លោកអាន់វ៉ា ប្រកាសថា នឹងនៅតែបន្តសម្របសម្រួលចំពោះកិច្ចព្រមព្រៀងសន្តិភាព កម្ពុជា-ថៃ

ស្របពេលសភាពការណ៍នៅព្រំដែនកម្ពុជា-ថៃ ឡើងកម្តៅជាថ្មីក្រោយទាហានថៃដើរជាន់មីនដាច់ជើងរួចក៏យកលេសនេះប្រកាសជាឯកតោភាគីលុបចោលកិច្ចព្រមព្រៀងសន្តិភាពដែលមានប្រធានាធិបតីអាមេរិក ដូណាល់ ត្រាំ ធ្វើជាសាក្សីនិងក្រោយពេលភាគីថៃ ចោទប្រកាន់ទីក្រុងគូឡាឡាំពួ ថាចូលជ្រៀតជ្រែកក្នុងកិច្ចព្រ​មព្រៀងនេះនោះ ស្រាប់តែនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បញ្ជាក់ថា លោកនៅតែទាក់ទងជា​ប់ជានិច្ចជាមួយសមភាគីកម្ពុជានិងថៃ ហើយនឹងនៅតែសម្របសម្រួលចំពោះកិច្ចព្រមព្រៀងសន្តិភាពនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Star នៅថ្ងៃអង្គារទី១១ខែវិច្ឆិកាឆ្នាំ២០២៥ លោកអាន់វ៉ា បានប្រកាសបែបនេះដើម្បីឆ្លើយតបទៅឧត្តមសេនីយ៍ចូលនិវត្តថៃម្នាក់ដែល ចោទប្រកាន់ម៉ាឡេស៊ីថា ជាបាតដៃទី៣ និងមានភាពលម្អៀងមកខាងកម្ពុជាក្នុងកិច្ចព្រមព្រៀងចុះហត្ថលេខាជាមួយថៃ។

លោកអាន់វ៉ាលើកឡើងថា៖ «បើអ្នកសួរខ្ញុំ ខ្ញុំកំពុងតែបួងសួងសុំឲ្យបញ្ហាដោះស្រាយបាន។ ហេតុអ្វីអ្នកចង់អបអរសាទរទៅវិញ បើប្រទេសទាំងពីរបន្តប្រយុទ្ធគ្នា ឬអ្នកគ្រាន់តែចង់បង្ហាញគេឯងថា នាយករដ្ឋមន្ត្រីម៉ាឡេស៊ីបរាជ័យ? នេះគឺជាវិធីសាស្រ្តដ៏គ្រោះថ្នាក់។ ម៉ាឡេស៊ី នឹងនៅតែសម្របសម្រួលចំពោះកិច្ចព្រមព្រៀងសន្តិភាព។ សូម្បីនាយករដ្ឋមន្ត្រីថៃ ក៏មិនដែលចោទសួរអំពីតួនាទីរបស់ម៉ាឡេស៊ីផង»។

សូមជម្រាបជាថ្មី កាលពីថ្ងៃទី២៦ខែតុលា កម្ពុជា-ថៃបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងគូឡាឡាំពួ ដោយមានលោក អាន់វ៉ា និងលោក ត្រាំ ចូលរួមធ្វើជាសាក្សី។

មុននេះដែរ ពោលគឺថ្ងៃទី២៨ខែកក្កដា ប្រទេសទាំងពីរបានព្រមព្រៀងគ្នាលើបទឈប់បាញ់ដោយគ្មានលក្ខខណ្ឌ បន្ទាប់ពីភាពតានតឹងតាមព្រំដែនអស់រយៈពេលជាច្រើនសប្តាហ៍៕

អត្ថបទ៖ សុខ សុវណ្ណ

ចុចអាន៖ លោក អាន់វ៉ា អ៊ីប្រាហ៊ីម លះបង់ខ្លាំង ទម្រាំបានកិច្ចព្រមព្រៀងសន្តិភាពកម្ពុជា-ថៃ