ព័ត៌មានអន្ដរជាតិ

អ្នកស្លាប់ឡើងដល់៣០នាក់ ដោយសារការបាក់ដីនៅឥណ្ឌូណេស៊ី

បានផុស

៥ ខែ មុន

នៅ

ថ្ងៃសុក្រ ២១ វិច្ឆិកា ២០២៥

ដោយ

Chheang

យោងតាមរបាយការណ៍ទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី (BNPB) គិតត្រឹមថ្ងៃសុក្រទី២១ខែវិច្ឆិកាឆ្នាំ២០២៥ ចំនួនអ្នកស្លាប់ដោយសារការបាក់ដីនៅកោះជ្វាកណ្តាល នៃប្រទេសឥណ្ឌូណេស៊ី បានកើនឡើងដល់ ៣០នាក់ ហើយមនុស្ស២១នាក់នៅតែបាត់ខ្លួន ខណៈកិច្ចខិតខំប្រឹងប្រែងស្វែងរកនៅតែបន្ត។

*បំណាក់ដីនៅក្រុង Cilacap (រូបថត៖ Reuters)*

ភ្លៀងធ្លាក់ខ្លាំងបានបង្កឲ្យមានការបាក់ដីនៅក្រុង Cilacap កាលពីសប្តាហ៍មុន និងនៅក្រុង Banjarnegara កាលពីចុងសប្តាហ៍។ លោក Abdul Muhari អ្នកនាំពាក្យ BNPB បាននិយាយថា ក្រុង Banjarnegara នៅតែជាតំបន់រងគ្រោះធ្ងន់ធ្ងរបំផុត ដែលក្រុមអ្នកជួយសង្គ្រោះបានរកឃើញសាកសព៧នាក់បន្ថែមទៀតកាលពីថ្ងៃព្រហស្បតិ៍ ដែលនាំឲ្យចំនួនអ្នកស្លាប់ក្នុងតំបន់នោះកើនដល់១០នាក់ ខណៈ១៨នាក់ទៀតមិនទាន់ត្រូវបានរកឃើញនៅឡើយ។

ផ្ទះរាប់សិបខ្នងត្រូវបានខូចខាត ប្រជាជន៧នាក់រងរបួស និងពលរដ្ឋជាង៩០០នាក់ត្រូវបានជម្លៀសចេញពីក្រុង Banjarnegara។ លោក Muhari បាននិយាយថា អ្នកជួយសង្គ្រោះប្រហែល៧០០នាក់ រួមទាំងប៉ូលិស និងបុគ្គលិកយោធា កំពុងប្រើប្រាស់គ្រឿងចក្រឈូសឆាយ ដើម្បីសម្អាតកម្ទេចកម្ទី។

នៅឯក្រុង Cilacap សាកសព៤នាក់បន្ថែមទៀតត្រូវបានរកឃើញនៅសប្តាហ៍នេះ ដោយបង្កើនចំនួនអ្នកស្លាប់នៅទីនោះដល់២០នាក់ ខណៈ៣នាក់នៅតែបាត់ខ្លួន។ ប្រតិបត្តិការស្វែងរកត្រូវបានពន្យារទៅដល់សប្តាហ៍ក្រោយ ដោយមានប្រជាជនជិត៤០០នាក់ត្រូវបានផ្លាស់ទីលំនៅ។

យោងតាមទីភ្នាក់ងារឧតុនិយមជាតិ ក្នុងរដូវវស្សារបស់ឥណ្ឌូណេស៊ី ដែលចាប់ផ្តើមពីខែកញ្ញាដល់ខែមេសា ត្រូវបានគេរំពឹងថានឹងនាំមកនូវហានិភ័យខ្ពស់នៃទឹកជំនន់ និងភ្លៀងធ្លាក់ខ្លាំងនៅទូទាំងប្រទេស៕

ប្រែសម្រួល៖ ឈាង