អានុទីន ប្រកាសថា លោកជឿតែគ្រូពេទ្យជំនាញប៉ុណ្ណោះ រឿងតួលេខមនុស្សស្លាប់ដោយទឹកជំនន់នៅ Hat Yai

ស្របពេលមានការជជែកវែកញែកបែកផ្សែងរឿងចំនួនមនុស្សស្លាប់ដោយសារគ្រោះទឹកជំនន់នៅក្រុង Hat Yai ខេត្ត Songkhla និង ដល់ថ្នាក់ចោទរដ្ឋាភិបាលទីក្រុងបាងកក ថា លាក់បាំងតួលេខពិតទៀតនោះ ស្រាប់តែនាយករដ្ឋមន្ត្រី អានុទីន ឆានវីរៈគុល និយាយថា លោកជឿតែគ្រូពេទ្យជំនាញប៉ុណ្ណោះ រឿងតួលេខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅឯវិមានរដ្ឋាភិបាលនាថ្ងៃពុធទី៣ខែធ្នូឆ្នាំ២០២៥ លោកអានុទីន លើកឡើងថា៖ «មនុស្សគ្រប់រូបសុទ្ធតែមានក្រុមគ្រួសារ ហើយគ្មានហេតុផលអ្វីត្រូវលាក់បាំងតួលេខនោះទេ។ អ្នកស្លាប់ទាំងអស់ សុទ្ធតែមានសាច់ញាតិនិងក្រុមគ្រួសារ។ បើមានអ្នកណាម្នាក់បាត់ខ្លួនដោយគ្មានដំណឹង នោះគ្មានហេតុផលអ្វីត្រូវលាក់បាំងពួកគេឡើយ ហើយក៏គ្មានភាពចាំបាច់ដើម្បីលាក់ព័ត៌មានពីសាធារណជនដែរ។ នេះគឺជាគ្រោះមហន្តរាយធម្មជាតិ អ្វីៗត្រូវតែបង្ហាញឲ្យដឹង»។

ទាក់ទងរបាយការណ៍ដែលថាមានមនុស្សជាង ១ ០០០នាក់ស្លាប់ ដោយសារទឹកជំនន់, នាយករដ្ឋមន្ត្រីរូបនេះបញ្ជាក់ជាថ្មី លោកជឿទុកចិត្តតែលើវេជ្ជបណ្ឌិត ក្រសួងសុខាភិបាល វិទ្យាស្ថានកោសល្យវិច្ច័យ និងភ្នាក់ងាររដ្ឋាភិបាលប៉ុណ្ណោះ។

សម្តីរបស់លោកអានុទីន កើតឡើងមិនយូរប៉ុន្មានបន្ទាប់ពីក្រសួងសុខាភិបាលសាធារណៈថៃ ចេញរបាយការណ៍ថា តួលេខមនុស្សស្លាប់ក្នុងគ្រោះទឹកជំនន់ដ៏សាហាវនៅភាគខាងត្បូង បានកើនដល់១៨០នាក់ គិតត្រឹមព្រឹកថ្ងៃពុធទី៣ខែធ្នូឆ្នាំ២០២៥។

ខេត្ត Songkhla ជាកន្លែងរងគ្រោះធ្ងន់ធ្ងរជាងគេ ដោយក្នុងចំណោមមនុស្សស្លាប់ទាំងអស់ គ្រាន់តែទីនោះមានមនុស្សស្លាប់រហូតដល់១៤២នាក់ទៅហើយ។ ចំពោះមនុស្សស្លាប់ផ្សេងទៀតមានដូចជានៅខេត្ត Nakhon Si Thammarat ១០នាក់, Pattani ៩នាក់, Yala ៥នាក់, Phatthalung ៤នាក់, Narathiwat ៤នាក់, Trang ៣នាក់ និង Satun ៣នាក់៕

អត្ថបទ៖ សុខ សុវណ្ណ