ឈានដល់វ័យ ៤៣ ឆ្នាំ គ្រាន់តែប្ដូរម៉ូដសក់ថ្មី តួនាងឡាំយ៉ង ប្លែកមើលសឹងមិនស្គាល់

អតីតតួឯកស្រីក្នុងរឿង “វាសនានាងឡាំយ៉ង” បច្ចុប្ប​ន្ននេះមានអាយុ៤៣ឆ្នាំទៅហើយ ប៉ុន្តែក្រឡេកមើលទៅលើសម្រស់របស់នាងវិញ ហាក់មិនប្រែប្រួលទៅតាមវ័យទាល់តែសោះ។ ស្របពេលដែលពេលវេលាកាន់តែទៅមុខ Nune Woranuch នៅមានសម្រស់ក្មេងជាងវ័យលើសមុនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីពេលថ្មីនេះ តារាសម្ដែងវ័យ ៤៣ ឆ្នាំ បានសម្រេចប្ដូរពណ៌សក់ថ្មីស្រឡាង ដែល​នេះទស្សនិកជនស្រលាញ់ពេញចិត្តលើរូបនាងពុំធ្លាប់ឃើញរៀមច្បង​ Nune ប្រែប្រួលដល់ថ្នាកនេះទេ។ ជាពិសេសតាមរយៈរូបភាពនិងស្ទីលផ្ទាល់ខ្លួនកន្លងមករបស់នាង តែងតែបង្ហាញនូវចរិតសុភាពនិងស្រគត់ស្រគំជូនដល់ហ្វេនបានទស្សនាតែប៉ុណ្ណោះ។

យ៉ាងណាក៏ដោយ រូបភាពច្រើនសន្លឹកនៃការផ្លាស់ប្ដូរម៉ូដសក់របស់តារាស្រីពេញដោយ​ជំនាញ​ និងភាព​ប៉ិនប្រសប់ បានក្លាយជារឿងមួយដ៏គួរឲ្យភ្ញាក់ផ្អើលម្ដងទៀតសម្រាប់មហាជន រួមទាំងអ្នកគាំទ្រនាងជាច្រើនផងដែរ។ ជាមួយគ្នានោះដែរ ម្នាក់ៗ​បានបញ្ចេញ​មតិ​ក្នុងន័យសរសើរលើរូបសម្រស់នាងថា ពណ៌សក់អាចធ្វើឲ្យនាងប្លែកខ្លាំងស្មើនឹងយុវវ័យស្រករក្រោយ។ ជាពិសេស បើនាងមិនប្រាប់អាយុពិតថា៤៣ឆ្នាំ គេឯងស្មានថា Nune ទើបតែ២០ស្ដើងអីទេ។

ទោះយ៉ាងណាក៏ដោយ​ ក៏មិនមែនជារឿងចម្លែកថែមទៀត សម្រាប់តារាស្រីរៀមច្បងរូបនេះ ដែលតែងតែមានគេលើកសរសើរទាក់ទិននឹងសម្រស់លេចធ្លោខុសវ័យរបស់នាង។ ដ្បិតថាមានអាយុរាងជ្រេបន្តិចក្ដី តែ Nune នៅតែស៊ីដាច់គេរឿងសម្រស់ ហើយនៅក្នុងរឿង “ភ្លើង​ស្នេហ៍​បញ្ញើក្អែក” របស់​ស្ថានីយ​ទូរទស្សន៍​ប៉ុស្តិ៍ one31 កាលចុងឆ្នាំ២០២៣ នាងក៏បានក្លាយជាតួអង្គដ៏គួរឲ្យ​ចាប់អារម្មណ៍មួយទៀត ដែលមហាជនសាទរខ្លាំង ។ អ្វី​ដែល​សំខាន់ មិនថាសម្ដែងជាមួយតួប្រុសមានវ័យស្របាល ឬវ័យក្មេងជាងទេ នាងតែងតែក្លាយជាតួឯកស្រីដែលផលិតករខ្វះបានមិនបានឡើយក្នុវិស័យភាពយ​ន្តថៃ។

គួរបញ្ចាក់ថា Nune Woranuch បានប្រឡូកក្នុងវិស័យសិល្បៈថៃអស់រយៈពេលជាង ២៧ឆ្នាំមកហើយ ខណៈដែលនាងលេចមុខសម្តែង​រឿងភ័យ​រន្ធត់ដំបូងក្រោមចំណងជើងថា “Pob Pee Fah” សម្តែងជាតួនាងម៉ានម៉ៃ នៅប៉ុស្តិ៍លេខ៧ ក្នុងឆ្នាំ ១៩៩៧ ដែលអាចហៅថាជារឿងដំបូងដ៏អស្ចារ្យ ហើយមានមនុស្សជាច្រើនស្គាល់​នាងយ៉ាងច្បាស់។​ ក្រោយមក ដោយសារតែភាពប៉ិនប្រសព្វ និងពូកែសម្ដែងបានទាំងតួកាចនិងស្លូតព្រមគ្នា នាងក៏ទទួលបានរហស្សនាមថា តារាស្រីពហុជំនាញមកទល់សព្វថ្ងៃនេះ៕

សូមទស្សនារូបភាពខាងក្រោមនេះ៖

អត្ថបទ៖ សាង ស្រីល័ក្ខ

ចុចអាន៖តារាថៃ Chakrit ត្រូវទស្សនិកជ​នសរសើរថា ស័ក្តិសមនឹងម៉ូដ​សក់​​គ្រប់រឿង​ដែលសម្ដែង