ចំនួនអ្នកស្លាប់ដោយសារទឹកជំនន់ធ្ងន់ធ្ងរនៅម៉ិកស៊ិកកើនឡើងដល់ ៦៤នាក់

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៤ខែតុលា ទឹកជំនន់ដ៏ធ្ងន់ធ្ងរនៅប្រទេសម៉ិកស៊ិក បានសម្លាប់មនុស្សយ៉ាងហោចណាស់ ៦៤នាក់ និង ៦៥នាក់បាត់ខ្លួន បន្ទាប់ពីភ្លៀងធ្លាក់មិនឈប់ជាច្រើនថ្ងៃ។

ទឹកជំនន់យ៉ាងគំហុកបានបំផ្លាញផ្ទះប្រហែល១០ ម៉ឺនខ្នងនៅទូទាំងរដ្ឋចំនួន ៥ ជាពិសេសនៅក្នុងរដ្ឋ Veracruz, Hidalgo និង Puebla ។ នៅរដ្ឋVeracruz ដែលរងការវាយប្រហារខ្លាំងបំផុត មនុស្ស ២៩ នាក់បានស្លាប់ បន្ទាប់ពីភ្លៀងធ្លាក់ជិត ៦៣សង់ទីម៉ែត្រ ចន្លោះថ្ងៃទី ៦ និង ៩ ខែតុលា។ រដ្ឋ Hidalgo បានរាយការណ៍ថាមានមនុស្សស្លាប់ចំនួន ២១ នាក់ ហើយនៅរដ្ឋ Puebla មានអ្នកស្លាប់ ១៣ នាក់។

នៅក្នុងទីក្រុងផលិតប្រេង Poza Rica ទឹកជន់លិចលាយជាមួយនឹងប្រេង ធ្វើឱ្យផ្ទះ និងផ្លូវគ្របដណ្តប់ដោយស្នាមប្រឡាក់ខ្មៅ។ អ្នក​ស្រុក​បាន​និយាយ​ថា ពួក​គេ​មិន​ដែល​ឃើញ​ទឹក​ជំនន់​អាក្រក់​នេះ​ពី​មុន​មក​ទេ។ អ្នក​ខ្លះ​និយាយ​ថា ពួក​គេ​មាន​ពេល​តែ​ប៉ុន្មាន​នាទី​ប៉ុណ្ណោះ​ដើម្បី​រត់​ចេញ​មុន​ពេល​ទឹក​ជំនន់ហូរ​ចូលមក។

ជាការឆ្លើយតបរដ្ឋាភិបាល​ម៉ិកស៊ិក​បាន​បញ្ជូន​ទាហាន​និង​អ្នក​ជួយ​សង្គ្រោះ​ចំនួន​១ម៉ឺននាក់​ទៅ​ជួយ និងប្រើ ឧទ្ធម្ភាគចក្រ​​ដើម្បី​បញ្ជូន​អាហារ ទឹក និង​ថ្នាំ​ទៅ​ឱ្យ​សហគមន៍​ជាង ២០០ ដែល​​ត្រូវ​បាន​កាត់​ផ្តាច់​ដោយ​ទឹក​ជំនន់។ មកដល់ពេលនេះកិច្ចខិតខំប្រឹងប្រែងជួយសង្គ្រោះនៅតែដំណើរការ ខណៈដែលអាជ្ញាធរនៅតែបន្តស្វែងរកអ្នកបាត់ខ្លួន និងជួយអ្នកដែលបាត់ផ្ទះសម្បែង។

ជាមួយគ្នានេះប្រធានាធិបតី Claudia Sheinbaum បានសន្យាថារដ្ឋាភិបាលនឹងផ្តល់ធនធានគ្រប់គ្រាន់ដើម្បីជួយជនរងគ្រោះ ហើយបាននិយាយថាវាអាចចំណាយពេលច្រើនថ្ងៃដើម្បីទៅដល់តំបន់មួយចំនួន។ លោកស្រីក៏បាននិយាយផងដែរថា គ្រោះមហន្តរាយនេះបណ្តាលមកពីព្យុះចំនួនពីរគឺ ព្យុះសង្ឃរា Priscilla និងព្យុះត្រូពិច Raymond ដែលកើតចេញពីឆ្នេរសមុទ្រប៉ាស៊ីហ្វិករបស់ម៉ិកស៊ិក៕

អត្ថបទ៖ ប៊ុន សុភាព