ជីវិតផ្លាស់ប្ដូរ ក្រោយ សុភ័ក្រ កុសុម៉ា មកធ្វើជាពិធីការិនី

សុភ័ក្រ កុសុម៉ា បានផ្លាស់ប្ដូរជីវិត១៨០ដឺក្រេ ទាំងកេរ្តិ៍ឈ្មោះ និងភាពល្បីល្បាញ ក្រោយមានឱកាសធ្វើជាពិធីការិនី បន្ទាប់ពីចំណាយពេល១០ឆ្នាំជាងលើវិស័យចម្រៀងតាំងពីក្មេងមក។

ប្រឡូកក្នុងវិស័យសិល្បៈតាំងពីអាយុ ១៣ ឆ្នាំ អ្នកនាង សុភ័ក្រ កុសុម៉ា ដែលជាតារាស្រីសម្ដីចាក់ទឹកមិនលិចរូបនេះ បានវិឌ្ឍន៍ខ្លួនគួរឲ្យកត់សម្គាល់ ដែលធ្វើឲ្យមហាជនតែងតែផ្ទុះសំណើចជាមួយភាពរួសរាយរាក់ទាក់ និងថ្វីមាត់មិនចេះរីងស្ងួតរបស់នាង។ នៅឆ្នាំ ២០១៦ អ្នកនាង សុភ័ក្រ កុសុម៉ា ទទួលបានការផ្ដល់ឱកាសពី លោក តាប៊ុយ ពិធីករកម្មវិធី “ពេញឬចិត្តអត់” ឲ្យធ្វើជាពិធីការនី ដោយត្រឹមតែមួយ Episode សោះបង្កការភ្ងាក់ផ្អើល និងផ្ទុះការគាំទ្រជាខ្លាំងដោយមិននឹកស្មានដល់។ ចាប់តាំងពីលេចមុខនៅក្នុងកម្មវិធី “ពេញឬចិត្តអត់” រួចមកសន្ទុះនៃការគាំទ្រ អ្នកនាង សុភ័ក្រ កុសុម៉ា កាន់តែល្បីសុសសាយ បានជំរុញឲ្យអ្នកនាងបង្កើតក្រុមតន្ដ្រីនៅចុងឆ្នាំ ២០១៩ ហើយលើសពីនោះ Kosama Entertainment ក៏បានទៅដោយរលូនរហូតមកដល់សព្វថ្ងៃ។

បើក្រឡេកមកមើលពីគ្រួសារវិញ តារាចម្រៀងនិងពិធីការិនីរូបនេះ តែងតែបង្ហោះវីដេអូរីករាយពីក្រុមគ្រួសារហូរហែរ ពិសេសអ្នកម្ដាយដែលក្រមិចក្រមើមចាក់សម្ដីគ្នាជាមួយកូនស្រី បង្កជាការសប្បាយរីករាយទៅដល់អ្នកគាំទ្រ។ ទន្ទឹមនឹងទទួលបានជោគជ័យលើវិថីសិល្បៈ តារាស្រអែមស្រស់ និងពូកែវោហារ បានប្រកាសចូលរោងការជាមួយបុរសសង្ហារម្នាក់ ក្រោយប្រើប្រាស់ទំនាក់ទំង private ជាមួយគ្នាអស់ពេលជាច្រើនឆ្នាំ កាលពីថ្ងៃទី ៣-៤ ខែវិច្ឆិកា ឆ្នាំ ២០២៤ ដែលមានការអញ្ជើញចូលរួមពីសំណាក់តារាល្បីជាច្រើននាក់ផងដែរ៕

អត្ថបទ៖ ផានិត