សាធារណជន​ ស្នើ “រួមគិត ” កុំធ្វើសកម្មភាពណាប៉ះពាល់សន្តិសុខជាតិ ពិសេសការបង្ហាញទីតាំងទ័ព ឬរូបភាពចល័តទ័ព

ស្របពេលដែលក្រសួងការពារជាតិ​ បានប្រកាសពីចេតនាមិនល្អរបស់បច្ចាមិត្ត ដែលអាចនឹងបើកការឈ្លានពានជាថ្មីរំលោភលើអធិបតេយ្យកម្ពុជា​ អ្នកផលិតមាតិកា និងសាធារណជនមួយចំនួន ចេញសារណែនាំជាបន្ទាន់ បើសិនណាជាមានឃើញការចល័តទ័ព ដាច់ខាតសុំកុំឱ្យថត POST និងចែករំលែករូបភាព ព្រោះនោះប៉ះពាល់ដល់សន្តិសុខជាតិ។ មិនតែប៉ុណ្ណោះ​ ក៏មានការស្នើឱ្យបន្តរក្សា​ស្មារតី​នឹងន ជឿទុកចិត្តលើរាជរដ្ឋាភិបាល​ កុំចលាចល។

យោងតាមសេចក្តីប្រកាសរបស់ក្រសួងការពារមុននេះ បានបញ្ជាក់ថា​ តាមព័ត៌មានដែលក្រសួងទទួលបាន នៅវេលាម៉ោង ១០:៤៩នាទី ថ្ងៃទី០៣ ខែសីហា ឆ្នាំ២០២៥ កងទ័ពថៃ បានសហការជាមួយអាជ្ញាធរថៃ ដោយបានណែនាំឱ្យប្រជាជនខ្លួនដែលនៅសេសសល់នៅតំបន់ជាប់ព្រំដែនក្នុងខេត្តសុរិន្ទ ឱ្យចេញឱ្យអស់ត្រឹមយប់នេះ។

តាមប្រភពព័ត៌មានដដែល ក៏បានបញ្ជាក់ថា កងទ័ពថៃគ្រោងនឹងបើកការវាយលុកតាមបណ្តោយព្រំដែន ចាប់តាំងពីតំបន់ប្រាសាទតាមាន់ ប្រាសាទតាក្របី ប្រាសាទព្រះវិហារ រហូតដល់​ តំបន់អានសេះ ដោយការវាយលុកនេះ អាចនឹងចាប់ផ្ដើមក្នុងពេលឆាប់ៗ មុនកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ដែលគ្រោងនៅថ្ងៃទី០៧ ខែសីហា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី។

ក្នុងកាលៈទេសៈដ៏សំខាន់នេះ​ អ្នកមានឥទ្ធិពលលើប្រព័ន្ធផ្សព្វផ្សាយ​ក៏ដូចជាសាធារណជនទូទៅ បានចេញសារដាស់តឿនគ្នា ឱ្យប្រុងប្រយ័ត្នខ្ពស់ពីការដែលអាចក្លាយជាដើមចមនៃការបែកធ្លាយអាថ៌កំបាំងទ័ព ដែលនាំឱ្យប៉ះពាល់ដល់សន្តិសុខជាតិ។​ ជាការអំពាវនាវ ប្រសិនបើឃើញមានការចល័តទ័ព​ក្នុងកាលៈទេសៈដ៏សំខាន់នេះ ដាច់ខាតកុំថត កុំផ្សព្វផ្សាយ និងកុំចែករំលែកដាច់ខាត​ ខណៈកន្លងមក សត្រូវអាចកំណត់ទីតាំងមួយចំនួនរបស់វីរៈកងជួរមុខបាន​ និងអាចស្មានដឹងពីកម្រិតអាវុធរបស់កម្ពុជាផងដែរ។

យ៉ាងណា​ ការរៀបចំផែនការវាយលុកនេះ ក្រសួងការពារជាតិបានចាត់ទុកជាការរំលោភមកលើបូរណភាពទឹកដីកម្ពុជា នៅមុនកិច្ចប្រជុំគណៈកម្មាធិការកិច្ចការព្រំដែនទូទៅ(GBC) ហើយក៏ជាការរំលោភយ៉ាងធ្ងន់ធ្ងរបំផុត នូវបទឈប់បាញ់ដែលប្រទេសទាំងពីរបានឯកភាពគ្នា កាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងកូឡាឡាំពួរ ដែលមានម៉ាឡេស៊ី សហរដ្ឋអាមេរិក និងចិនជាសាក្សី។

កម្ពុជាសូមអំពាវនាវឱ្យសហគមន៍អន្តរជាតិជួយទប់ស្កាត់ឱ្យខាងតែបាន ឱ្យភាគីថៃបញ្ឈប់ជាបន្ទាន់នូវផែនការឈ្លានពានរបស់ខ្លួនករណីព័ត៌មាននេះជាការពិត ហើយងាកមកគោរពកិច្ចព្រមព្រៀមបទឈប់បាញ់ឱ្យបានម៉ឺងម៉ាត់ ដើម្បីសន្តិភាព និងស្ថិរភាព នៅតាមតំបន់ព្រំដែននៃប្រទេសទាំងពីរផង និងតំបន់ទាំងមូលផង៕