ព័ត៌មានអន្ដរជាតិ

លោក ស៊ី ទទួលជួបមេដឹកនាំកូរ៉េខាងត្បូងនៅចុងសប្តាហ៍នេះ មុនបន្តដំណើរទៅតូក្យូ

បានផុស

៦ ខែ មុន

នៅ

ថ្ងៃសុក្រ ២ មករា ២០២៦

ដោយ

ប្រធានាធិបតីចិន លោក ស៊ី ជីនពីង នឹងធ្វើជាម្ចាស់ផ្ទះទទួលស្វាគមន៍ដំណើរទស្សនកិច្ចរបស់មេដឹកនាំកូរ៉េខាងត្បូងលោក Lee Jae Myung នៅថ្ងៃអាទិត្យខាងមុខនេះ ដែលបង្ហាញពីចេតនារបស់ទីក្រុងប៉េកាំងចង់ពង្រឹងទំនាក់ទំនងបន្ថែមជាមួយទីក្រុងសេអ៊ូល ចំពេលទំនាក់ទំនងរបស់ខ្លួនមានភាពតានតឹងជាមួយប្រទេសជប៉ុនជុំវិញកោះតៃវ៉ាន់ដែលជាសម្ព័ន្ធរបស់អាមេរិក។

ជំនួបរវាងប្រធានាធិបតីកូរ៉េខាងត្បូង លោក Lee Jae-Myung (ស្តាំ) និង ប្រធានាធិបតីចិន លោក ស៊ី ជីនពីង។ FB/ ប្រធានាធិបតីកូរ៉េខាងត្បូង

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានរ៉យទ័រ បានរាយការណ៍ថា ដំណើរទស្សនកិច្ចនេះគឺជាជំនួបលើកទីពីររវាងលោក ស៊ី និង លោក លី ដែលមានរយៈពេលត្រឹមតែពីរខែប៉ុណ្ណោះ ដែលជាចន្លោះពេលដ៏ខ្លីមួយ និងបង្ហាញពីចំណាប់អារម្មណ៍របស់ប្រទេសចិនក្នុងការពង្រឹងទំនាក់ទំនងជាមួយទីក្រុងសេអ៊ូល និងការជំរុញកិច្ចសហប្រតិបត្តិការសេដ្ឋកិច្ច និងទេសចរណ៍។

ទំនាក់ទំនងរវាងចិន និងជប៉ុន ស្ថិតក្នុងចំណុចដ៏ក្តៅក្នុងឆ្នាំនេះ បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បានលើកឡើងកាលពីខែវិច្ឆិកាថា ការវាយប្រហាររបស់ចិនលើកោះតៃវ៉ាន់ អាចបង្កឱ្យមានការឆ្លើយតបភ្លាមៗផ្នែកយោធាពីទីក្រុងតូក្យូ។

សម្រាប់ដំណើរទស្សនកិច្ចផ្លូវការដែលនឹងចាប់ពីថ្ងៃអាទិត្យនេះ គឺជាវិធានការដែលប្រធានាធិបតីចិនបានរំពឹងទុកក្នុងគោលបំណងធ្វើឱ្យទំនាក់ទំនងទ្វេភាគីកាន់តែស៊ីជម្រៅ ជាពិសេសមុនពេលមេដឹកនាំកូរ៉េខាងត្បូងធ្វើទស្សនកិច្ចនៅប្រទេសជប៉ុន។

រ៉យទ័រ បានដកស្រង់សម្តី លោក Kang Jun-young ដែលជាសាស្ត្រាចារ្យផ្នែកសេដ្ឋកិច្ចនយោបាយនៅសាកលវិទ្យាល័យ Hankuk នៃប្រទេសកូរ៉េខាងត្បូង បាននិយាយថា៖ «ប្រទេសចិនចង់បញ្ជាក់ពីភាពកាន់តែជិតស្និទ្ធជាមួយកូរ៉េខាងត្បូងច្រើនជាងមុនឱ្យបានច្រើនទៅទៀត» ។

លោកបន្ថែមថា៖«ប្រទេសចិនហាក់ដូចជាបានសម្រេចចិត្តជាយុទ្ធសាស្រ្តថា វាជាការប្រសើរជាងក្នុងការឱ្យលោក លី ធ្វើទស្សនកិច្ចនៅប្រទេសចិនមុនពេលដែលកូរ៉េខាងត្បូងធ្វើកិច្ចប្រជុំកំពូលជាមួយប្រទេសជប៉ុនម្តងទៀត»។

រដ្ឋបាលរបស់ លោក លី បាននិយាយថា ខ្លួនមានគោលបំណងស្តារឡើងវិញនូវទំនាក់ទំនងជាមួយទីក្រុងប៉េកាំង ដោយទទួលស្គាល់ប្រទេសចិន គឺជាដៃគូពាណិជ្ជកម្មដ៏ធំបំផុតរបស់កូរ៉េខាងត្បូង។

បច្ចុប្បន្ននេះ កូរ៉េខាងត្បូងកំពុងព្យាយាមរក្សាតុល្យភាពរវាងប្រទេសទាំងពីរ ប៉ុន្តែងាកទៅរកកិច្ចសហប្រតិបត្តិការជាមួយប្រទេសចិន ដើម្បីចៀសវាងការបង្ខំឱ្យចូលទៅក្នុងបញ្ហាណាមួយ ដែលគំរាមកំហែងដល់មហាអំណាចឧស្សាហកម្មនៅអាស៊ី។

គួរឱ្យដឹងផងដែរថា លោក លីបាននិយាយកាលពីខែធ្នូថា លោកនឹងមិនចូលជាមួយភាគីណាក្នុងជម្លោះការទូតរវាងចិន និងជប៉ុននោះទេ៕

ប្រែសម្រួល៖ ណឺ មិនា