ភរិយាលោក Anutin សុំទោសវិញហើយ ក្រោយប្រើពាក្យសម្តីមិនសមរម្យដាក់អ្នកកាសែត

លោកស្រី Thananon Niramit ដែលជាភរិយានាយករដ្ឋមន្ត្រីថៃ Anutin Charnvirakul បានចេញសារសុំទោសវិញហើយ ក្រោយប្រើពាក្យសម្តីមិនសមរម្យដាក់អ្នកសារព័ត៌មានកាលពីថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post, ពេលលោក Anutin វិលត្រឡប់មកពីប្រទេសម៉ាឡេស៊ីវិញសម្រាប់កិច្ចប្រជុំអាស៊ាន លោកបានផ្តល់បទសម្ភាសដល់អ្នកសារព័ត៌មាននៅអាកាសយានដ្ឋាន Don Mueang ពាក់ព័ន្ធបញ្ហាជម្លោះជាមួយកម្ពុជានិងក្រុមឧក្រិដ្ឋកម្មអនឡាញ។

យ៉ាងណា ដោយសារតែមានសំណួររសើប ក្រុមអ្នកកាសែតក៏សួរដេញដោលលោក Anutin ហើយធ្វើឲ្យភរិយារបស់លោកមិនសប្បាយចិត្ត ដល់ថ្នាក់ស្តីឲ្យអ្នកកាសែតថា «ហេតុអ្វីបានជាអ្នកមានចិត្តអាក្រក់ចំពោះនាយករដ្ឋមន្ត្រីយ៉ាងនេះ? លើកក្រោយខ្ញុំនឹងចាំទុក ការសួរនេះច្រើនពេកហើយ»។

សម្តីរបស់ Thananon បង្កឲ្យមានការជជែកវែកញែកក្នុងប្រទេសថៃ ឈានដល់ការចោទប្រកាន់ថា ជំទាវវ័យ៣២ឆ្នាំរូបនេះ ពីបទគំរាមកំហែងដល់ប្រព័ន្ធផ្សព្វផ្សាយទៀតផង។

យ៉ាងណា នៅថ្ងៃសៅរ៍ លោកស្រី Thananon បានបង្ហោះសារលើ Instagram ថា លោកស្រីពិតជាគ្មានបំណងគំរាមកំហែងអ្នកយកព័ត៌មាន ឬបន្ទាបតម្លៃការងារផ្នែកប្រព័ន្ធផ្សព្វផ្សាយនោះទេ។

លោកស្រីសរសេរថា៖ «វាអាចជាការនិយាយលេងសើច ប៉ុន្តែខ្ញុំយល់ថា គេអាចមើលមកថាមិនសមរម្យឬធ្វើឲ្យមនុស្សមួយចំនួនមានអារម្មណ៍មិនល្អ។ ខ្ញុំ​​ទទួល​យក​មតិ​ប្រតិកម្មនិង​​យោបល់​ពី​អ្នក​រាល់​គ្នា ហើយ​ធានា​ថា​នឹង​គោរព​សារព័ត៌មាន​ជានិច្ច»៕

អត្ថបទ៖ សុខ សុវណ្ណ

ចុចអាន៖ អនុទីន ប្រាប់ថា រដ្ឋាភិបាលថៃ នឹងស្តាប់តាមពលរដ្ឋ រឿងបើកព្រំដែនជាមួយកម្ពុជា