អាល្លឺម៉ង់ ថា ពូទីន មិនចង់ធ្វើសង្គ្រាមជាមួយ​ណាតូ​ទេ ប៉ុន្តែព្យាយាមបំបែកបំបាក់ផ្ទៃក្នុងវិញ

កាលពីដើមខែនេះ ប្រមុខណាតូលោក ម៉ាក រូតេ ព្រមានថា អង្គការសន្ធិសញ្ញាអាត្លង់ទិកខាងជើងមួយនេះ គឺជាគោលដៅទី២របស់ប្រធានាធិបតីរុស្ស៊ី វ្ល៉ាឌីមៀរ ពូទីន ដែលនឹងវាយប្រហារនាពេលខាងមុខ បន្ទាប់ពីអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា ប្រទេសអាល្លឺម៉ង់ មិនយល់ឃើញដូច្នេះឡើយ ដោយរដ្ឋមន្ត្រីការពារជាតិ Boris Pistorius ​បានបញ្ជាក់យ៉ាងច្បាស់ថា ពូទីន មិនចង់ធ្វើសង្គ្រាមជាមួយណាតូឡើយ ប៉ុន្តែពូទីន ព្យាយាមបំបែកបំបាក់ផ្ទៃក្នុងរបស់ណាតូវិញ។

ឆ្លើយប្រាប់អ្នកកាសែតជុំវិញសម្តីរបស់ប្រមុខណាតូ, លោក Pistorius និយាយក្នុងបទសម្ភាសជាមួយ ​Die Zeit ថា៖ «ខ្ញុំមិនជឿលើសេណារីយ៉ូបែបនេះទេ! បើតាមខ្ញុំស្មាន ពូទីន អត់ចង់ធ្វើសង្គ្រាមធំជាមួយណាតូឡើយ។ គាត់គ្រាន់តែចង់បំផ្លាញផ្ទៃក្នុងរបស់ណាតូប៉ុណ្ណោះ ពោលគឺបំបែកបំបាក់សាមគ្គីរបស់ណាតូនេះឯង។ ម្យ៉ាង ទីក្រុងមូស្គូ ក៏កំពុងមានយុទ្ធសាស្រ្តទាញសហរដ្ឋអាមេរិក ចេញពីអឺរ៉ុបផងដែរ»។

បើតាមការព្រមានរបស់លោករូតេកាលពីដើមខែនេះ, ប្រសិនបើរុស្ស៊ីទទួលជោគជ័យ ឬមិនអាចរារាំងនៅអ៊ុយក្រែនបានទេនោះ គោលដៅបន្ទាប់របស់លោកពូទីនអាចជាប្រទេសនៅតំបន់បាល់ទិករួមមាន អេស្តូនី ឡាតវី និងលីទុយអានី ដែលសុទ្ធសឹងជាសមាជិកណាតូ និងមានព្រំដែនជាប់រុស្ស៊ី។

លោក រូតេ ជឿថា ពូទីន ចង់ស្តារឥទ្ធិពលរបស់សហភាពសូវៀតឡើងវិញ និងចង់បំបែកបំបាក់សាមគ្គីភាពរបស់ណាតូ។

ដូច្នេះហើយ ជាការត្រៀមខ្លួន អគ្គលេខាធិការរូបនេះបានជំរុញឲ្យសមាជិកណាតូទាំងអស់ បង្កើនការចំណាយលើវិស័យការពារជាតិ ដោយមិនត្រឹមតែនៅកម្រិត ២% នៃ GDP ប៉ុណ្ណោះទេ ប៉ុន្តែអាចនឹងត្រូវដំឡើងដល់ ២.៥% ឬ ៣% ឯណោះដើម្បីទប់ទល់នឹងការគំរាមកំហែង។

មិនត្រឹមប៉ុណ្ណឹង ណាតូត្រូវបង្កើនការផលិតគ្រាប់រំសេវ និងបច្ចេកវិទ្យាយោធាឲ្យបានលឿនជាងទីក្រុងមូស្គូ និងបង្កើនវត្តមានទ័ពនៅតាមបណ្តាប្រទេសជាប់ព្រំដែនរុស្ស៊ី ដើម្បីបង្ហាញថា ណាតូត្រៀមខ្លួនជានិច្ចសម្រាប់សង្គ្រាមការពារខ្លួន៕

អត្ថបទ៖ សុខ សុវណ្ណ