បារាំងស្នើ​ឲ្យ​មានសមយុទ្ធយោធាណាតូ លើកោះ Greenland ចំពេលមានសម្ពាធខ្លាំងពីលោកត្រាំ

ការិយាល័យរបស់ប្រធានាធិបតី Emmanuel Macron បាន​ប្រកាស​​នា​ថ្ងៃពុធ​ទី​២១​ខែ​មករា​ឆ្នាំ​២០២​៦​នេះ​ថា ប្រទេសបារាំងបានស្នើ​ឲ្យ​មានសមយុទ្ធយោធារបស់អង្គការណាតូនៅ​លើ​កោះ Greenland ហើយត្រៀមខ្លួនរួចជាស្រេចក្នុងការបញ្ជូនកងកម្លាំងចូលរួម ខណៈដែលភាពតានតឹងបានកើនឡើងជុំវិញការជំរុញរបស់ប្រធានាធិបតីអាមេរិក ដូណាល់ ត្រាំ ក្នុងការចង់បានទឹកដីតំបន់អាក់ទិកមួយនេះ។

យោង​តាម​​រ៉យទ័រ សំណើនេះធ្វើឡើងខណៈដែលលោកត្រាំ​​កំពុងធ្វើដំណើរទៅកាន់វេទិកាសេដ្ឋកិច្ចពិភពលោក ក្នុងទីក្រុង Davos ដែលនៅទីនោះ លោកត្រូវបានគេរំពឹងថានឹងបង្កើនការអំពាវនាវ​ឲ្យ​អាមេរិកគ្រប់គ្រងកោះ Greenland ទោះបីជាមានការជំទាស់ពីសម្ព័ន្ធមិត្តអឺរ៉ុបក៏ដោយ ដែលនេះកំពុងធ្វើ​ឲ្យ​ទំនាក់ទំនងឆ្លងមហាសមុទ្រអាត្លង់ទិកកាន់តែមានភាពរកាំរកូសខ្លាំងឡើង។

ថ្លែងនៅក្នុងទីក្រុង Davos កាលពីថ្ងៃអង្គារ លោក Macron បាន​លើក​ឡើង​ថា អឺរ៉ុបនឹងមិន «ចុះចាញ់នឹងអ្នកដែលប្រើអំណាចគំរាមកំហែងនោះទេ» ដោយលោកបានរិះគន់ការគំរាមកំហែងរបស់លោកត្រាំ ក្នុងការដំឡើងពន្ធគយ​ឲ្យ​ខ្ពស់ បើអឺរ៉ុបប្រឆាំងនឹងផែនការរបស់​លោក។

មន្ត្រីអង្គការណាតូបានព្រមានថា ជំហររបស់លោកត្រាំ​លើកោះ Greenland ប្រឈមនឹងការធ្វើ​ឲ្យ​សម្ព័ន្ធភាពបាត់បង់ស្ថិរភាព រួមជាមួយការព្រួយបារម្ភថា ជម្លោះនេះអាចធ្វើ​ឲ្យ​ប៉ះពាល់ដល់សន្តិសុខរួម ក្នុងអំឡុងពេលដែលមានភាពតានតឹងផ្នែកភូមិសាស្ត្រនយោបាយកើនឡើងខ្លាំងបែបនេះ៕

ប្រែសម្រួល៖​ ឈាង