងទាមទារឲ្យខាងម្ចាស់ផលិតកម្ម «ភី» ចេញមុខសុំទោសជាសាធារណៈ ក្រោយផលិតកម្មមួយនេះបង្ហោះសារលក្ខណៈប្រមាថអាយុជីវិតរបស់លោក។ យ៉ាងណាមិញ បន្ទាប់ពីមានប្រតិកម្ម ទីបំផុតភាគីផលិតកម្ម«ភី» បានចេញមកបកស្រាយ និងសុំទោស នាយតាក់ស៊ី ជាសាធារណៈចំពោះកំហុសដោយអចេតនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិកម្មរបស់តារាកំប្លែង នាយតាក់ស៊ី ធ្វើឡើងស្របពេលដែលនៅលើផេកហ្វេសប៊ុករបស់ផលិតកម្ម «ភី» បានបង្ហោះរូបភាពភ្ជាប់ជាមួយសំណេរថា «លោកបានទទួលមរណភាពហើយ»។

តាមរយៈវីដេអូ Live របស់ នាយតាក់ស៊ី និងភរិយា បានលើកឡើងថា លោកពិតជាមិនសប្បាយចិត្តទេពេលឃើញម្ចាស់ផលិតកម្ម«ភី» បង្ហោះសារថា លោកបានទទួលមរណភាព។ នាយ តាក់ស៊ី បញ្ជាក់ថា នៅលើផេកហ្វេសប៊ុកផលិតកម្ម«ភី» បានបង្ហោះរឿងនេះចំនួន ២ លើក ធ្វើឲ្យមហាជនមានការភាន់ច្រឡំ ខណៈលោកមិនទាន់មានរឿងអ្វីកើតឡើងនោះឡើយ។

ក្រោយមានប្រតិកម្មពី នាយតាក់ស៊ី ភ្លាមៗនោះ ខាងភាគីផលិតកម្ម«ភី» បានចេញមកបកស្រាយ និងសុំទោសជាសាធារណៈនូវកំហុសឆ្គងដោយអចេតនារបស់ខ្លួន។

ជាក់ស្ដែងនៅលើផេកហ្វេសប៊ុកផ្លូវការរបស់ផលិតកម្ម«ភី» បានបញ្ជាក់ថា «យើងខ្ញុំជាអ្នកសិល្បៈរួមអាជីពផុសសារជួយរំលែកទុក្ខគ្រួសារបង បែរជាមានកំហុស? ខ្ញុំបានសរសេរខុស ព្រោះទូរស័ព្ទលោតហ្វុងអក្សរ តែខុសភ្លាមបានកែភ្លាមៗរួចរាល់នៅពេលនោះទៅហើយ ម៉េចក៏បានទៅជាមានការយល់ច្រឡំខុសបែបនេះ?។ ខ្ញុំបាទជាម្ចាស់ផេក ផលិតកម្ម «ភី» សុំបកស្រាយរឿងសរសេរខុសពីថ្ងៃនោះ តែក៏បានកែភ្លាមៗ ពេលដឹងថា សរសេរខុស តែអ្នកមើលហើយស្គ្រីនភ្លាម មានបំណងចោទប្រកាន់បំណងល្អពួកយើងខ្ញុំ»។

ផលិតកម្ម«ភី» ក៏បានបន្តទៀតថា «តាមពិតទៅក្នុងនាមខ្ញុំជាអ្នកសិល្បៈរួមអាជីព ពេលបានដឹងដំណឹងអ្នកសិល្បៈដូចគ្នាមានទុក្ខ ពួកយើងតែងតែព្យាយាមជួយទៅតាមអ្វីដែលអាចធ្វើទៅបានតែប៉ុណ្ណោះ មិនមានបំណងអាក្រក់ណាមួយនោះទេ សូមពុកម៉ែបងប្អូនយោគយល់ និងអធ្យាស្រ័យដល់ពួកយើងខ្ញុំផង និងជាពិសេស សូមការអធ្យាស្រ័យពីបង នាយតាក់ស៊ី ផង សូមបងកុំមានការយល់ច្រឡំ»៕

អត្ថបទ ៖ ចាន់រ៉ា