សមាគមសិល្បករខ្មែរ ៖ សិល្បករខ្មែរជាដៃគូក្នុងការលើកស្ទួយផលិតផលជាតិ

ប្រធានសមាគមសិល្បករខ្មែរ ចាត់ទុកសិល្បករខ្មែរ មិនត្រឹមតែមានតួនាទីក្នុងវិស័យសិល្បៈកម្សាន្ត និងបង្កើតស្នាដៃសិល្បៈប៉ុណ្ណោះទេ ប៉ុន្តែពួកគាត់ក៏ជាតួអង្គសំខាន់ក្នុងការចូលរួមផ្សព្វផ្សាយ និងលើកកម្ពស់ផលិតផលជាតិខ្មែរឱ្យបានដល់សាធារណជន និងទីផ្សារផ្សេងៗផងដែរ។

តួយ៉ាង ដោយអនុវត្តតាមទស្សនទានដឹកនាំរបស់អ្នកឧកញ៉ាម៉ៅ ចំណាន គិតម៉េង ប្រធានសមាគមសិល្បករខ្មែរនិងលោកស្រីអនុប្រធាន នៅ សូនីតា បានដឹកនាំសិល្បករជាច្រើនចូលរួមគ្នាទស្សនាការតាំងពិពណ៌ផលិតផលខ្មែរដែលប្រព្រឹត្តទៅដោយជោគជ័យនិងមោទនភាព។

វត្តមានរបស់សិល្បករទាំងអស់ បានជួយរួមចំណែកផ្សព្វផ្សាយតាមរយ:ការបង្កេីតនូវមាតិការៀងៗខ្លួន ធ្វើឱ្យផលិតផលខ្មែរទទួលបាននូវការទុកចិត្តកា ន់តែច្រើនពង្រីកឱកាសប្រកួតប្រជែងនិងឈានចូលទីផ្សារអន្តរជាតិដោយឈរលេីមូលដ្ឋានគាំទ្រយ៉ាងរឹងមាំពីប្រជាពលរដ្ឋកម្ពុជា។

គួរជម្រាបថា កម្មវិធីពិព័រណ៍ផលិតផលខ្មែរក្រោមប្រធានបទ «ខ្មែរធ្វើបាន៖ ចូលរួម ជំរុញ គាំទ្រ ផលិតផលក្នុងស្រុក» ធ្វើឡើងក្នុងគោលបំណងតាំងបង្ហាញផលិតផលក្នុងស្រុក ដើម្បីចូលរួម ជំរុញ និងគាំទ្រផលិតផលក្នុងស្រុក ដែលជាកត្តាចាំបាច់ដើម្បីពង្រឹងសមត្ថភាពផលិតកម្មក្នុងស្រុក ក្នុងន័យបង្កើនឱកាសសម្រាប់ប្រជាពលរដ្ឋខ្មែរ និងជំរុញចរន្តសេដ្ឋកិច្ចជាតិ។

បន្ថែមពីនេះ ក៏ដើម្បីផ្ដល់ឱកាសដល់អាជីវករ ពាណិជ្ជករ សហគ្រិន និងក្រុមហ៊ុនក្នុងស្រុក អាចតាំងបង្ហាញ និងផ្សព្វផ្សាយផលិតផលរបស់ខ្លួន និងធ្វើអន្តរកម្មជាមួយដៃគូអាជីវកម្ម ស្របពេលដែល​ពលរដ្ឋកម្ពុជា​ស្ទើរតែទូទាំង​ប្រទេស​ បាននិងកំពុងធ្វើ​ពហិការ​លើផលិតផលនាំចូល ​ឬផលិតចេញពីប្រទេសថៃ។

ក្នុងឱកាសពិព័រណ៍ផលិតផលខ្មែរនេះដែរ មានការតាំងបង្ហាញផលិតផលចម្រុះដ៏សម្បូរបែបមកពីគ្រប់វិស័យ មិនថាភោគផលកសិកម្ម ផលិតផលឧស្សាហកម្ម ឧបករណ៍បច្ចេកវិទ្យាថ្មីៗ រួមទាំងម្ហូបអាហារដ៏មានឱជារសឈ្ងុយឆ្ងាញ់(ទាំងបែបជាតិ និងអន្តរជាតិ) ខណៈផលិតផលក្នុងស្រុក មានរហូតដល់ ២៨៣ ស្តង់។ ក្រៅពីនេះ នៅមានកម្មវិធីពិព័រណ៍ផលិតផលខ្មែរ និងមានកិច្ចពិភាក្សាចែករំលែកចំណេះដឹងលើប្រធានបទជាច្រើន ដោយមានការចូលរួមពីវាគ្មិនជាច្រើនរូបផងដែរ៕ ចាន់រ៉ា