ពលករជាង៤០លាននាក់នៅ​ថៃ កំពុងប្រឈមហានិភ័យ និង​មាន​ប្រាក់ឈ្នួល​ទាប

ក្រុមអ្នកសិក្សាស្រាវជ្រាវ សកម្មជន និងអង្គការសង្គមស៊ីវិល បានអំពាវនាវ​ឲ្យ​មានកំណែទម្រង់គោលនយោបាយជាបន្ទាន់ ដើម្បីការពារពលករជាង​៤០លាននាក់នៅក្នុងប្រទេសថៃ ដែលកំពុងជាប់គាំងក្នុងការងារដែលមានប្រាក់ឈ្នួលទាប ប្រកបដោយគ្រោះថ្នាក់ និងខ្វះការគាំពារសង្គមគ្រប់គ្រាន់។

​ចេញ​ផ្សាយ​នា​ថ្ងៃ​ទី​១៩​ខែ​មករា​ឆ្នាំ​២០២៦ កាសែត​បាងកកប៉ុស្តិ៍ បាន​ឲ្យ​ដឹង​ថា ក្នុងវេទិកាសិក្សាស្រាវជ្រាវមួយនៅសាកលវិទ្យាល័យ Thammasat ក្រុមអ្នកការពារសិទ្ធិ​ជា​ច្រើន​បានជំរុញ​ឲ្យ​គណបក្សនយោបាយនានា ផ្តល់អាទិភាពខ្ពស់ដល់សិទ្ធិការងារ និងសុខភាព មុនការបោះឆ្នោតសកលខាងមុខ ដោយព្រមានថា ច្បាប់បច្ចុប្បន្នមិនទាន់អាចដើរទាន់ការផ្លាស់ប្តូរសេដ្ឋកិច្ច និងបច្ចេកវិទ្យាទំនើបនោះទេ។

ទិន្នន័យដែលបង្ហាញដោយមូលនិធិលើកកម្ពស់សុខភាពថៃ (ThaiHealth) បានគូសបញ្ជាក់ពីវិបត្តិប្រជាសាស្ត្រដែលកំពុងខិតជិតមកដល់ ដោយកត់សម្គាល់ថា កម្លាំងពលកម្មរបស់ប្រទេសថៃកំពុងមានវ័យចំណាស់យ៉ាងឆាប់រហ័ស។ ជាមួយនឹងចំនួនមនុស្សចាស់ដែលត្រូវបានគេរំពឹងថានឹងកើនឡើង៣២%​ក្នុងរយៈពេល​២០​ឆ្នាំខាងមុខ មន្ត្រីបានចង្អុលបង្ហាញថា ច្រើនជាង​២០%​នៃពលករក្នុងប្រព័ន្ធក្រៅផ្លូវការ មានអាយុចាប់ពី​៦០ឆ្នាំឡើង​រួចទៅហើយ។ ការផ្លាស់ប្តូរប្រជាសាស្ត្រនេះ រួមផ្សំនឹងការខ្វះខាតការការពារផ្នែកច្បាប់សម្រាប់ទម្រង់ការងារថ្មីៗ បានធ្វើឲ្យប្រជាជនមួយផ្នែកធំងាយរងគ្រោះដោយសារអសន្តិសុខហិរញ្ញវត្ថុ និងការបាត់បង់អំណាចក្នុងការចរចា។

ដើម្បីដោះស្រាយបញ្ហាជាប្រព័ន្ធទាំងនេះ ThaiHealth និងអង្គការដៃគូជាង៥០ បានស្នើឡើងនូវក្របខ័ណ្ឌកំណែទម្រង់ចំនួន​៤ចំណុច។ សំណើនោះរួមមាន ការកំណត់និយមន័យផ្លូវច្បាប់នៃពាក្យ«និយោជិត»ឡើងវិញ ដើម្បីគ្របដណ្តប់លើទម្រង់ការងារសម័យទំនើប ការរៀបចំអត្ថប្រយោជន៍ឲ្យស្របតាមលក្ខខណ្ឌការងារជាក់ស្តែង ការពង្រឹងការលើកកម្ពស់សុខភាព និងការគាំទ្រដល់អ្នកដែលចង់បន្តជីវិតការងារដោយស្ម័គ្រចិត្ត។ ក្រុមអ្នកការពារសិទ្ធិបានសង្កត់ធ្ងន់ថា វិធានការទាំងនេះគឺចាំបាច់ណាស់ ដើម្បីធានាបាននូវស្ថិរភាពប្រាក់ចំណូល និងសុវត្ថិភាពសម្រាប់ពលករគ្រប់វ័យ នៅក្នុងបរិបទនៃសេដ្ឋកិច្ចសកលដែលកំពុងផ្លាស់ប្តូរ៕

ប្រែសម្រួល៖ ឈាង