ជីវិតកម្សាន្ដ

មិនត្រឹមកាក់កបលើអាជីពសម្ដែង Zhao Liying មានក្រុមហ៊ុនក្នុងដៃ និងលុយវាល់លានដុល្លារក្នុងវ័យ ៣៦ ឆ្នាំ

បានផុស

១ ខែ មុន

នៅ

ថ្ងៃសៅរ៍ ៣ សីហា ២០២៤

ដោយ

យោងតាមអត្ថបទមួយដែលបានចេញផ្សាយនៅដើមឆ្នាំ ២០២៤ ប្រាក់ចំណូលប្រចាំឆ្នាំរបស់ Zhao Liying នាពេលបច្ចុប្បន្ននេះ បានកើនលើសតួលេខ ៣០០ លានយន់ (ប្រហែល ៤២លានដុល្លារ) ហើយទ្រព្យសម្បត្តិសុទ្ធដែលនាងកាន់កាប់គឺជិត ៣ ពាន់លានយន់ (ប្រហែល ៤២០ លានដុល្លារ) ។ នេះជាចំនួនដ៏ច្រើនសម្រាប់តារាស្រីចិនដែលខិតខំសាងភាពល្បីល្បាញ និងជោគជ័យក្នុងអាជីពរបស់ពួកគេ។

គេដឹងថាតាំងពី២ឆ្នាំមុន តារាសម្ដែងវ័យ៣៦ឆ្នាំរូបនេះអាចទទួលបានប្រាក់ខែប្រហែល ៣០លានយន់ សម្រាប់រឿងភាគនីមួយៗ។ នាងក៏រកបាន ១០ លានយន់ ពីកិច្ចសន្យាផ្សាយពាណិជ្ជកម្មនីមួយៗ ជាមួយម៉ាកយីហោថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអត្ថបទចេញផ្សាយដោយ Sina ក្នុងឆ្នាំ ២០២២ នាងបានកាន់កាប់វីឡាថ្លៃៗចំនួន ២ នៅទីក្រុងប៉េកាំង ជាមួយនឹងតម្លៃរហូតដល់ ៣០លានដុល្លារអាមេរិក។ ជាពិសេស ផ្ទះទំហំ ៥០០ម៉ែត្រការ៉េ នៅជិតសួន Chaoyang ដែលជាសួនឧទ្យានដ៏ធំបំផុតមួយរបស់ទីក្រុងប៉េកាំង ដែលតុបតែងតាមបែបអឺរ៉ុប។

លើសពីនេះ តួឯកស្រីក្នុងរឿង “The Legend of Shen Li” ក៏បានទិញផ្ទះល្វែងដ៏ប្រណិតមួយនៅទីក្រុងសៀងហៃ ជាមួយនឹងទិដ្ឋភាពនៃប៉មទូរទស្សន៍ Oriental Pearl និងវីឡាដ៏ប្រណិតនៅទីក្រុង Hangzhou ។ បន្ទាប់មក នាង បានទិញផ្ទះវីឡាក្នុងតម្លៃ ១៤០ លានយន់ ជាអំណោយសម្រាប់កូនប្រុសជាមួយនឹងអតីតស្វាមី Feng Shaofeng។

ក្រៅពីអចលនទ្រព្យលំដាប់ខ្ពស់ Zhao Liying ក៏មានចិត្តទូលាយជាមួយសាច់ញាតិរបស់នាងដែរ។ ត្រូវបានគេដឹងថា នាងបានចំណាយលុយទិញរថយន្ត Rolls-Royce Ghost ដ៏ថ្លៃបំផុត ទុកជាកាដូថ្ងៃខួបកំណើតឪពុកបង្កើត។ ជារៀងរាល់ថ្ងៃនាងតែងតែធ្វើដំណើរជាមួយរថយន្ត Mercedes-Maybach S-Class ឬ Range Rover តែប៉ុណ្ណោះ។

