រញ្ជួយដីកម្រិត៦.៣ រ៉ិចទ័រវាយប្រហារប្រទេសអាហ្វហ្គានីស្ថានសម្លាប់និងបង្ករបួសមនុស្សជាង១៥០នាក់

យោងតាមការចេញផ្សាយរបស់សារព័ត៌មាន CNA នៅព្រឹកថ្ងៃចន្ទ ទី៣ ខែវិច្ឆិកា រញ្ជួយដីដ៏ខ្លាំងក្លាកម្រិត ៦.៣ រ៉ិចទ័របានវាយប្រហារទីក្រុង Mazar-e Sharif ភាគខាងជើងប្រទេសអាហ្វហ្គានីស្ថាន សម្លាប់មនុស្សយ៉ាងតិច៧នាក់ និងរបួស់ជាង១៥០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រញ្ជួយដីនេះមានជម្រៅប្រហែល ២៨ គីឡូម៉ែត្រ និងបណ្តាលឱ្យខូចខាតយ៉ាងធ្ងន់ធ្ងរដល់អគារ រួមទាំងផ្នែកមួយនៃវិហារអ៊ីស្លាមដ៏ល្បីល្បាញនៅទីក្រុង Mazar-e Sharif ដែលមានប្រជាជនប្រហែល ៥២៣,០០០ នាក់។

មន្ទីរពេទ្យនៅក្នុងខេត្តក្បែរៗនោះបានទទួលអ្នករងរបួសរាប់សិបនាក់ ខណៈដែលក្រុមជួយសង្គ្រោះប្រញាប់ប្រញាល់ទៅជួយអ្នកជាប់នៅក្រោមគំនរបាក់បែក។ បើតាមអាជ្ញាធរអាហ្វហ្គានីស្ថាន ចំនួនអ្នកស្លាប់និងរបួសអាចនឹងមានការកើនឡើងបន្ថែមទៀត។

ទីភ្នាក់ងារវាស់ស្ទង់ភូគព្ភសាស្ត្រសហរដ្ឋអាមេរិក (USGS) ក៏បានព្រមានថាដែរ រញ្ជួយដីនេះអាចបណ្តាលឱ្យមានការបំផ្លិចបំផ្លាញធ្ងន់ធ្ងរ ហើយអាចមានជនរងគ្រោះច្រើនជាងនេះទៀត។

គួរបញ្ជាក់ថាអាហ្វហ្គានីស្ថានតែងតែប្រឈមនឹងការរញ្ជួយដីដ៏សាហាវ ពីព្រោះវាស្ថិតនៅលើបន្ទាត់ប្រេះស្រាំសំខាន់ពីរ។ ក្នុងប៉ុន្មានឆ្នាំថ្មីៗនេះ ការរញ្ជួយដីខ្លាំងៗជាច្រើនបានសម្លាប់មនុស្សរាប់ពាន់នាក់នៅទូទាំងប្រទេសអាហ្វហ្គានីស្ថាន៕

អត្ថបទ៖ ប៊ុន សុភាព