ក្រុមចោរប្រដាប់អាវុធ ចូលប្លន់ផ្ទះមិត្តស្រី Neymar នៅប្រេស៊ីល

ក្រុមចោរប្រដាប់អាវុធមានគ្នា ៣ នាក់ បានចូលប្លន់ផ្ទះរបស់ Bruna Biancardi ដែលជាមិត្តស្រីកីឡាករបាល់ទាត់ Neymar នៅទីក្រុង Sao Paulo ប្រទេសប្រេស៊ីល ។

ប៉ុន្តែ​ Bruna Biancardi និងកូនស្រី Neymar មិននៅផ្ទះទេ មានតែឪពុកម្ដាយនាងប៉ុណ្ណោះដែលនៅក្នុងហេតុការណ៍ ។ ពេលនោះក្រុមចោរបានរត់គេចខ្លួនយ៉ាងឆាប់រហ័ស ដោយសារអ្នកជិតខាងហៅសន្តិសុខមករារាំងពួកគេ ។

ពាក់ព័ន្ធនឹងបញ្ហានេះដែរ នាយកដ្ឋានសន្តិសុខសាធារណៈទីក្រុង Sao Paulo បាននិយាយថា “យោងតាមរបាយការណ៍ បុរសប្រដាប់អាវុធ ៣ នាក់ត្រូវចោទប្រកាន់ពីបទ ចូលទៅក្នុងលំនៅដ្ឋាន ហើយវាយទៅលើជនរងគ្រោះអាយុ ៥០ ឆ្នាំម្នាក់ និង ៥២ ឆ្នាំម្នាក់ ។”

នាយកដ្ឋានសន្តិសុខបន្តទៀតថា “ជនសង្ស័យបានលួចកាបូប នាឡិកា និងគ្រឿងអលង្ការទៀតផង ។ យ៉ាងណាមិញ បុរសអាយុ ២០ ឆ្នាំម្នាក់ត្រូវបានចាប់ខ្លួន ចំណែកឯជនល្មើសទីពីរត្រូវបានកំណត់អត្តសញ្ញាណរួចហើយ សម្រាប់ជនទីបីវិញក៏កំពុងព្យាយាមកំណត់អត្តសញ្ញាណដើម្បីចាប់ខ្លួនដែរ ។”

ក្រោយមក Biancardi បានបង្ហោះនៅលើ Instagram ថា នាងយកសម្ភារៈដែលចោរលួចមកវិញដោយសុវត្ថិភាព សំខាន់គ្រប់គ្នាមិនមានបញ្ហាអ្វីទេ ហើយអ្នកដែលប្រព្រឹត្តនឹងត្រូវគេចាប់ខ្លួនជាក់ជាមិនខាន ៕

ប្រែសម្រួល៖ វារី

ប្រភព៖ skynews

ចុចអាន៖ Neymar ចូលក្លិប Al-Hilal រស់នៅដូចមហាសេដ្ឋីក្នុងប្រទេសអារ៉ាប៊ីសាអ៊ូឌីត