ព័ត៌មានអន្ដរជាតិ

ការប្តូរអ្នកដឹកនាំរដ្ឋាភិបាលថៃក្នុងពេលដ៏ខ្លី អាចជាកត្តាមិនរៀបរយនៃព្រឹត្តិការណ៍ស៊ីហ្គេមនៅថៃ

បានផុស

៧ ខែ មុន

នៅ

ថ្ងៃសៅរ៍ ៦ ធ្នូ ២០២៥

ដោយ

ការផ្លាស់ប្តូរការដឹកនាំរដ្ឋាភិបាលពីគណបក្សភឿថៃទៅគណបក្សភូមិចៃថៃដឹកនាំដោយនាយករដ្ឋមន្ត្រី អានុទីន ឆានវីរៈគុល នៅក្នុងប្រទេសថៃ អាចជាមូលហេតុចម្បងនៃភាពអន់ថយនៃការរៀបចំព្រឹត្តិការណ៍ស៊ីហ្គេមលើកទី៣៣ ដែលប្រទេសថៃធ្វើជាម្ចាស់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសថៃតែងបង្ហាញមោទនភាពជាតិរបស់ខ្លួនតាមរយៈព្រឹត្តិការណ៍ធំៗ មានព្រឹត្តិការណ៍កីឡាស៊ីហ្គេមនេះជាដើម ដែលថៃធ្លាប់ធ្វើជាម្ចាស់ផ្ទះចំនួន៦លើកកន្លងមកចាប់តាំងពីរឆ្នាំ១៩៥៩ ដែលរៀបចំនៅទីក្រុងបាងកក។

វិបត្តិនយោបាយក្នុងប្រទេសថៃបានធ្វើឲ្យរដ្ឋាភិបាលថៃកើតចេញពីការបោះឆ្នោតកាលខៃឧសភាឆ្នាំ២០២៣ បានប្រឈមការរុះរើគណៈរដ្ឋមន្ត្រីញឹកញាប់ និងការផ្លាស់ប្តូរនាយករដ្ឋមន្ត្រីរហូតដល់ទៅ៣រូបក្នុងរយៈពេលមិនដល់៣ឆ្នាំ។

បន្ទាប់ពីការចូលកាន់តំណែងជានាយករដ្ឋមន្ត្រីប្រទេសថៃកាលពីខែកញ្ញា និងចាប់ផ្តើមអនុវត្តគោលនយោបាយរបស់រដ្ឋាភិបាលដឹកនាំដោយនាយករដ្ឋមន្ត្រី អានុទីន ឆានវីរៈគុល ដែលស្ថិតក្រោមលក្ខខណ្ឌតម្រូវឲ្យរំលាយសភាត្រឹមរយៈពេល៤ខែនោះ លោក អានុទីន បានឈឺក្បាលវិលមុខតែជាមួយការដោះស្រាយរឿងនយោបាយផ្ទៃក្នុង ជម្លោះព្រំដែនជាមួយកម្ពុជា ការចរចាពន្ធបដិការជាមួយសហរដ្ឋអាមេរិក បញ្ហាទឹកជំនន់ដែលលិចជាបន្តបន្ទាប់ និង ការវាយប្រហារផ្នែកបទល្មើសអនឡាញ ដោយគ្មានពេលគិតគួរដល់ការរៀបចំព្រឹត្តិការណ៍សម្រាប់លើកកម្ពស់មុខមាត់របស់ប្រទេសជាតិថៃដែលធ្លាប់តែល្បីល្បាញនោះឡើយ។

យោងតាមការផ្សាយរបស់កាសែត The Nation របស់ថៃ នាយកផ្នែកសិល្បៈសម្រាប់ព្រឹត្តិការណ៍បើកកីឡាស៊ីហ្គេមនៅទីក្រុងបាងកក លោក Ruangrith Suntisuk បានលាតត្រដាងជាសាធារណៈពីការដួលរលំនៃផែនការបើក និងបិទការប្រកួតកីឡាស៊ីហ្គេម ឆ្នាំ២០២៥ ដែលជាគម្រោងដែលលោក និងក្រុមតូចបានចំណាយពេលអភិវឌ្ឍន៍អស់៧ខែ ដោយគ្រាន់តែក្រុមថ្មីចូលកាន់តំណែងនៅពាក់កណ្តាលខែតុលាប៉ុណ្ណោះ។

តាមការចេញផ្សាយនោះ លោកបានបង្ហើបថា ក្រុមរបស់លោក បានចូលបំពេញតួនាទីក្នុងខែមីនា បើទោះបីជាមិនមានបទពិសោធក្នុងការធ្វើការជាមួយរដ្ឋាភិបាលកន្លងមក ហើយបានវិនិយោគថវិកាផ្ទាល់ខ្លួនដើម្បីរៀបចំពិធីតាំងពីដំបូង។ ក្នុងរយៈពេលជាច្រើនខែ ពួកគេបានបង្កើតការប្រឌិតដំណាក់កាល បង្ហាញគំនិត និងធានាការយល់ព្រមដំបូង។

