ទីក្រុងប៉េកាំង ប្រឆាំងកិច្ចព្រមព្រៀង Greenland រវាងអាមេរិក និងណាតូ ដែលប្រើចិនជាលេស «អាត្មានិយម»

អ្នកនាំពាក្យក្រសួងការបរទេស លោក Guo Jiakun បាននិយាយកាលពីថ្ងៃព្រហស្បតិ៍ទី២២ ខែមករាថា ទីក្រុងប៉េកាំងប្រឆាំងនឹងការអនុវត្តការចោទប្រកាន់ដែលគ្មានមូលដ្ឋានច្បាស់លាស់ និងប្រើប្រាស់ប្រទេសចិនជាលេសសម្រាប់ផលប្រយោជន៍អាត្មានិយម ជាពិសេសការវិវត្តចុងក្រោយបំផុតជុំវិញកោះ Greenland តែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារ Xinhua លោក Guo Jiakun បានថ្លែងនៅក្នុងសន្និសីទសារព័ត៌មានមួយថា «ប្រទេសចិនតែងតែតស៊ូមតិឲ្យដោះស្រាយទំនាក់ទំនងរវាងរដ្ឋនិងរដ្ឋស្របតាមគោលបំណង និងគោលការណ៍នៃធម្មនុញ្ញអង្គការសហប្រជាជាតិ។ អ្វីដែលហៅថាការគំរាមកំហែងរបស់ចិន គឺគ្មានមូលដ្ឋានទាល់តែសោះ។ ដូច្នេះ ទីក្រុងប៉េកាំងប្រឆាំងនឹងការបង្កើតរឿងរ៉ាវដែលគ្មានមូលដ្ឋាន និងប្រើប្រាស់ចិនជាលេស សម្រាប់ស្វែងរកផលប្រយោជន៍អាត្មានិយមរបស់ខ្លួន។

ទោះជាយ៉ាងក៏ដោយ នេះមិនមែនជាលើកទីមួយនោះទេដែលភាគីចិនចេញមុខបញ្ជាក់ម្តងហើយម្តងទៀត អំពីគោលជំហររបស់ខ្លួនលើបញ្ហា Greenland ។ ជាក់ស្ដែង កាលពីថ្ងៃចន្ទទី១៩ លោក Guo Jiakun ក៏បានជំរុញឲ្យសហរដ្ឋអាមេរិកឈប់ប្រើប្រាស់អ្វីដែលហៅថា «ការគំរាមកំហែងពីចិន» ជាលេសសម្រាប់ការស្វែងរកផលប្រយោជន៍ផ្ទាល់ខ្លួន។

ការចេញមុខឆ្លើយតបរបស់ចិននេះ ស្របពេលដែលអង្គការណាតូបានលើកឡើងថា ការចរចារវាងប្រទេសដាណឺម៉ាក Greenland និងសហរដ្ឋអាមេរិកនឹងបន្តទៅមុខទៀត ដើម្បីធានាថា រុស្ស៊ី និងចិនមិនដែលទទួលបានទីតាំងឈរជើងនៅលើកោះខាងសេដ្ឋកិច្ច ឬយោធាឡើយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ចិនបដិសេធជ្រៀតជ្រែក Greenland និងព្រមានអឺរ៉ុប កុំពឹងផ្អែកលើអាមេរិកពេក