ព័ត៌មានជាតិ

ត្រឹមម៉ោង១០យប់នេះ នឹងដឹងថា ថៃពិតជាខ្លាំងជាងអាស៊ាន និងអាមេរិក ឬផ្ទុយពីនេះ?

បានផុស

៧ ខែ មុន

នៅ

ថ្ងៃសៅរ៍ ១៣ ធ្នូ ២០២៥

ដោយ

ក្នុងនាមប្រធានអាស៊ាន លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាស៊ីឡេស៊ី បានសម្របសម្រួលភាគីជម្លោះថៃនិងកម្ពុជា តាមរយៈការហៅទូរស័ព្ទសន្ទនាត្រីភាគីចុងក្រោយនៅរសៀលថ្ងៃទី១៣ខែធ្នូ បន្ទាប់ពីកិច្ចប្រជុំតាមទូរស័ព្ទជាមួយប្រធានាធិបតីសហរដ្ឋអាមេរិកលោកដូណាល់ ត្រាំ ប៉ុន្មានម៉ោងមុននោះ។

លោក អានុទីន ពេលដឹកនាំសង្គ្រាមជាមួយកម្ពុជា។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយការសន្ទនាតាមទូរស័ព្ទនោះ លោក អាន់វ៉ា អ៊ីប្រាហ៊ីម បានបង្ហោះសារលើបណ្តាញសង្គមហ្វេសប៊ុករបស់លោក ដោយបង្ហាញពេលវេលាជាក់លាក់នៃការចូលជាធរមាននូវបទឈប់បាញ់ត្រឹមម៉ោង១០យប់ថ្ងៃទី១៣ខែធ្នូនេះ និង វិធានការមួយចំនួនសម្រាប់តាមដានការអនុវត្តបទឈប់បាញ់ដែលជាការទាមទារចង់បាន ពីប្រធានាធិបតីសហរដ្ឋអមេរិក ប្រធានអាស៊ាន ក៏ដូចជាភាគីកម្ពុជាដែលជាភាគីរងគ្រោះពីអំពើឈ្លានពានរបស់ថៃ។

វិធានការច្បាស់លាស់ដែលនាយករដ្ឋមន្ត្រីម៉ាឡេស៊ី ក្នុងនាមប្រធានអាស៊ាន បានដាក់ចេញ រួមមានៈ ពង្រាយក្រុមអ្នកសង្កេតការណ៍អាស៊ាន (AOT) ដឹកនាំដោយកងកម្លាំងការពារជាតិម៉ាឡេស៊ី និងការដាក់ប្រព័ន្ធផ្កាយរណបដែលផ្តល់ដោយរដ្ឋាភិបាលសហរដ្ឋអាមេរិកសម្រាប់ចាប់សកម្មភាពក្នុងពេលជាមួយគ្នានេះ។

លោក អាន់វ៉ា បានស្នើឲ្យភាគីជម្លោះបញ្ឈប់រាល់ទម្រង់នៃអំពើអរិភាព និងជៀសវាងសកម្មភាពយោធាបន្ថែមទៀត រួមទាំងការប្រើប្រាស់កងកម្លាំង ឬចល័តឆ្ពោះទៅមុខនៃកងអង្គភាពប្រដាប់អាវុធ ដែលអាចនាំទៅដល់ការបរាជ័យនៃបទឈប់បាញ់ ដែលប្រធានាធិបតីសហរដ្ឋអាមេរិក លោក ដូណាល់ ត្រាំ ប្រឹងប្រែងសម្របសម្រួលចុងក្រោយនេះ។

ក្រោយពីការប្រកាសរបស់ប្រធានអាស៊ាន នៅក្នុងផ្ទៃក្នុងរបស់ប្រទេសថៃឯណោះវិញ ហាក់បានបង្ហាញការមិនពេញចិត្ត និងគ្មានឆន្ទៈក្នុងការអនុវត្តបទឈប់បាញ់នោះទេ។

