ស្លាប់​អ្នកការទូតកាតា៣​នាក់​ក្នុងគ្រោះថ្នាក់ចរាចរណ៍ មុនពេលកិច្ចប្រជុំកំពូល​ហ្គាហ្សា​នៅ​អេហ្ស៊ីប

ប្រព័ន្ធផ្សព្វផ្សាយអេហ្ស៊ីបបានរាយការណ៍ថា អ្នកការទូតកាតា៣​នាក់បានស្លាប់ និង២នាក់ផ្សេងទៀតបានរងរបួសក្នុងគ្រោះថ្នាក់ចរាចរណ៍នា​​​ព្រឹក​ថ្ងៃអាទិត្យ​ទី​១២​​ខែ​តុលា​​នេះ​​​ក្នុង​ទីក្រុង Sharm el-Sheikh នៃ​ប្រទេស​អេហ្ស៊ីប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបទ្ទវហេតុនេះបានកើតឡើងនៅលើផ្លូវធំតភ្ជាប់​ពី​ទីក្រុង Sharm el-Sheikh និង​ទីក្រុង Taba ក្នុងតំបន់ South Sinai។ អាជ្ញាធរ​មូលដ្ឋាន​ត្រូវ​បាន​ប្រកាស​អាសន្ន​ភ្លាមៗ​បន្ទាប់​ពី​គ្រោះថ្នាក់​នេះ។ អ្នកស្លាប់ត្រូវបានបញ្ជូនទៅតម្កល់ទុកនៅមន្ទីរពេទ្យ​អន្តរជាតិ Sharm el-Sheikh ចំណែកអ្នកការទូតដែលរងរបួសត្រូវបានបញ្ជូនទៅសង្គ្រោះបន្ទាន់។ អាជ្ញាធរ​កំពុង​បើក​ការ​ស៊ើបអង្កេត​​រក​​មូលហេតុ​នៃ​គ្រោះថ្នាក់​។

គណៈប្រតិភូកាតាកំពុងស្ថិតនៅក្នុងប្រទេសអេហ្ស៊ីបមុនកិច្ចប្រជុំកំពូល​ហ្គាហ្សា​នា​ថ្ងៃចន្ទ​សប្ដាហ៍ក្រោយ ដែលនឹង​មាន​ប្រធានាធិបតីអេហ្ស៊ីប Abdel Fattah el-Sisi និងប្រធានាធិបតីអាមេរិក ដូណាល់ ត្រាំ ធ្វើ​ជា​សហ​ប្រធាន។ មេដឹកនាំ និងអ្នកតំណាងមកពីប្រទេសជាង២០​ផ្សេង​ទៀត ក៏ត្រូវបានគេរំពឹងថានឹងចូលរួមកិច្ចប្រជុំកម្រិតខ្ពស់នេះផង​ដែរ។

យោងតាមសេចក្តីថ្លែងការណ៍របស់ប្រធានាធិបតីអេហ្ស៊ីប កិច្ចប្រជុំកំពូលនេះមានគោលបំណង«បញ្ចប់សង្គ្រាមនៅតំបន់ហ្គាហ្សាស្ទ្រីប បង្កើនកិច្ចខិតខំប្រឹងប្រែងដើម្បីនាំមកនូវសន្តិភាព និងស្ថិរភាពដល់មជ្ឈិមបូព៌ា និងឈានទៅដំណាក់កាលថ្មីនៃសន្តិសុខ និងស្ថិរភាពក្នុងតំបន់»៕

ដោយ៖ ឈាង