ទោះយ៉ាងណា ទម្រាំតែមានលុយវាល់លានដុល្លារនៅថ្ងៃនេះ Zhao Liying ត្រូវបានគេដឹងថា នាងធ្លាប់ជួបការលំបាកក្នុងការស្វែងរកតួនាទីក្នុងនាមជាតារាសម្ដែង ប៉ុន្តែដោយសារភាពជោគជ័យនៃខ្សែភាពយន្តដែលនាងបានចូលរួមនោះ ទើបធ្វើឲ្យនាងបានបង្កើតក្រុមហ៊ុន និងការិយាល័យផ្ទាល់ខ្លួននៅក្នុងឆ្នាំ ២០១៤ នៅពេល Zhao Liying មានអាយុត្រឹមតែ ២៧ ឆ្នាំប៉ុណ្ណោះ។

មិនត្រឹមប៉ុណ្ណឹងទេ ងាកទៅកាន់មុខជំនួញផ្ទាល់ខ្លួនឯណោះ តារាស្រីសំបូរទេពកោសល្យពេញខ្លួនក៏បានមានភាពប៉ិនប្រសព្វរកលុយបានយ៉ាងក្រាស់ក្រែលផងដែរ។ យោងតាមប្រភពខ្លះ នាងបានកាន់កាប់ភាគហ៊ុន ០.៦% នៅក្នុងក្រុមហ៊ុន Straw Bear Pictures របស់តារាសម្តែង Nicky Wu ។ បន្ទាប់ពីជោគជ័យនៃស៊េរីភាពយន្តក្រោមចំណងជើងថា “The Journey of Flower” នាងក៏បានក្លាយជាម្ចាស់ភាគហ៊ុនធំជាងគេទី ១៤ របស់ Hairun Pictures Group ភ្លាមៗតែម្ដង។

លើសពីនេះ តារាស្រីរូបនេះក៏មានក្រុមហ៊ុនចំនួន ៦ក្រោមឈ្មោះរបស់នាង រួមទាំងការិយាល័យតំណាងវប្បធម៌នៅទីក្រុង Nanjing, ការិយាល័យតំណាងក្រុមហ៊ុនភាពយន្ត និងទូរទស្សន៍ Xinyi, ក្រុមហ៊ុនទទួលខុសត្រូវមានកម្រិតវប្បធម៌នៅ Jiangsu ។ ក្នុងនោះសូម្បីតែទំព័រ QQ បានបង្ហាញថែមទៀតថា Zhao Liying ក៏បានទិញភាគហ៊ុនរបស់ក្រុមហ៊ុនប្រព័ន្ធផ្សព្វផ្សាយរបស់តារាសម្ដែង Li Bingbing បន្ទាប់ពីនាងចាកចេញពីក្រុមហ៊ុនជាន់ខ្ពស់របស់នាង។

ទោះបីជាយ៉ាងណាក៏ដោយ ងាកមកកាន់ជីវិតឯកជនភាពរបស់តារាសម្ដែងរាងតូចច្រឡឹងមួយរូបនេះវិញ ថ្វីដ្បិតតែនាងកាក់កបនឹងអាជីពសម្ដែងភាពយន្តនិងមុខជំនួញមានលុយវាល់លានក្នុងដៃក៏ពិតមែន។ ប៉ុន្តែក្នុងជីវិតគ្រួសារតារាស្រីត្រកូល Zhao ពុំបានជួបគូគាប់សមដូចចិត្តប៉ងប្រថ្នាឡើយ។ តារាសម្ដែងវ័យ៣៦ឆ្នាំបានប្រកាសរៀបការជាមួយតារាសម្តែងប្រុសលោក Feng Shaofeng នៅលើ Sina Weibo នៅថ្ងៃទី ១៦ខែតុលា ឆ្នាំ២០១៨។ ក្រោយមក នៅថ្ងៃទី ០៨ ខែមីនា ឆ្នាំ ២០១៩ នាងបានផ្តល់កំណើតដល់កូនប្រុសម្នាក់។

យ៉ាងណា នៅថ្ងៃទី២៣ ខែមេសា ឆ្នាំ ២០២១ គូស្នេហ៍តារាសម្ដែងចិន ស្រាប់តែប្រកាសពីការលែងលះរបស់ពួកគេនៅលើ Sina Weibo ដដែល ដោយបញ្ចប់អាពាហ៍ពិពាហ៍រយៈពេលពីរឆ្នាំរបស់ពួកគេ ហើយចែករំលែកការមើលថែកូនប្រុសក្នុងនាមជាម្ដាយឪពុកតែប៉ុណ្ណោះ៕