មានអ្វីកើតឡើង បើសហភាពអឺរ៉ុប យកទ្រព្យសម្បត្តិ រុស្ស៊ី ដែលបង្កកមកគាំទ្រអ៊ុយក្រែន ?

ប្រសិនបើសហភាពអឺរ៉ុប (EU) បរាជ័យក្នុងការប្រើប្រាស់ទ្រព្យសម្បត្តិរុស្ស៊ីដែលត្រូវបានបង្កកដើម្បីគាំទ្រអ៊ុយក្រែន វានឹងធ្វើឲ្យខូចដល់ជំហរ និងភាពជឿជាក់របស់ប្លុកយ៉ាងធ្ងន់ធ្ងរ។ ជាក់ស្ដែង ផែនការនោះបច្ចុប្បន្ន កំពុងប្រឈមមុខនឹងឧបសគ្គយ៉ាងខ្លាំង។

មេដឹកនាំអឺរ៉ុបបានសង្ឃឹមជាយូរមកហើយថា នឹងបង្ហាញពីកម្លាំងរួមដោយផ្តល់ចំនួនទឹកប្រាក់ដ៏ច្រើនដើម្បីផ្តល់មូលនិធិដល់កិច្ចខិតខំប្រឹងប្រែងយោធារបស់អ៊ុយក្រែន និងជាចំនួនទឹកប្រាក់ដើម្បីដាក់ទីក្រុងកៀវក្នុងជំហរចរចាដ៏រឹងមាំប្រឆាំងនឹងទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងចំណុចកណ្តាលនៃផែនការនេះគឺទ្រព្យសម្បត្តិរដ្ឋរុស្ស៊ីដែលមានតម្លៃ ២៤៤ ពាន់លានដុល្លារ ត្រូវបានបង្កកនៅឯឃ្លាំងមូលបត្រអន្តរជាតិ Euroclear ក្នុងប្រទេសបែលហ្ស៊ិក។ មេដឹកនាំអឺរ៉ុបចង់ប្រើប្រាស់វាដើម្បីផ្តល់ប្រាក់កម្ចីសំណងដល់អ៊ុយក្រែន ប៉ុន្តែវិធីសាស្រ្តនៃការធ្វើដូច្នេះ កំពុងប្រឈមមុខនឹងឧបសគ្គទៅវិញ។

លោកស្រី Ursula von der Leyen ប្រធានគណៈកម្មការអឺរ៉ុបបានមានប្រសាសន៍នៅក្នុងសន្និសីទសារព័ត៌មានមួយកាលដើមខែធ្នូថា «យើងអាចបំពាក់ពួកគេនូវមធ្យោបាយដើម្បីការពារខ្លួន និងបន្តការចរចាសន្តិភាពពីជំហរដ៏រឹងមាំជាងនេះ»។

ប៉ុន្តែតាំងពីដំបូងមក អ្នកធ្វើគោលនយោបាយអឺរ៉ុបបានប្រឈមមុខនឹងការលំបាកយ៉ាងច្រើន ក្នុងការរក្សាឯកភាពនៅក្នុងប្លុក។ មុនពេលកិច្ចប្រជុំមេដឹកនាំអឺរ៉ុបនៅក្នុងខែតុលា មន្ត្រីសហភាពអឺរ៉ុបជាច្រើនមានទំនុកចិត្តថា បែលហ្ស៊ិក ដែលជាប្រទេសត្រូវបានគេស្គាល់ដោយសារជំហរប្រុងប្រយ័ត្នរបស់ខ្លួន នឹងយល់ព្រមចំពោះផែនការនេះ។

