ព័ត៌មានអន្ដរជាតិ

គណបក្សភឿថៃបង្ហាញបំណងដាក់ញត្តិដកសេចក្តីទុកចិត្តលើរដ្ឋាភិបាលអានុទីន

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

តំណាងរាស្រ្តមកពីគណបក្សភឿថៃដែលបង្កើតឡើងដោយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ បានចេញមុខប្រកាសពីការប៉ុនប៉ងដាក់ញត្តិចោទប្រកាន់នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ឲ្យមានការជជែកដេញដោលបោះឆ្នោតដកសេចក្តីទុកចិត្តពីសភាចំពោះលទ្ធភាពរំលោភអំណាច។

លោក Wisut Chainarun អនុប្រធានគណបក្សភឿថៃ។ Thai Enquirer

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយរបស់ Thai Enquirer លោក Wisut Chainarun អនុប្រធានគណបក្សភឿថៃ និងជាអតីតប្រធានរដ្ឋាភិបាល បាននិយាយថា គណបក្សភឿថៃត្រៀមខ្លួនរួចរាល់ហើយក្នុងការដាក់ញត្តិដកទំនុកចិត្តប្រឆាំងនឹងរដ្ឋាភិបាលដែលដឹកនាំដោយ លោក អានុទីន មកពីគណបក្សភូមិចៃថៃ (Bhumjaithai)។

លោក អានុទីន ឆានវីរៈគុល បានចូលកាន់តួនាទីពេញលេញនិងប្រកាសគោលនយោបាយនៅដើមខែតុលា។ បើទោះជារដ្ឋាភិបាលរបស់លោកកាន់តំណែងមិនដល់ពីរខែក៏ដោយ ក៏មន្ត្រីគណបក្សភឿថៃ ដែលក្លាយជាគណបក្សប្រឆាំង ក្រោយបាត់បង់ការកាន់អំណាចកាលពីដើមខែកញ្ញា លោក Wisut បានបញ្ជាក់ថា ការដាក់ញត្តិជជែកដេញដោលនេះជាកាតព្វកិច្ចរបស់គណបក្សប្រឆាំង។

លោក Wisut បានបន្ថែមថា គណបក្សភឿថៃ បានទទួលព័ត៌មានយ៉ាងទូលំទូលាយ ដែលចង្អុលទៅបញ្ហាធ្ងន់ធ្ងរនៅក្នុងការអនុវត្តរបស់រដ្ឋាភិបាល។ ការអនុញ្ញាតឱ្យនាយករដ្ឋមន្ត្រី អានុទីន និងគណៈរដ្ឋមន្ត្រីរបស់លោកបន្តធ្វើការងារដោយមិនមានការត្រួតពិនិត្យ អាចបំផ្លាញភាពជឿជាក់របស់ប្រទេស។ គណបក្សត្រៀមបង្ហាញការពិតដល់សាធារណជន និងរារាំងរដ្ឋាភិបាលមិនឲ្យបន្តសកម្មភាពដែលគួរឲ្យសង្ស័យ។

ឆ្លើយតបចំពោះការអះអាងរបស់បក្សប្រជាជនដែលថា រដ្ឋបាលរបស់នាយករដ្ឋមន្ត្រី អានុទីន មិនទាន់បង្កគ្រោះថ្នាក់ធ្ងន់ធ្ងរនៅឡើយ តាម Thai Enquirer លោក Wisut បាននិយាយថា វាគឺសម្រាប់គណបក្សប្រជាជនជាអ្នកវិនិច្ឆ័យ។ គណបក្សភឿថៃអាចដាក់ញត្តិដោយឯករាជ្យ ដោយមិនពឹងផ្អែកលើសំឡេងឆ្នោតរបស់បក្សប្រជាជនឡើយ។

កន្លងទៅថ្មីៗនេះ នាយករដ្ឋមន្ត្រី អានុទីន ឆានវីរៈគុល បានសារភាពថា រដ្ឋាភិបាលសំឡេងភាគតិចរបស់លោក គ្មានលទ្ធភាពការពារខ្លួនឡើយ បើមានការដាក់ញត្តិចោទប្រកាន់សម្រាប់ការបោះឆ្នោតដកសេចក្តីទុកចិត្តក្នុងសភាមែននោះ។

ទោះបីជាបែបនេះក្តី ភាពមិនចុះសម្រុងផ្នែកនយោបាយនៅក្នុងប្រទេសថៃ បានធ្វើឲ្យគណបក្សនានាធ្វើសកម្មភាពដើម្បីបង្កើនប្រជាប្រិយភាពនៅមុនបោះឆ្នោតសកលដែលគ្រោងធ្វើ់ឡើងនៅក្នុងខែមីនាឬខែមេសា ឆ្នាំ២០២៦ បន្ទាប់ពីការរំលាយសភាមុនអាណត្តិរបស់នាយករដ្ឋមន្ត្រី អានុទីន៕

រ៉ាន់ រើយ