ចាំអ៊ុតមើល! 2NE1 មានឪកាសមកសម្ដែងនៅស្រុកខ្មែរ

យើងដឹងស្រាប់ហើយថា កន្លងទៅនេះ CL មេក្រុមនៃ សមាជិកក្រុម 2NE1 ធ្លាប់បានមកសម្ដែងនៅស្រុកខ្មែរដល់ទៅ២លើកឯណោះ ដែលលើកទី២ កាលពីឆ្នាំ២០២២។ ជាពិសេស CL បានដើរទស្សនៈកិច្ចនៅឯវត្តភ្នំ ហើយក៏បានអ៊ុចធូប សំពះព្រះនៅក្នុងព្រះវិហារវត្តភ្នំផងដែរ។

អ្វីដែលធ្វើឲ្យអ្នកគាំទ្ររំភើបជាងគេនោះគឺ CL សន្យារថា នាងនឹងមកសម្ដែងឲ្យអ្នកគាំទ្រទស្សនាកម្សាន្ត នៅប្រទេសកម្ពុជាសារជាថ្មី នាពេលអនាគត់នេះ។ កន្លងផុតទៅអស់រយៈពេល២ឆ្នាំមក សមាជិកម្នាក់ទៀតក៏បានមកសម្ដែងនៅប្រទេសកម្ពុជាម្ដងជាលើកដំបូងគឺ Minzy ដែលជាសមាជិកពៅគេរបស់ក្រុម 2NE1។

បើទោះបីជាមកតែម្នាក់ឯងមែន ប៉ុន្ដែ Minzy បានច្រៀងចម្រៀងរបស់ក្រុម ដែលធ្វើឲ្យអ្នកគាំទ្រមានក្ដីរំភើបនឹងមានការសប្បាយរីករាយមែនទែន។ លើសពីនោះ រូបនាងក៏ទទួលបានការគាំទ្រយ៉ាងខ្លាំងក្លា មិនចាញ់ CL ប៉ុន្មាននោះទេ បើទោះបីជាឆាកតូច ហើយមិនមែនជាលក្ខណៈខនសឺតក៏ដោយ។

តាមរយៈវត្តមានរបស់សមាជិកមកកាន់ប្រទេសកម្ពុជាបាន២រូបហើយនេះ អ្នកគាំទ្រមានការសង្ឃឹមយ៉ាងខ្ពស់ផងដែរថា 2NE1 នឹងមកសម្ដែងលក្ខណៈជាក្រុមនៅពេលខាងមុខនេះ។ យ៉ាងណាមិញ នៅមានសមាជិក២រូបទៀតដែលមិនទាន់បានមកដល់ទឹកដីខ្មែរ Sandara Park និង Park Bom អាចនឹងមកជាក្រុមឬយ៉ាងណា ចាំអ៊ុតមើលទាំងអស់គ្នា៕