នាយករដ្ឋមន្ត្រីចាំផ្ទះ លោក អានុទីន ឆានវីរៈគុល តាមរយៈការចុះផ្សាយរបស់សារព័ត៌មានថៃនានា បានបង្ហាញចេតនាមិនអនុវត្តកិច្ចព្រមព្រៀងបទឈប់បាញ់ដែលប្រធានាធិបតីសហរដ្ឋអាមេរិក លោក ដូណាល់ ត្រាំ ចេញមុខសម្របសម្រួលជាថ្មីនៅថ្ងៃទី១២ខែធ្នូនេះ។

នាយករដ្ឋមន្ត្រីថៃ លោក អានុទីន ឆានវីរៈគុល បាននិយាយថា មិនទាន់ដល់ពេលសម្រាប់ការចរចាបទឈប់បាញ់ជាមួយកម្ពុជាទេ ដោយបដិសេធការអះអាងរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានអាស៊ាន ដែលនិយាយថា បទឈប់បាញ់នឹងចូលជាធរមានចាប់ពីម៉ោង១០ ថ្ងៃទី១៣នេះ។

លោក អានុទីន បានពណ៌នាថា ការអះអាងរបស់លោក អាន់វ៉ា ជាការយល់ច្រឡំនិងជំរុញឲ្យសាធារណៈជនរង់ចាំតាមដានសេចក្តីថ្លែងការណ៍ពីខាងយោធាទៅវិញ។

ការអះអាងរបស់លោក លោក អានុទីន ក៏ហាក់ដូចជាបន្ទរនូវអ្វីដែលរដ្ឋមន្ត្រីការពារជាតិថៃ លោក Natthaphon Narkphanit បានអះអាងនៅមុននោះថា គ្មានបទឈប់បាញ់កើតឡើងទេ ក្រោយពីការបង្ហោះសាររបស់លោក អាន់វ៉ា អ៊ីប្រាហ៊ីម។

ដោយសារតែភាពក្រឡេចក្រឡុចមិនអាចទុកចិត្តបានរបស់ភាគីថៃ តាមសាររបស់នាយករដ្ឋមន្ត្រីម៉ាឡេស៊ី សហរដ្ឋអាមេរិក បានផ្តល់ឲ្យបច្ចេកវិទ្យាផ្កាយរណប សម្រាប់ការតាមដាន ត្រួតពិនិត្យមើល ការអនុវត្តបទឈប់បាញ់ដែលនឹងចាប់ផ្តើមនៅម៉ោង១០យប់នេះ។

លោក អាន់វ៉ា បានលើកឡើងថា៖«ការរកឃើញពីការត្រួតពិនិត្យផ្កាយរណប និងការអង្កេតលើទីកន្លែង នឹងត្រូវចងក្រងដោយ AOT ហើយបង្ហាញនៅក្នុងកិច្ចប្រជុំរដ្ឋមន្ត្រីការបរទេសអាស៊ាន នៅថ្ងៃអង្គារ ទី១៦ខែធ្នូ។ របាយការណ៍នេះនឹងផ្តល់នូវទិន្នន័យគោលនៃស្ថានភាព រួមទាំងជំហររបស់ភាគីទាំងពីរ ក្នុងផលប្រយោជន៍នៃគណនេយ្យភាព ការកសាងទំនុកចិត្ត និងការរក្សាសន្តិភាព និងស្ថិរភាពនៅក្នុងតំបន់»។

លោក អាន់វ៉ា បានសរសេរចុងក្រោយថា៖‍«ម៉ាឡេស៊ីនៅតែប្តេជ្ញាធ្វើការយ៉ាងជិតស្និទ្ធជាមួយដៃគូអាស៊ាន និងសហគមន៍អន្តរជាតិ ដើម្បីធានាថា ការសន្ទនា ការអត់ធ្មត់ និងការទូតមានជោគជ័យ»៕

រ៉ាន់ រើយ