ជីវិតកម្សាន្ដ

តារាសម្ដែងជើងចាស់ម្នាក់ជួបគ្រោះថ្នាក់ចរាចរណ៍ នៅស្រុកកំពង់ត្រឡាច ខេត្តកំពង់ឆ្នាំង

បានផុស

២ years មុន

នៅ

ថ្ងៃពុធ ១៣ មីនា ២០២៤

ដោយ

តារាសម្តែងជើងចាស់ (តួរម្តាយ) អ្នកស្រី ម៉ាក់ ចន្ធី កាលពីរសៀលថ្ងៃទី១២ ខែមីនា ឆ្នាំ២០២៤ ម្សិលមិញនេះ បានជួបគ្រោះថ្នាក់ចរាចរណ៍នៅស្រុកកំពង់ត្រឡាច ខេត្តកំពង់ឆ្នាំង ដែលបណ្តាលឲ្យរងរបួសធ្ងន់គួរសម គឺបែកមាត់ និងក្បាល ខណៈពេលនេះកំពុងចូលសង្គ្រោះនៅមន្ទីរពេទ្យកំពង់ត្រឡាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើទំព័រហ្វេសប៊ុករបស់តារាសម្តែងជើងចាស់រូបនេះ បានបង្ហោះនៅមុននេះថា «សូមក្រសួងសមាគមសិល្បៈមេត្តាជួយនាងខ្ញុំផង។ ជាអ្នកសិល្បៈល្បីក្នុងសង្គមដែរ មេត្តាជួយនាងខ្ញុំផងសូមអរគុណ»។

អ្នកស្រី ម៉ាក់ ចន្ធី បានបញ្ជាក់បន្ថែមថា រូបគាត់បានជួបគ្រោះថ្នាក់ចរាចរណ៍នៅតាមផ្លូវបណ្តាលឲ្យដួលសន្លប់ស្តូកស្តឹង និងប៉ះពាល់ដល់ផ្នែកក្បាលផងដែរ។

តារាជើងចាស់អ្នកស្រី ចន្ធី បាននិយាយទៀតថា ក្រោយជួបគ្រោះថ្នាក់នេះក៏ត្រូវបានគេជួយសង្គ្រោះដោយដឹកបញ្ជូនទៅព្យាបាលនៅមន្ទីពេទ្យបង្អែក ស្រុកកំពង់ត្រឡាច ខេត្តកំពង់ឆ្នាំង ។ ម្យ៉ាងទៀត ដោយជួបការខ្វះខាតតារាជើងចាស់រូបនេះក៏បានអំពាវនាវដល់សិល្បក-សិល្បការិនី ដែលស្គាល់ទាំងអស់មេត្តាឧបត្ថម្ភជួយដល់រូបគាត់ផង។

ចំណែកលោក ផាត់ តារារ័ត្ន ដែលជាស្ថាបនិកគ្រួសារតារាកម្ពុជាបានបញ្ជាក់ឲ្យដឹងដែរថា «អរគុណអ្នកនាង ចន ច័ន្ទ លក្ខិណា Chanlakhena Chornប្រធានសមាគមសិល្បករខ្មែរ ដែលបានជួយតារាសម្ដែង ម៉ាក់ ចន្ធី ដែលដឹកបាយក្ដាំងយកទៅឲ្យគេហើយត្រូវគេ បុកគ្រោះថ្នាក់ចរាចរ (១២-៣-២០២៤) ហើយកំពុងត្រូវគេបញ្ជូនអោយទៅសង្គ្រោះបន្ទាន់ នៅមន្ទីរពេទ្យកំពង់ត្រឡាច ខេត្តកំពង់ឆ្នាំង ចំនួន ១៥០ដុល្លារ តាមរយៈគ្រួសារតារាកម្ពុជា»។

លោក ផាត់ តារារ័ត្ន បានបន្ថែមទៀតថា ជំនួសមុខឲ្យម៉ាក់ ចន្ធី សូមអរគុណដល់លោកស្រីប្រធានជាពន់ពេក។ប្រសិនបើមហាជន ឬអ្នកគាំទ្រព្រម ទាំងអ្នកសិល្បៈរួមអាជីពចង់ចូលរួមឧបត្ថម្ភអាចទំនាក់ទំនងតាមរយៈលេខទូរស័ព្ទ: ០៧០ ៣៧ ១៤ ៩៨ ,០១២ ៨៨ ៧៧ ១៣៕

អត្ថបទ៖ ចាន់រ៉ា