លោក បានប្រាប់ប្រព័ន្ធផ្សព្វផ្សាយថៃថា ការត្រៀមរៀបចំបានដំណើរការយ៉ាងរលូនតាំងពីដំបូង ប៉ុន្តែត្រឹមខែកក្កដា ឧបសគ្គថវិកាក៏កើតមានឡើង និងបញ្ហាសន្តិសុខបន្ទាប់ពីការប៉ះទង្គិចគ្នាតាមព្រំដែនកម្ពុជា-ថៃ បានជំរុញឱ្យមានការសម្រេចផ្លាស់ប្តូរទីតាំងពីកីឡដ្ឋាន Sanam Luang ទៅកីឡដ្ឋាន Rajamangala។

ថ្វីត្បិតតែមានការខ្វះខាតនេះក៏ដោយ ក៏ក្រុមការងារនៅតែប្តេជ្ញាចិត្តក្នុងការផ្តល់នូវព្រឹត្តិការណ៍ពិសេសមួយ ដោយរៀបចំពិធីឡើងវិញ ដើម្បីឆ្លើយតបទៅនឹងបញ្ហាប្រឈមថ្មីៗ។

ទោះជាយ៉ាងណាក៏ដោយនៅក្នុងខែកញ្ញាបន្ទាប់ពីការផ្លាស់ប្តូររដ្ឋាភិបាលបញ្ហាទំនាក់ទំនងបានចាប់ផ្តើមលេចឡើង។ ក្រុមនេះប្រឈមនឹងការយឺតយ៉ាវក្នុងការទទួលបានការអនុម័ត និងពិបាកក្នុងការទទួលបានចម្លើយច្បាស់លាស់ពីអាជ្ញាធររបស់រដ្ឋាភិបាលថ្មីដឹកនាំដោយលោក អានុទីន។

កាលពីដើមខែតុលា លោក Ruangrith Suntisuk បានទទួលការហៅទូរស័ព្ទមកលោកថា មានក្រុមកីឡាស៊ីហ្គេមថ្មីបានមកដល់ដើម្បីត្រួតពិនិត្យកីឡដ្ឋាន Rajamangala ហើយពួកគេបានចាប់ផ្តើមកិច្ចប្រជុំជាមួយមន្ត្រីជាន់ខ្ពស់ដូចគ្នា។ បន្ទាប់ពីរង់ចាំពីរសប្តាហ៍ទៀតដោយគ្មានការបញ្ជាក់ ក្រុមការងារបានធ្វើការសម្រេចចិត្តដ៏លំបាកក្នុងការបញ្ឈប់ការងារ ដោយសារតែពួកគេមិនអាចទ្រាំទ្រនឹងភាពមិនច្បាស់លាស់បានទៀតទេ។

តាមរយៈការចុះផ្សាយនោះ លោក Ruangrith Suntisuk បានសម្តែងការខកចិត្តចំពោះការខកខានឱកាសបង្កើតអ្វីដែលមានអត្ថន័យ។ ថ្វីត្បិតតែមានការថយក្រោយក៏ដោយ គាត់នៅតែប្តេជ្ញាចិត្តក្នុងការប្រជែងនឹងប្រព័ន្ធដែលរារាំងការច្នៃប្រឌិត និងវឌ្ឍនភាព ដោយសង្ឃឹមថាបទពិសោធន៍នេះនឹងនាំឱ្យមានការកែលម្អនៅក្នុងគម្រោងជាតិនាពេលអនាគត។

ប្រទេសបានថ្វើជាម្ចាស់ផ្ទះក្នុងការរៀបចំព្រឹត្តិការណ៍ស៊ីហ្គេមចំនួន៦លើកកន្លងមក គឺនៅទីក្រុងបាងកកចំនួន៤លើក គឺក្នុងឆ្នាំ១៩៥៩, ១៩៦៧, ១៩៧៥, និង ១៩៨៥ ខណៈឆ្នាំ១៩៩៥ ត្រូវរៀបចំនៅខេត្តឈៀងម៉ៃ និង នៅឆ្នាំ២០០៧ ត្រូវរៀបចំនៅខេត្ត Nakhon Ratchasima។ ដោយឡែកព្រឹត្តិការណ៍ស៊ីហ្គេមឆ្នាំ២០២៥ ដែលថៃធ្វើជាម្ចាស់ផ្ទះនេះទៀត ថៃគ្រោងរៀបចំនៅទីក្រុងបាងកក ខេត្តឈុនបុរី និង ខេត្តសុងក្លា។

ប៉ុន្តែដោយខេត្តសុងក្លា រងគ្រោះដោយសារទឹកជំនន់ធ្ងន់ធ្ងរ ការប្រកួតនៅទីនោះត្រូវផ្លាស់ប្តូរទៅក្រុងបាងកកវិញ។ ការប្រកួតស៊ីហ្គេមលើកទី៣៣ នឹងច្បប់ផ្តើមពីថ្ងៃទី៩ខែធ្នូរហូតដល់ថ្ងៃទី២០ខែធ្នូ ដោយថៃនឹងបញ្ជួនអត្តពលិក (កីឡាករ) ចូលរួមជាង១៥០០នាក់ ដើម្បីធានាថា ខ្លួនឈ្មះមេដៃមាសច្រើនបំផុតពីព្រឹត្តិការណ៍ដែលខ្លួនធ្វើជាម្ចាស់ផ្ទះនេះ៕

រ៉ាន់ រើយ