ទោះជាយ៉ាងណាក៏ដោយ មេដឹកនាំបែលហ្ស៊ិកបែរជាប្រឆាំងនឹងគំនិតនេះ។ ពួកគេខ្លាចថា ប្រសិនបើរុស្ស៊ីចាត់ទុកផែនការនេះថាជាការរឹបអូសមូលនិធិខុសច្បាប់ ហើយបានដាក់ពាក្យបណ្តឹង ពួកគេអាចប្រឈមមុខនឹងផលវិបាកផ្នែកច្បាប់។ បែលហ្ស៊ិកបានស្នើសុំឲ្យ EC ដែលជាស្ថាប័នប្រតិបត្តិរបស់ EU ផ្តល់ជម្រើសលម្អិតដើម្បីដោះស្រាយហានិភ័យផ្នែកច្បាប់ដែលអាចកើតមាន។

លើសពីនោះទៀត មន្ត្រីបែលហ្ស៊ិកបានពង្រឹងការប្រឆាំងរបស់ពួកគេបន្ថែមទៀតក្នុងរយៈពេលប៉ុន្មានសប្តាហ៍ថ្មីៗនេះ ជាពិសេសបន្ទាប់ពីការលេចធ្លាយផែនការសន្តិភាព ២៨ ចំណុចរបស់រដ្ឋបាលត្រាំដែលរួមមានបទប្បញ្ញត្តិសម្រាប់ការប្រើប្រាស់ទ្រព្យសម្បត្តិរបស់រុស្ស៊ីដែលបង្កកកន្លងមក។

នៅក្នុងផែនការរបស់សហរដ្ឋអាមេរិកបានបញ្ជាក់ថា ទ្រព្យសម្បត្តិរុស្ស៊ីដែលបង្កកចំនួន ១០០ ពាន់លានដុល្លារ នឹងត្រូវបានវិនិយោគនៅក្នុងកិច្ចខិតខំប្រឹងប្រែង ដែលដឹកនាំដោយដ្ឋអាមេរិកក្នុងការកសាងឡើងវិញ និងវិនិយោគនៅអ៊ុយក្រែន។អាមេរិកនឹងទទួលបានប្រាក់ចំណេញ ៥០% ពីការវិនិយោគនេះ។ អឺរ៉ុបនឹងចូលរួមចំណែកបន្ថែមចំនួន១០០ ពាន់លានដុល្លារ ដើម្បីបង្កើនការវិនិយោគសរុបសម្រាប់ការកសាងឡើងវិញរបស់អ៊ុយក្រែន។ ទ្រព្យសម្បត្តិរបស់រុស្ស៊ីដែលបង្កកដែលនៅសល់ នឹងត្រូវបានវិនិយោគនៅក្នុងមូលនិធិរួមគ្នារវាងអាមេរិក និងរុស្ស៊ី ដើម្បីអនុវត្តគម្រោងជាក់លាក់។

នាយករដ្ឋមន្ត្រីបែលហ្ស៊ិក Bart de Werner បានហៅផែនការរបស់សហភាពអឺរ៉ុបថាជា «កំហុសជាមូលដ្ឋាន» ហើយបានព្រមានថា វាប្រថុយនឹងការរារាំងដល់កិច្ចព្រមព្រៀងសន្តិភាព។

ដោយឡែក ក្រុមអ្នកវិភាគព្រមានបន្ថែមទៀតថា ហានិភ័យនេះធ្វើឲ្យអឺរ៉ុបមើលទៅហាក់ដូចជាខ្សោយជាងមុន កាន់តែឃ្លាតឆ្ងាយពីការចរចាសន្តិភាពរុស្ស៊ី-អ៊ុយក្រែន។ ដោយមានការគាំទ្រពីអឺរ៉ុបដែលមិនទាន់សម្រេចចិត្ត និងកញ្ចប់ជំនួយដែលមិនសូវគួរឲ្យចាប់អារម្មណ៍ អ៊ុយក្រែនអាចត្រូវបានរុញច្រានចូលទៅក្នុងជំហរចរចាកាន់តែអាក្រក់ទៅៗ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ជប៉ុន និង ចិន ចោទគ្នាទៅមក រឿងតម្រង់រ៉ាដា​តាមដានគ្នា ពេលហ្វឹកហាត់​