មនុស្សស្លាប់កើនដល់ ៣៩នាក់ ក្នុងសោកនាដកម្ម រថភ្លើងបុកគ្នានៅអេស្ប៉ាញ

គិតត្រឹមម៉ោង២រសៀលថ្ងៃចន្ទទី១៩ខែមករាឆ្នាំ២០២៦ (ពេលវេលានៅកម្ពុជា), តួលេខមនុស្សស្លាប់ក្នុងសោកនាដកម្មរថភ្លើងល្បឿនលឿនបុកគ្នានៅប្រទេសអេស្ប៉ាញ បានកើនដល់៣៩នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC, ហេតុការណ៍ដ៏រន្ធត់នេះកើតឡើង នៅក្បែរតំបន់ Adamuz នៃទីក្រុង Cordoba ភាគខាងត្បូងប្រទេសអេស្ប៉ាញ។

ក្រុមហ៊ុនគ្រប់គ្រងផ្លូវដែក Adif បានឲ្យដឹងថា រថភ្លើងមួយគ្រឿងជារបស់ក្រុមហ៊ុន Iryo បានធ្វើដំណើរចេញពីទីក្រុង Málaga ឆ្ពោះទៅ Madrid បានបើកធ្លាក់ផ្លូវ រួចក៏ចូលទៅគន្លងរបស់រថភ្លើងមួយទៀត ​ជារបស់ក្រុមហ៊ុន Renfe ដែលបើកមកក្នុងទិសដៅបញ្ច្រាស់គ្នា បណ្តាលឲ្យបុកគ្នាពេញទំហឹងតែម្តង។

ក្រុមមន្ត្រីបានឲ្យដឹងថា​ ក្រៅពីមនុស្សស្លាប់ នៅមានមនុស្ស១០០នាក់ទៀតត្រូវរងរបួសក្នុងហេតុការណ៍នេះ ក្នុងនោះមាន៧៥នាក់ ត្រូវបញ្ជូនទៅកាន់មន្ទីរពេទ្យ។

ក្រុមសង្គ្រោះបានជួបឧបសគ្គក្នុងការទាញយកអ្នកជាប់ក្នុងទូរថភ្លើងចេញមកក្រៅ ព្រោះតែបំណែករថភ្លើង ខណៈអាជ្ញាធរនៅតែកំពុងធ្វើការស៊ើបអង្កេតជាបន្តទៀត ដើម្បីរកព័ត៌មានបន្ថែមអំពីសោកនាដកម្មនេះ៕

អត្ថបទ៖ សុខ សុវណ្ណ