លោក លៀក លីដា បញ្ជាក់ថា ក្រុមការងារខ្លួន មានបច្ចេកទេសក្នុងការតាមចាប់អ្នកលួចថតចម្លងរឿង

ផលិតករភាពយន្តនិងជាអ្នកដឹកនាំសម្តែងលោក លៀក លីដា បានបញ្ជាក់ថា អ្នកដែលលួចថតចម្លងចេញពី screen របស់ ADC ជាប្រភពដើម គឺមានក្រុមការងារមានបច្ចេកទេសក្នុងការតាមចាប់។

ការលើកឡើងរបស់លោក លៀក លីដា នាពេលនេះ គឺបន្ទាប់ពីថ្មីៗកន្លងមក មានអ្នកលួចយកវីដេអូខ្សែភាពយន្តប្រវត្តិស្នេហ៍នាងនាថ (យុវវ័យក្រោយសម័យអង្គរ) ទៅផុស Channel You Tube របស់ខ្លួនដោយគ្មានការអនុញ្ញាតិពីក្រុមហ៊ុន។ យ៉ាងណាមិញ ក្រោយមានការចេញលិខិតព្រមានភ្លាមៗនោះ បុគ្គលខាងលើបានចេញមុខសារភាពកំហុស និងសុំទោសជាសាធារណ:ផងដែរ។

លោក លៀក លីដា បានលើកឡើងថា “តើពេលណាបងប្អូនយល់? បើយ៉ាងៗនេះ តើឱ្យខ្ញុំមានកម្លាំងឯណាទៅផលិតរឿងធំៗ សូមអ្នកផ្សេងកុំធ្វើអ៊ីចឹងទៀត យើងមានបច្ចេកទេសក្នុងការតាមចាប់អ្នកដែលលួចថតចម្លងចេញពី screen របស់ADC ជាប្រភពដើម“។

លោកបានបន្តថា “ចំណែកអ្នកដែលចែកចាយបន្ត មេត្តាឈប់ពួកយើងខាតច្រើនណាស់ ទាំងលុយទាំងកម្លាំង និងតម្លៃសិល្បៈរបស់ពួកខ្ញុំ លុយដែលបានពី View នៃមើលលើ Channel របស់អ្នក វាមិនបាន 0.01% នៃការខាតបង់របស់ផលិតករខ្មែរយើងទេ សូមចិត្តបងប្អូនរៀនយល់និងឱ្យតម្លៃដោយសុជីវធម៌៕ អត្ថបទ៖​ ចាន់រ៉ា