វ៉ែនតារបស់លោក Macron ទាក់ទាញការចាប់អារម្មណ៍ខ្លាំង ក្នុងវេទិកាសេដ្ឋកិច្ចពិភពលោក

ប្រធានាធិបតីបារាំង លោក Emmanuel Macron បានទាក់ទាញការចាប់អារម្មណ៍យ៉ាងខ្លាំងនៅក្នុងវេទិកាសេដ្ឋកិច្ចពិភពលោកកាលពីថ្ងៃអង្គារ​ទី​២០​ខែ​មករា​ឆ្នាំ​២០២៦ មិនត្រឹមតែតាមរយៈការរិះគន់យ៉ាងចាស់ដៃចំពោះការគំរាមកំហែងដំឡើងពន្ធគយរបស់លោក ដូណាល់ ត្រាំ ពាក់ព័ន្ធនឹងរឿងកោះ Greenland ប៉ុណ្ណោះទេ ប៉ុន្តែថែមទាំងតាមរយៈការពាក់វ៉ែនតា​ការពារកម្តៅថ្ងៃ​របស់​លោក ក្នុងអំឡុង​ពេលថ្លែងសុន្ទរកថាទៅកាន់មេដឹកនាំពិភពលោកនៅក្នុងសាលមហាសន្និបាតទៀតផង។

បើ​តាម​ BBC ប្រព័ន្ធផ្សព្វផ្សាយបារាំង បាន​ឲ្យ​ដឹង​ថា ការពាក់វ៉ែនតា​នេះគឺដោយសារមូលហេតុសុខភាព បន្ទាប់ពីលោក Macron បានបង្ហាញខ្លួនកាលពីសប្តាហ៍មុនក្នុងព្រឹត្តិការណ៍យោធាមួយ ដោយមានអាការៈក្រហមភ្នែកម្ខាង។ ក្រោយមក លោកបានពណ៌នាពីស្ថានភាពនេះថាជាអាការៈ «ស្រាលទេ» ហើយបាននិយាយបែប​លេងសើចថាវាមើល​ទៅ​ដូច​ជា «ភ្នែកខ្លា»។

របាយការណ៍​​ប្រព័ន្ធ​ផ្សព្វផ្សាយ​ក្នុង​ស្រុក​ បានបញ្ជាក់ថា បញ្ហានេះគឺជាការដាច់សរសៃឈាមតូចៗនៅក្នុងភ្នែក ដែលជាស្ថានភាពមិនមានគ្រោះថ្នាក់ ហើយ​ជាធម្មតានឹងជាសះស្បើយក្នុងរយៈពេល​ប៉ុន្មានថ្ងៃ និងមិនប៉ះពាល់ដល់គំហើញនោះឡើយ។

ការពាក់​វ៉ែនតានេះ បានបង្ក​ឲ្យ​មានការជជែកដេញដោលតាមបណ្តាញសង្គម ដោយអ្នកខ្លះបានចំអក​ឲ្យ​រូបរាងរបស់លោក Macron ហើយខ្លះទៀតប្រៀបធៀបលោកទៅនឹងតួអង្គក្នុងភាពយន្ត​ហូលីវូដ។

សូម​ជម្រាប​ថា ក្នុង​វេទិកា​សេដ្ឋកិច្ច​ក្រុង​ Davos លោក Macron បាន​ព្រមានប្រឆាំងនឹងការរអិលធ្លាក់នៃពិភពលោកទៅរករបបផ្តាច់ការ ការបាត់បង់តម្លៃច្បាប់អន្តរជាតិ និងការវិលត្រឡប់នៃ «មហិច្ឆតាចក្រពត្តិនិយម»។ មេ​ដឹកនាំ​បារាំង​វ័យ​៤៨​ឆ្នាំ​រូប​នេះ ក៏​បានរិះគន់ការព្រមានរបស់លោកត្រាំ ក្នុងការដំឡើងពន្ធលើ​អឺរ៉ុបចំនួន​៨​ប្រទេស​ ដែលប្រឆាំងនឹងសំណើគ្រប់គ្រងកោះ Greenland របស់​អាមេរិក ដោយលើកឡើងថា អឺរ៉ុបនឹងមិនចុះចាញ់នឹងការបំភិតបំភ័យ ឬការប្រើប្រាស់សម្ពាធពាណិជ្ជកម្មប្រឆាំងនឹងអធិបតេយ្យភាពទឹកដីនោះឡើយ៕

ប្រែសម្រួល៖ ឈាង