ព័ត៌មានអន្ដរជាតិ

លោក អានុទីន បញ្ជាក់ រដ្ឋមន្ត្រីការពារជាតិថៃនឹងទៅចូលរួមប្រជុំ GBC នៅថ្ងៃសៅរ៍

បានផុស

៦ ខែ មុន

នៅ

ថ្ងៃសុក្រ ២៦ ធ្នូ ២០២៥

ដោយ

នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) បានបញ្ជាក់នៅថ្ងៃសុក្រនេះថា រដ្ឋមន្ត្រីការពារជាតិថៃ លោក Nattapon Nakpanich នឹងចូលរួមកិច្ចពិភាក្សាបន្តជាមួយកម្ពុជានៅថ្ងៃសៅរ៍ទី២៧ខែធ្នូនេះ ដែលអាចនាំឱ្យមានបទឈប់បាញ់មួយ ខណៈជម្លោះនៅតាមព្រំដែនរវាងប្រទេសជិតខាងអាស៊ីអាគ្នេយ៍ទាំងពីរបានបន្តរយៈពេលមួយសប្តាហ៍ទីបី។ យោងសេចក្តីរាយការណ៍របស់រ៉យទ័រ និង សារព័ត៌មានថៃ។

លោក អានុទីន ប្រកាសក្រោយប្រជុំក្រុមប្រឹក្សាសន្តិសុខជាតិ។ Thai Enquirer

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍នោះ លោក អានុទីន បាននិយាយថា ប្រសិនបើរដ្ឋមន្ត្រីក្រសួងការពារជាតិអាចចុះកិច្ចព្រមព្រៀងជាមួយសមភាគីកម្ពុជាបាននោះ ប្រទេសទាំងពីរនឹងធ្វើកិច្ចព្រមព្រៀងមួយស្របតាមកតិកាសញ្ញាកូឡាឡាំពួ ដែលបានប្រឹងប្រែងសម្របសម្រួលពីប្រធានាធិបតីសហរដ្ឋអាមេរិក លោក ដូណាល់ ត្រាំ បន្ទាប់ពីមានការប៉ះទង្គិចគ្នាកាលពីខែកក្កដាកន្លងមក។

លោក អានុទីន ឆានវីរៈគុល បានប្រាប់អ្នកយកព័ត៌មាននៅទីក្រុងបាងកក ដោយសំដៅលើកិច្ចព្រមព្រៀងដ៏មានសក្តានុពលមួយថា «អ្វីដែលសំខាន់នោះគឺថា យើងទាំងពីរ [ថៃនិងកម្ពុជា] ត្រូវតែរក្សាការសន្យាដែលថាភាគីទាំងពីរនឹងមិនគំរាមកំហែង ធ្វើឲ្យខូចមុខមាត់ និងញុះញង់ និងកាត់បន្ថយអរិភាពរវាងប្រទេសទាំងពីរ»។

សារព័ត៌មានថៃ Thai Enquirer បានស្រង់សម្តីលោក អានុទីន ដែលនិយាយថា ភាគីជម្លោះបានយល់ព្រមនឹងគ្នាឲ្យមានបទឈប់បាញ់រយៈពេល៧២ម៉ោង សម្រាប់ការតាមដានមើល ដើម្បីឈានទៅអនុវត្តកិច្ចព្រមព្រៀងពេញលេញដែលមានរួចស្រាប់ហើយ។

ការលើកឡើងរបស់នាយករដ្ឋមន្ត្រីថៃ បានកើតឡើងបន្ទាប់ពីកិច្ចប្រជុំរបស់លេខាធិការដ្ឋាន (GBC) រយៈពេល២ថ្ងៃរួចមកហើយ ដើម្បីពិភាក្សាទៅរកបទឈប់បាញ់ ដែលនាយករដ្ឋមន្ត្រីថៃ និង រដ្ឋមន្ត្រីក្រសួងការពារជារថៃ ធ្លាប់ដាក់លក្ខខណ្ឌមុនដែលគ្មានប្រសិទ្ធភាព។

ទោះបីមានការផ្សាយរបស់សារព័ត៌មានថៃ និងទីភ្នាក់ងារព័ត៌មានអន្តរជាតិបែបនេះក្តី ក៏មានទាន់ឃើញមានការលើកឡើងពីភាគីកម្ពុជានៅឡើយដែរ។

មន្ត្រីលេខាធិការដ្ឋាននៃគណៈកម្មាធិការព្រំដែនទូទៅថៃនិងកម្ពុជា បានជួបពិភាក្សាគ្នានៅច្រកព្រំដែនចាប់តាំងពីថ្ងៃពុធ ខណៈអរិភាពរវាងប្រទេសទាំងពីរបានបន្តរយៈពេល១៩ថ្ងៃ។

បទឈប់បាញ់ដែលបានចុះហត្ថលេខាកាលពីខែកក្កដា ត្រូវបានដួលរលំនៅដើមខែធ្នូនៅពេលដែល ប្រទេសថៃ បានបើកការវាយប្រហារមកលើកម្ពុជាកាលពីថ្ងៃទី៧ខែធ្នូ។

ចាប់តាំងពីជម្លោះបានចាប់ផ្តើមឡើងវិញ ទាំងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានសហគមន៍អាស៊ាន និងរដ្ឋបាលប្រធានាធិបតីសហរដ្ឋអាមេរិក ដូណាល់ ត្រាំ បានប្រឹងប្រែងតាមមធ្យោបាយការទូតម្តងហើយម្តងទៀត ដើម្បីនាំភាគីជម្លោះទៅអនុវត្តបទឈប់បាញ់ដែលបានចុះហត្ថលេចារួចហើយ ប៉ុន្តែភាគីថៃ តែងតែច្រានចោល ហើយយកលេសផ្សេងៗដើម្បីគេចវេសពីការអនុវត្តបទឈប់បាញ់ និងកិច្ចព្រមព្រៀងសន្តិភាព៕

រ៉ាន់ រើយ