លោកស្រី Takaichi ពិចារណារៀបចំការបោះឆ្នោតសភាមុនអាណត្តិ

នាយករដ្ឋមន្ត្រីជប៉ុន លោកស្រី Sanae Takaichi កំពុងពិចារណាអំពាវនាវឲ្យមានការបោះឆ្នោតសភាមុនអាណត្តិ នៅដើមខែកុម្ភៈខាងមុខ។ នេះបើយោងតាមការចុះផ្សាយរបស់កាសែត Yomiuri កាលពីថ្ងៃទី៩ខែមករា។

ដោយដកស្រង់ប្រភពពីរដ្ឋាភិបាល សារព័ត៌មាន Yomiuri បានបញ្ជាក់ថា វិធានការនេះត្រូវបានរៀបចំឡើងដើម្បីទាញយកប្រយោជន៍ពីសន្ទុះនៃប្រជាប្រិយភាពខ្ពស់ដែលលោកស្រីទទួលបាន ចាប់តាំងពីបានក្លាយជានាយករដ្ឋមន្ត្រីស្ត្រីដំបូងគេបង្អស់របស់ជប៉ុន កាលពីខែតុលាឆ្នាំ២០២៥។ កាលបរិច្ឆេទដែលអាចធ្វើទៅបានសម្រាប់ការបោះឆ្នោតនេះ ត្រូវបានគេរាយការណ៍ថាអាចនឹង​ប្រព្រឹត្ត​នៅថ្ងៃទី៨ ឬថ្ងៃទី១៥ ខែកុម្ភៈ។

គម្រោងនៃការបោះឆ្នោតមុនអាណត្តិបានកើតឡើង ខណៈដែលសម្ព័ន្ធភាពរដ្ឋាភិបាលរបស់លោកស្រី Takaichi ដែលរួមមានគណបក្សសេរីប្រជាធិបតេយ្យ (LDP) និងគណបក្សស្តាំនិយម Nippon Ishin no Kai កំពុងស្វែងរកការក្តោបក្តាប់សំឡេងភាគច្រើនដាច់ខាត។ នាពេលបច្ចុប្បន្ន សម្ព័ន្ធភាពនេះនៅខ្វះអាសនៈមួយចំនួនទៀតដើម្បីគ្រប់គ្រងសំឡេងភាគច្រើននៅក្នុងសភាតំណាងរាស្ត្រ ដែលបង្ខំ​ឲ្យ​រដ្ឋាភិបាលត្រូវចរចាជាមួយគណបក្សប្រឆាំង ដើម្បីអនុម័តច្បាប់សំខាន់ៗ និងកញ្ចប់ថវិកាជាតិ។ ព័ត៌មានស្តីពីលទ្ធភាពនៃការបោះឆ្នោតនេះ បានធ្វើ​ឲ្យ​តម្លៃ​ប្រាក់ដុល្លារអាមេរិកឡើងថ្លៃធៀបនឹងប្រាក់យ៉េន ដែលឆ្លុះបញ្ចាំងពីភាពរំជើបរំជួលនៃទីផ្សារចំពោះការផ្លាស់ប្តូរនយោបាយរបស់ជប៉ុន។

មូលដ្ឋានគ្រឹះនៃប្រជាប្រិយភាពរបស់លោកស្រី Takaichi និងជាប្រភពនៃជម្លោះក្នុងតំបន់ គឺជំហរមិនរុញរារបស់លោកស្រីលើបញ្ហាសន្តិសុខជាតិ។ កាលពីចុងឆ្នាំ២០២៥ លោកស្រីបានបង្ក​ឲ្យ​មានជម្លោះការទូតដ៏ធំមួយ ដោយបានលើកឡើងថា ការវាយប្រហារយោធារបស់ចិនលើកោះតៃវ៉ាន់ អាចត្រូវបានចាត់ទុកថាជា «ការគំរាមកំហែងដល់អត្ថិភាព» របស់ប្រទេសជប៉ុន ដែលអាចនាំ​ឲ្យមានការឆ្លើយតបផ្នែកយោធាដោយស្របច្បាប់។ ប្រទេសចិន ដែលចាត់ទុកតៃវ៉ាន់ជាខេត្តមួយដែលចង់បំបែកខ្លួន បានឆ្លើយតបវិញតាមរយៈវិធានការសងសឹកជាបន្តបន្ទាប់ រួមមានការព្រមានពលរដ្ឋខ្លួនមិន​ឲ្យធ្វើដំណើរទៅជប៉ុន ការលុបចោលកិច្ចប្រជុំការទូតកម្រិតខ្ពស់ និងការហាមឃាត់ការនាំចេញបច្ចេកវិទ្យាដែលប្រើប្រាស់បានទាំងវិស័យស៊ីវិលនិងយោធាទៅកាន់ប្រទេសជប៉ុន។

ទោះបីជាសុន្ទរកថាដ៏ម៉ឺងម៉ាត់របស់លោកស្រី Takaichi បានពង្រឹងការគាំទ្រក្នុងចំណោមអ្នកបោះឆ្នោតអភិរក្សនិយមក្នុងស្រុកក៏ដោយ ប៉ុន្តែវាបាននាំ​ឲ្យទំនាក់ទំនងរវាងជប៉ុននិងចិនធ្លាក់ចុះដល់កម្រិតទាបបំផុតក្នុងរយៈពេលជាងមួយទសវត្សរ៍។ អ្នកវិភាគយល់ឃើញថា ជ័យជម្នះក្នុងការបោះឆ្នោតនឹងផ្តល់អាណត្តិក្នុងស្រុកកាន់តែរឹងមាំដល់លោកស្រី Takaichi ដើម្បីបន្តរបៀបវារៈ «ស្ត្រីបេះដូង​ដែក» ក្នុងការបង្កើនការចំណាយលើវិស័យការពារជាតិ និងសន្តិសុខសេដ្ឋកិច្ច បើទោះបីជាទីក្រុងប៉េកាំងបង្កើនសម្ពាធសេដ្ឋកិច្ច និងការទូតលើទីក្រុងតូក្យូក៏ដោយ៕

ប្រែសម្រួល៖ ឈាង