ព័ត៌មានអន្ដរជាតិ

ម៉ិកស៊ិក បញ្ជូនក្រុមឧក្រិដ្ឋជនគ្រឿងញៀន ៣៧នាក់ទៅអាមេរិក ចំពេលលោកត្រាំដាក់សម្ពាធ

បានផុស

៤ ខែ មុន

នៅ

ថ្ងៃពុធ ២១ មករា ២០២៦

ដោយ

យោងតាមព័ត៌មានពីរដ្ឋមន្ត្រីក្រសួងសន្តិសុខម៉ិកស៊ិក កាលពីថ្ងៃទី ២០ ខែមករា ខ្លួនបានបញ្ជូនជនសង្ស័យចំនួន ៣៧ នាក់បន្ថែមទៀត ដែលរងការចោទប្រកាន់ថា មានទំនាក់ទំនងជាមួយអង្គការឧក្រិដ្ឋកម្មគ្រឿងញៀន ទៅកាន់សហរដ្ឋអាមេរិក ចំពេលមានភាពតានតឹងកាន់តែខ្លាំងឡើងជាមួយទីក្រុងវ៉ាស៊ីនតោន និងការគំរាមកំហែងម្តងហើយម្តងទៀតដោយប្រធានាធិបតី លោក ដូណាល់ ត្រាំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters អ្នកដែលត្រូវធ្វើបត្យាប័ននៅពេលនេះ ត្រូវបានសហរដ្ឋអាមេរិកចោទពីបទពាក់ព័ន្ធនឹងអង្គភាពឧក្រិដ្ឋកម្ម ហើយវាយតម្លៃថា ពួកគេបង្កហានិភ័យដល់សុវត្ថិភាពសាធារណៈ។ រដ្ឋមន្ត្រីក្រសួងសន្តិសុខម៉ិកស៊ិក Omar Garcia Harfuch បាននិយាយថា ក្រុមមនុស្សនេះតំណាងឲ្យការគំរាមកំហែងដល់សន្តិសុខជាតិរបស់ម៉ិកស៊ិក។

ក្រុមអ្នកទោសទាំងនោះ បាននាំទៅកាន់ទីតាំងជាច្រើននៅសហរដ្ឋអាមេរិក រួមទាំងទីក្រុងវ៉ាស៊ីនតោន ហ៊ូស្តុន ញូវយ៉ក រដ្ឋ Pennsylvania សាន់អាន់តូនីញ៉ូ និងសាន់ឌីអាហ្គោ ដោយយន្តហោះកងកម្លាំងប្រដាប់អាវុធម៉ិកស៊ិកចំនួន ៧ គ្រឿង។ ក្នុងចំណោមពួកគេមានលោក Pedro Inzunza Noriega ជាឪពុករបស់ឥស្សរជនលេខពីរនៅក្នុងក្រុមចោរប្លន់ Beltran Leyva។ ដូច្នេះ លោក Noriega បានចាប់ខ្លួនបន្ទាប់ពីអាមេរិកដាក់ឈ្មោះក្នុងការចោទប្រកាន់ភេរវកម្មលើកដំបូងប្រឆាំងនឹងអ្នកជួញដូរគ្រឿងញៀនម៉ិកស៊ិកម្នាក់។

សកម្មភាពធ្វើបត្យាប័នកើតឡើងនៅក្នុងបរិបទនៃភាពតានតឹងកាន់តែខ្លាំងឡើងរវាងម៉ិកស៊ិក និងសហរដ្ឋអាមេរិកទាក់ទងនឹងសកម្មភាពរបស់ក្រុមជួញដូរគ្រឿងញៀន។ លោកត្រាំបានគំរាមកំហែងម្តងហើយម្តងទៀតថា នឹងវាយប្រហារអង្គភាពទាំងនេះ ទោះបីជាគ្មានការចូលរួមពីភាគីម៉ិកស៊ិកក៏ដោយ។ សម្ពាធកើនឡើងក៏ត្រូវបានឆ្លុះបញ្ចាំងនៅក្នុងសំណើដើម្បីដាក់ពង្រាយកងកម្លាំងយោធាអាមេរិកនៅលើទឹកដីម៉ិកស៊ិក ដើម្បីទប់ទល់នឹងក្រុមជួញដូរគ្រឿងញៀន។

ទោះជាយ៉ាងនេះក្ដី សមាជិកព្រឹទ្ធសភា និងអ្នកជំនាញផ្នែកច្បាប់មួយចំនួនក្នុងប្រទេសម៉ិកស៊ិក បានសួរអំពីមូលដ្ឋានច្បាប់ និងហេតុផលនយោបាយសម្រាប់ការផ្ទេរអ្នកទោស។ ប៉ុន្តែប្រធានាធិបតីម៉ិកស៊ិក Claudia Sheinbaum បានច្រានចោលការធ្វើអន្តរាគមន៍យោធារបស់អាមេរិក ដើម្បីប្រយុទ្ធប្រឆាំងនឹងក្រុមជួញដូរគ្រឿងញៀន បន្ទាប់ពីលោកស្រីបានហៅការសន្ទនាដ៏ល្អជាមួយលោកត្រាំ កាលពីថ្ងៃទី១២ ខែមករា៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