ព័ត៌មានអន្ដរជាតិ

លោក ពូទីន ប្តេជ្ញាថានឹងមិនធ្វើសង្រ្គាមទៀតទេ ប្រសិនបើប្រទេសលោកខាងលិចគោរពរុស្ស៊ី

បានផុស

៤ ខែ មុន

នៅ

ថ្ងៃចន្ទ ២២ ធ្នូ ២០២៥

ដោយ

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថាខ្លួននឹងមិនបង្កសង្រ្គាមជាមួយប្រទេសណាទៀតទេ បន្ទាប់ពីប្រទេសអ៊ុយក្រែន ប្រសិនបើរុស្ស៊ីទទួលការគោរពនិងឱ្យតម្លៃពីប្រទេសលោកខាងលិច។ លោកក៏បានច្រានចោលការអះអាងដែលថាទីក្រុងមូស្គូកំពុងរៀបចំផែនការវាយប្រហារបណ្តាប្រទេសអ៊ឺរ៉ុប វាជា៖ «ហេតុផលមិនសមរម្យ»។

នៅក្នុងបទសម្ភាសន៍ជាមួយទូរទស្សន៍របស់ BBC ដែលមានរយៈពេលជិត ៤ម៉ោងកន្លះ លោកត្រូវបានសួរដោយអ្នកកាសែត Steve Rosenberg ថាតើនឹងមាន៖ «ប្រតិបត្តិការយោធាពិសេសថ្មីដែរឬទេ» ដែលសំដៅលើលោកពូទីនក្នុងការឈ្លានពានដល់ប្រទេសអ៊ុយក្រែនទាំងមូល។

លោកបានឆ្លើយតបថា៖ «វានឹងមិនមានប្រតិបត្តិការអ្វីមួយកើតឡើងនោះទេ ប្រសិនបើអ្នកគោរពប្រទេសយើង។ បើអ្នកគោរពផលប្រយោជន៍របស់យើងដូចដែលយើងតែងតែព្យាយាមគោរពអ្នកដែរនោះ»។

កាលពីដើមខែនេះ លោក ពូទីន បាននិយាយថារុស្ស៊ីគ្មានគម្រោងធ្វើសង្រ្គាមជាមួយអឺរ៉ុបទេ ប៉ុន្តែលោកបានត្រៀមខ្លួនរួចជាស្រេច «ឥឡូវនេះ» ប្រសិនបើបណ្តាប្រទេសអឺរ៉ុបចង់ធ្វើ។

ឆ្លើយតបទៅនឹងសំណួររបស់អ្នកកាសែត BBC Russia កាលពីថ្ងៃសុក្រ លោកពូទីនក៏បានបន្ថែមលក្ខខណ្ឌថានឹងមិនមានការឈ្លានពានរបស់រុស្ស៊ីលើប្រទេសណាទៀតទេ។ លោកបន្ថែមថា៖ «ប្រសិនបើអ្នកមិនបោកប្រាស់យើងដូចអ្វីដែលអ្នកបានបោកប្រាស់យើងម្តងជាមួយនឹងការពង្រីកទៅទិសខាងកើតណាតូ»។

ប៉ុន្មានម៉ោងបន្ទាប់ពីការផ្សាយតាមទូរទស្សន៍នេះ មន្ត្រីរបស់អ៊ុយក្រែនបាននិយាយថាមនុស្ស ៧នាក់បានស្លាប់ និង ១៥នាក់ផ្សេងទៀតរងរបួសនៅក្នុងការវាយប្រហារដោយមីស៊ីលរបស់រុស្ស៊ី នៅតំបន់ Odesa ភាគខាងត្បូងនៃប្រទេសអ៊ុយក្រែន។ ការឈ្លានពានរបស់រុស្ស៊ីលើអ៊ុយក្រែនបានចាប់ផ្តើមនៅក្នុងខែកុម្ភៈឆ្នាំ២០២២។

ចំណែក លោកពូទីនក៏បាននិយាយថាសេដ្ឋកិច្ចរបស់ខ្លួនកំពុងធ្លាក់ចុះ ជាមួយនឹងតម្លៃទំនិញឡើងថ្លៃ ពន្ធអាករកើនឡើងពី ២០ទៅ២២ភាគរយ កាលពីថ្ងៃទី០១ ខែមករា៕

អត្ថបទ៖ ណឺ មិនា