សេតវិមានប្រកាស​ពី​កាលបរិច្ឆេទ​ជំនួបផ្ទាល់រវាង​លោកត្រាំ និង​លោកស៊ី ចំពេលមានភាពតានតឹងពាណិជ្ជកម្ម

យោង​តាម​ការ​ចុះ​ផ្សាយ​របស់​ BBC នា​ថ្ងៃ​សុក្រ​ទី​២៤​ខែតុលា​នេះ​ សេតវិមានបានបញ្ជាក់ថា ប្រធានាធិបតីអាមេរិកលោក ដូណាល់ ត្រាំ នឹងជួបជាមួយសមភាគី​ចិន​លោក ស៊ី ជីនពីង នៅក្នុងប្រទេសកូរ៉េខាងត្បូងនាថ្ងៃទី​៣០​ខែតុលា នៅខាងក្រៅកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)។

កិច្ចប្រជុំដែលត្រូវបានគ្រោងទុកជាច្រើនសប្តាហ៍ បានកើតឡើងចំពេលមានភាពតានតឹងកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងប៉េកាំង ជុំវិញការរឹតបន្តឹងពាណិជ្ជកម្ម និងបច្ចេកវិទ្យា។ វានឹងក្លាយជាការជួបមុខគ្នាលើកដំបូងរវាងមេដឹកនាំទាំងពីរ ចាប់តាំងពីការវិលត្រឡប់របស់លោកត្រាំ​មកកាន់តំណែងក្នុង​អាណត្តិ​ទី​ពីរ។

ថ្មីៗនេះ លោកត្រាំ បានគំរាមដាក់ពន្ធបន្ថែម១០០%លើទំនិញរបស់ចិន ដែលចាប់ផ្តើមនៅក្នុងខែវិច្ឆិកា បើទីក្រុងប៉េកាំង​មិនបន្ធូរបន្ថយការគ្រប់គ្រងការនាំចេញរបស់ខ្លួនលើ​ប្រភេទ​រ៉ែកម្រ។

អ្នកនាំពាក្យសេតវិមានលោកស្រី Karoline Leavitt បាននិយាយថា កិច្ចប្រជុំនឹងធ្វើឡើងនៅព្រឹកថ្ងៃព្រហស្បតិ៍​ម៉ោងក្នុងស្រុកក្នុងទីក្រុង Gyeongju ប្រទេសកូរ៉េខាងត្បូង មុនពេលលោកត្រាំ​ចាកចេញត្រឡប់​ទៅ​កាន់​ទីក្រុងវ៉ាស៊ីនតោនវិញ។

ជំនួប​នេះ គឺជាផ្នែកមួយនៃដំណើរទស្សនកិច្ច​អាស៊ីដ៏ធំទូលាយរបស់លោកត្រាំ ដែលរួមបញ្ចូលទាំងការចូលរួមក្នុងកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន) នៅប្រទេសម៉ាឡេស៊ី​នា​ថ្ងៃអាទិត្យ​សប្ដាហ៍​ក្រោយ​ផងដែរ៕

ដោយ៖ ឈាង